අයුක්තිය අසාධාරණය හමුවේ නිබඳව නැඟී සිටින සදේශ් විශ්වවිද්‍යාල ශිෂ්‍යයෙකි. විශ්වවිද්‍යාලය තුළ විවිධ සංගම් නියෝජනය කරන ඔහු එක්තරා උද්ඝෝෂණයක ප්‍රතිඵලයක් ලෙස, එහි නියැළී සදේශ් හා සගයන් පොලිස් අත්අඩංගුවට පත්වේ. ඔවුන්ව මුදා ගැනීමට ඉදිරිපත් වන්නේ, ඇමැතිවරයකුගේ ලේකම්වරයකු ලෙස කටයුතු කරන සදේශ් ගේ මාමායි. උද්ඝෝෂණයේ නිරතවීම හේතුවෙන් සදේශ් ඇතුළු සඟයන් පන්ති තහනමකට ලක්වේ. 

සදේශ්ගේ පියා සමඟින් ඇති වෛරයක් නිසා, සදේශ්ගේ මාමා විසින්, ඇමතිතුමාගේ සමීපතම මත්ද්‍රව්‍ය ව්‍යාපාරිකයකු වෙත සදේශ්ව යොමු කරයි. ඔහු යටතේ රැකියාවේ නිරත සදේශ් දිනෙක මත්ද්‍රව්‍ය සමගින් නීතියට හසුව බන්ධනාගාර ගත වෙයි. සදේශ්ව මුදා ගැනීමේ මෙහෙයුමක නිරත වන සදේශ්ගේ පෙම්වතිය, යහළුවන් හා මාධ්‍යවේදිනියක් සියලු තොරතුරු සොයා ගනී. මේ පිළිබඳව දැනගත් මාමා විසින් මැරයන් යොදා සදේශ්ගේ පෙම්වතිය හා මිතුරන් මරා දමා මාධ්‍යවේදිනීය පැහැර ගනී. තම හිතවතුනට සිදුවු දෙය දැන ගන්නා සදේශ් පළිගැනීමේ අරමුණින් හිරෙන් පැන යයි. ඉන් අනතුරුව සිය මාමාට, ඇමතිවරයාට සහ මැරයන්ට කුමක් සිදුවේවිද? මාධ්‍යවේදිනියගේ දිවි සුරැකේද? සදේශ්ගේ අනාගතය කෙලෙස විසඳේද යනු රයිඩර්, ඔබට මතු දිනෙක පවසාවි.

මිතුරෙකු සමඟින් තනිවට ගොස් අහඹු ලෙස නළුවකු වී සිනමාව වේදිකාව හා පුංචි තිරය එකසේ ජයගත් රජිත හිරාන් චාමිකරගේ කුලුඳුල් සිනමා නිර්මාණය ලෙසින්, රයිඩර්, ළඟදීම තිරගත වීමට නියමිතව ඇත. විකට නළුවකු ලෙසින් රසික ප්‍රසාදයට පාත්‍රව ඇති රජිත හිරාන් චාමිකර (පිංපොං),රයිඩර්, සිනමා පටය තුළින් අධ්‍යක්‍ෂණයට අමතරව, තිර රචකයකු සහ ගීත රචකයෙකු ලෙසින් ද ප්‍රේක්ෂකයා හමුවීමට සමත්ව ඇත.