ලාංකේය ගීත කලාවට වෙනස්ම විදියේ සම්ප්රදායක් බිහි කළ ප්රතිභාපූර්ණ ගායකයකු වන බන්දුල විජේවීර වඩාත් ජනප්රිය වූයේ “මාමයි – බෑණයි” සංගීත ප්රසංගය නිසාය. ඔහු විසින් “හුලවාලි” චිත්රපටය වෙත ගැයූ “කුලගෙදරින් දුම්බර කඳුවැටියේ” ගීතය අතිශය ජනප්රිය විය. ජන සම්ප්රදායයෙන් ගී විරිතට ගෙන ආ ජනශ්රැති ආශ්රිත ගීත රැසක් ඉදිරිපත් කළ තවත් ජනහද දිනූ නිර්මාණකරුවකු ලෙස ගායක බන්දුල විජේවීරගේ අතීත මතකයන් පිළිබඳ කළ සුහද ආවර්ජනය සරසවිය කලාපයේ මෙසේ ඉඩහසර වෙන් කෙරිණ.
“හුලවාලි” චිත්රපටයට කොහොමද සම්බන්ධ වුණේ?
ඉස්සර අපි අත්වැල් ගායකයෝ විදියට තමයි ගුවන් විදුලියට සම්බන්ධ වුණේ. ඒ වික්ටර් රත්නායකගේ “ස” ප්රසංගය කරන කාලේ. හේවුඩ් එකේ ඉගෙන ගන්න දවස්වල සෝමපාල රත්නායකත් අපිත් එක්ක හිටියේ. ඉතින් සෝමපාලට කියලා තිබුණා, සින්දු කියන්න පුළුවන් කොල්ලො හතර දෙනෙක් ඕන කියලා. ලක්ෂ්මන් විජේසේකර, ආනන්ද වීරසිරි ඇතුළුව හතර දෙනෙක් ගියා. දයාරත්න රණතුංග කළා “ස්වර රංග” කියලා රූපවාහිනී වැඩසටහනක්. ඕකට මං සින්දුවක් දුන්නා. ඒ දවස්වල මම නැවතිලා හිටියේ ලක්ෂ්මන් විජේසේකරගේ අක්කගෙ ගෙදර රත්මලානෙ. ඉතින් මම කෝච්චියට ගොඩවෙලා සින්දුව බලලා කෝච්චියේ යද්දි තමයි සින්දුවට මෙලඩිය දැම්මේ. ප්රවීණ ගීපද රචක උපාලි ධනවලවිතාන ලියපු “දෝත පුරා මුතු මාල ලතා” ගීතයේ සිංදුව සෑහෙන්න ජනප්රිය වුණා.
ඊට පස්සේ මම සරල ගී පරීක්ෂණයට ඉදිරිපත් වුණා. මම “ඒ” ශ්රේණියේ ගායකයෙක් විදිහට පරීක්ෂණයෙන් සමත් වුණා. සරල ගී වැඩසටහන්වලට ගීත හදාගන්න ගියේ වික්ටර් අයියගේ ගෙදරට. සිංදු හතරක් ඕන කිව්ව හින්දා සින්දු තුනයි තියෙන්නේ දැන්. මට එක සිංදුවක් අඩුයි කිව්වාම, වික්ටර් අයියා ඒකට උදව් කළා. වික්ටර් අයියාගේ ගෙදරට හැන්දෑවට විවිධ අය එනවා. චින්තන ජයසේන, අබේවර්ධන බාලසූරිය වගේ කලාකරුවන් බොහෝමයක් එනවා. ඔය ආපු අය අතරේ එක්කෙනෙක්ට වික්ටර් අයියා කිව්වා මෙන්න මේ කොල්ලට සින්දුවක් ලියලා දෙන්න කියලා. ඒ පුද්ගලයා මගෙ දිහා බැලුවෙත් නෑ. ඔහු මුකුත් නොකියා ගියා. යන වෙලාවේ වික්ටර් අයියාගේ බිරිඳ චිත්රා අක්කා පොතක් කියවමින් හිටියේ. ඔහු ඇහුවා ඒ වෙලාවේ චිත්රා අක්කාගෙන් මොකක්ද? කියවමින් ඉන්න පොත කියලා. ඊට පස්සේ චිත්රා අක්කා කිව්වා කරුණාසේන ජයලත්ගේ “රිදී නිම්නය” කියලා. වචනය විතරයි ඔහු ගත්තේ. විනාඩි දහයකින් විතර ගීතය ලියලා ගෙනත් දුන්නා. ගීතයට යටින් ලියලා තිබුණා කේ.ඩී. කේ ධර්මවර්ධන කියලා.
ඊට පස්සේ සිංදු හතර කරලා තමයි ගීත ලෝකෙට මම ආවේ. ඒ එක්කම වික්ටර් අයියාගේ “ස” ප්රසංගයටත් දිගටම සම්බන්ධ වුණා. වික්ටර් අයියා දවසක කිව්වා මගේ ෆිල්ම් එකක් තියෙනවා, ඒකෙ ඔයාට සින්දුවක් දෙන්න ඕන කියලා. ෆිල්ම් එකේ නම දැනගෙන හිටියෙත් නෑ ඒ වෙනකොට. ඉන්පස්සේ තමයි හුලවාලි ෆිල්ම් එකේ “කුල ගෙදරින් දුම්බර කඳුවැටියේ” සින්දුව ගායනා කරන්න ලැබුණේ. ඒක තමයි මගේ හැරවුම් ලක්ෂ්යය. ඒ ගීතය සෑහෙන ප්රතිචාර ලැබුණා. ගෙදරට ලියුම් පවා ආව රසිකයන්ගෙන්.
“හුලවාලි” චිත්රපටයෙන් පස්සේ මොකද වුණේ?
එච්.ඩී ප්රේමරත්නගේ මංගල තෑග්ග ෆිල්ම් එකට මම සිංදු කිව්වා. “එක යායේ කකා වැටී” ගීතය මම, සුනිල් එදිරිසිංහ, එඩ්වඩ් ජයකොඩි ගායනා කළා. ප්රේමකීර්ති ද අල්විස් තමයි ගීතය ලිව්වේ. එච්.එම්. ජයවර්ධන සංගීතවත් කළා. ඊටපස්සේ විවිධ චිත්රපටවලට ගීත ගායනා කළා. හැබැයි හුලවාලි සහ මංගල තෑග්ග වගේ චිත්රපට තරම් ගැම්මක් තිබුණේ නැහැ.
නළුවෙක් විදියට ක්ෂේත්රයට එන්නේ කොහොමද?
ඒ දවස්වල සරසවිය පත්තරේ දැන්වීමක් දාලා තිබුණා, දයානන්ද ගුණවර්ධනගේ “නරිබෑනා” නාට්යයේ නරියාට නළුවෙක් අවශ්යයි කියලා. ඒකට ඒ දවස්වල ඔඩිෂන් එක තිබුණේ සුදර්ශියේ. මම ඔඩිෂන් එකට ගියා. දයානන්ද මහත්තයා ඇහුවා නටන්න, ගයන්න, වයන්න පුළුවන්ද? කියලා. මම කිව්වා පුළුවන් කියලා. මට ඊට පස්සේ ඔහු කිව්වා නාට්යයක කොටසක් රඟපාලා පෙන්නන්න කියලා. මම “අන්දරේ” නාට්යයේ අන්දරේගේ චරිතයේ කොටසක් කරලා පෙන්නුවා. රඟපාලා පෙන්නලා ඉවර උණාට පස්සේ දයානන්ද මහත්තය ඇහුවා පිනුම් ගහන්න පුළුවන්ද? කියලා. මම කිව්වා සර් පිනුම් ගහන්න නම් බෑ කියලා. ඊට පස්සේ “නරි බෑනා” නාට්යයේ මට පොතේ ගුරාගේ චරිතය ලැබුණා. දයා අල්විස්ගේ “බෝඩිම” ටෙලි නාට්යය තමා මගේ පළමුවෙනි ටෙලි නාට්යය රඟපෑම. ඒක රචනා කළේ දයා අල්විස්. ඔහු ආරාධනා කරා බෝඩිම ටෙලි නාට්යයේ රංගනයෙන් දායකවන්න කියලා. ඊටපස්සේ කෝරළේ මහත්තයා, සමාවෙන්න සර්, සොරි මැඩම්, කරවණැල්ලේ බෝල වෙදා, නිසල විලක්, ඉක්බිති, පාන්බට්ටා, දුටු නොදුටු මල, කතුරු, හතේ කල්ලිය වගේ සිනමාපට, ටෙලිනාට්ය බොහෝමයක මම රඟපෑවා.
“මාමයි බෑනයි” ප්රසංගය ගැන මතකය අවදි කරමු..
“මගේ රත්තරන් හෙලේනා” සින්දුව මමයි රෝහණ බැද්දගෙයි “නන්දන වින්දන” වැඩසටහන ඉදිරිපත් කළාට පස්සේ සෑහෙන්න ජනප්රිය වුණා. තවත් සින්දු කිහිපයක් කළා. නිමල් ලක්ෂපතිආරච්චි කිව්වා අපි ෂෝ එකක් කරමු කියලා. මේ ෂෝ එකට නමක් අපි කල්පනා කරමින් හිටියා. දයානන්ද ගුණවර්ධන මහත්තයා ළඟට අපි නමක් යෝජනා කරගන්න ගියා. දයානන්ද මහත්තයා කිව්වා අපි මේ ෂෝ එකට දාමු “මාමයි බෑනයි” කියලා. ප්රසංගය අති සාර්ථක වුණා. මම හිතන හැටියට දර්ශන වාර අටසීයක් විතර කළා. ප්රසංගයට නිවේදකයෙක් ගත්තෙත් නැහැ. මුළු ශෝ එක පුරාවටම මමයි රෝහණමයි විතරමයි. කැනඩාව, ඕස්ට්රේලියාව, ජර්මනිය, සිංගප්පූරුව, අබුඩාබි වගේ රටවල් විසි දෙකක් විතර, අපි ප්රසංගය අරගෙන ගියා.
ජන ගී වලට ආශාව ඇතිවුණේ කොහොමද?
ඉස්සර හේවුඩ් එකේ ඉගෙනගන්න දවස්වල ජන ගී උගන්නපු සර් ගැයූ ගී එතරම් මිහිරක් දැනුණේ නැහැ. රෝහණ බැද්දගේ හමුවුණාට පස්සේ තමයි ජන ගීවලට කැමැත්තක් ඇති වුණේ.
ඔබගේ අදහසට අනුව වත්මන් ජන ගී ගැන අදහස මොකක්ද?
අද කාලේ ගීතවලට ජන ගී ආභාසය වෙනවා බොහෝම අඩුයි. භාතිය සන්තුෂ්ලාගෙන් පස්සේ ලංකාවේ ජන ගීවලට එතරම් අවධානයක් යොමුවෙලා නැහැ කියලා හිතෙනවා. සමන් ලෙනින් වගේ වත්මන් පරපුර ජන ගී ඉදිරියට අරගෙන යන බවකුත් දකිනවා.
ඔබ ගැයූ ගී අතරින් වඩාත් දැනිච්ච ගීතය මොකක්ද?
“හිත හීලැ නෑ” ගීතයට තමයි වඩාත් කැමති. සුනිල් ආරියරත්න ගීතය රචනා කළේ. ඒ ගීතයේ තියෙනවා බෞද්ධ දර්ශනයක්. සංකල්ප රූපත් මැවෙනවා. අසන ශ්රාවකයෝ කියනවා ගීතය අහද්දි අපිට රූප මැවෙනවා කියලා. වඩාත් දැනුණා ඒ ගීතය.
මලින්ත විතානගේ