පුරා දශක හතරක කාලයක් චරිතාංග නිළියක ලෙසින් ටෙලි නාට්‍යය ප්‍රේක්ෂක සිත්සතන් ඇදබැඳ තබාගන්නට සමත් වූ ඕ මේ දිනවල සති අන්තයේ ස්වාධීන රූපවාහිනීය ඔස්සේ විකාශනය වන “සසංකාරා ” ටෙලි සිත්තමේ තමන්ට දරුවකුද නැතත් ගමේ මවුවරුනට වින්නඹු සත්කාරයේ යෙදෙන හේරත් හාමිගේ මැදිවියේ පසුවන ඩිංගි එතනා…නමැති බිරිඳගේ චරිතයට පණපොවනා ඇය ඔබ මතකයේ ඇති…
ඕ ප්‍රවීණ රංගන ශිල්පිනී චම්පා ශ්‍රියාණි මහත්මියය..
මාතර…පාලටුවේ ව්‍යාපාරිකයකු වන සිරිසේන වික්‍රමතන්ත්‍රී සහ වැලිගම..ජඹුරගොඩ ..අමරාවතී සපුමොහොට්ටි මවුපිය දෙපළගේ වික්‍රමතන්ත්‍රීගේ ශ්‍රියාණි නම් වැඩිමහල් දියණිය අපේ කතා නායිකාවය..ගාල්ල..මහමෝදර උපන් ඇයට බාල නිවුන් සොහොයුරන් දෙදෙනෙකි..ඒ රුවන් සහ රොහාන්ය..
පසුකලෙක ගල්කිස්සේ පදිංචියට පැමිණීමෙන් පසු ඇය ඉගෙනුමට පිවිසියේ ගල්කිස්ස උසස් බාලිකා විදුහලටය..
” මං පොඩිකාලෙ ගෙදර අය මට කතාකරල තියෙන්නෙ චම්පා කියලනෙ..ඉතිං කලා ක්ෂෙත්‍රයට ආවාට පස්සෙ ඉබේම චම්පා ශ්‍රියාණි වුණා…”
පාසලේ කලා කටයුතුවලට සම්බන්ධ වූ ඇය ගල්කිස්ස තපෝධනාරාම දහම් පාසලේ දී ද නාට්‍යය ඇතුළු කලා කටයුතුවලදී ඉදිරියෙන්ම සිටියාය..උසස් පෙළ විභාගයට විද්‍යා විෂයයන් හදාරන්නට වූ ඇය දිනෙක දුටුවේ පාසලේ රසායනාගාරයට කිසියම් පිරිසක් පැමිණ ඇති බවකි..
” එදා ඒ ඇවිත් හිටියෙ විනාඩි 40ක ඒකාංගික ටෙලි නාට්‍යයක් රූපගත කරන්න තිමති වීරරත්න මහත්මයා..එහි ගුරුවරියකගේ චරිතය රඟපාන්න ඇවිත් හිටියේ සුවීනීතා වීරසිංහ මහත්මියයි..ඒ නාට්‍යයේ උප ප්‍රධාන චරිතයකට පාසලේ ගැහැනු ළමයෙක් සොයමින් සිටියා..එයට තෝරාගත්තෙ මේ මාවයි..”
සරසවිය සමග ආදරණිය පිළිසඳරකට එක්ව පසුවන අපේ චම්පා ශ්‍රියාණි කියන්නීය..
“ඒ කාලෙ අපේ ගෙදර ටී.වී එකක්වත් නැහැ..අහල පහල ගේකට ගිහින් තමයි එදා අපි ටෙලි නාට්‍යය බැලුවෙත්…අනික..ඒ කාලෙ ටෙලි නාට්‍ය හැමදාමත් නැහැනෙ..”
තුරුණුවියෙහි පසුවන අපේ කතා නායිකාව එහි රඟපෑමත් සමඟම එඩ්වඩ් මල්ලවආරච්චිගේ නවකථාවක් ඇසුරින් තනන සුදු හාමිනේ ටෙලි නාට්‍යයේ පියා වූයේ ටෝනි රණසිංහය.මව වූයේ ලීනා ද සිල්වාය ..ඔවුන්ගේ දියණිය ලෙසින් එදා එහි රඟපෑවේ අපේ චම්පා ශ්‍රියාණිය..ඊට තිමති වීරරත්න මහතාද ඇය වෙනුවෙන් රෙකමදාරුවක්ද කර ඇති බව ඈ කියන්නී..සිනාපිරි මුවිනි..
” ඒ කාලෙ බැලුවාම අද හරිම වෙනස්…මුල්කාලෙ අපේ අය සල්ලි මත්තේ ඉඳන් වැඩකළේ නැහැ..අද ඉතින් පේමන්ට් කොහොමද කියලනෙ මුලින්ම අහන්නෙ..සල්ලි දුන්න පලියට නම් මම රඟපාන්න යන්නේ නම් නැහැ…නිර්මාණයකට මට කතාකළොත් එහි රඟපානවාද නැද්ද කියලා තීරණයක් ගන්න මට හේතු කීපයක් තිබෙනවා..හොඳ පළපුරුදු අධ්‍යක්ෂකවරයෙක්..හොඳ අංග සම්පූර්ණ පිටපතක්…දක්ෂ කලා අධ්‍යක්ෂවරයෙක්ද වගේ දේවල් ගැන මම බොහොම සැලකිලිමත් වෙනවා…මම බාරගත් චරිතයට හරිහැටි තෘප්තිමත් විය නොහැකිනම් මටත් වැඩක් නැහැනේ…”
අපේ ප්‍රවීණ රංගවේදිනී චම්පා ශ්‍රියාණි කියන්නීය..
” මම ක්ෂෙත්‍රයට ඇවිත් මේ අවුරුද්දට අවුරුදු 40ක් වෙනවා .ඒත් මම රඟපාලා තියෙන්නෙ පොඩි සංඛ්‍යාවක…කවදාවත් මට නිළියක වෙන්න ඕනා කියලා සිහිනයක් තිබුණෙත් නැහැ.. මේවා දෛවෝපගතව මට ලැබුණු දේවල් තමයි…මට ඉස්සර ඉඳන් තිබුණු ලොකුම සිහිනය බලාපොරොත්තුව හොඳ බිරිඳක්..හොඳ මවක්..හොඳ පවුලක් කියන දේ විතරමයි..අදටත් මං මගේ ජිවිතයේ මුල්තැන දෙන්නෙ මගේ පවුලට..මගෙ දරුවන්ට…”
ඇයගේ කතා විලාසයේ සෘජු බව ඈ දෙනෙතින්ද මතුවී පෙනෙයි..
මානවී..හිමි අහිමි..කඳුළක හසරැලි…ගංගා සහ නිශ්ශංක…හිරුට මුවාවෙන්…ආදී ටෙලි නාට්‍යය රැසක ප්‍රධාන සහ උප ප්‍රධාන චරිතසේම වියපත් චරිත රංගනයේදීද ඇය සතු විසල් කුසලතාව සසංකාර ටෙලි සිත්තමෙන්ද මොනවට කියැවෙයි..
” මං කවදාවත් චරිත ඉල්ලාගෙන ගිහිල්ල නම් නැහැ..මට ලැබුණෙත් ප්‍රධාන චරිතමයි..මම කරපු චරිත දිහා ආපසු හැරී බලනකොට ලැබෙන ඉහළම ජනතා ප්‍රතිචාර වගේම මම මගේ හෘද සාක්ෂියට එකඟවත් හරිම තෘප්තිමත් …”
මේ වනවිට අපේ ආදරණිය කතා නායිකා චම්පා ශ්‍රියාණි ඉහළම ජනප්‍රියත්වයේය…මේ අතරේදීය…තම රංගන ජීවිතයට දිගු විරාමයක් තබන්නට තීරණය කළේ..
” මම 1990 දි විවාහ වුණේ..”
ඇය හා අතිනත ගත්තේ සංචාරක හෝටල් ක්ෂෙත්‍රයේ සේවයෙහි නියුතු පර්සි මහේන්ද්‍ර මහතාය…
” එයයි මමයි හමුවුණේ දැනහඳුනා ගත්තෙ අපි දෙන්නම දහම් පාසල් යන කාලෙදිමයි..දහම් පාසලට සම්බන්ධ සර්වෝදය ව්‍යාපාරයත් එක්කල අපි එකට වැඩ කළේ..මං නිළියක් වෙන්න ඉස්සර අපි අපිව හඳුනාගත්තෙ..”
එම විවාහයෙන් ඔවුනට තිළිණ වූයේ දියණියන් දෙදෙනෙකි..පළමුවැන්නී සඳලි ගීත්මා ය. දෙවැන්නී සියුමි දිනෙත්මාය…
තම වැඩිමල් දියණිය පෙර පාසලට යනතුරුම රංගනයෙන් ඉවත්ව පවුලේ හා තම දරුවන්ගේ කටයුතු වෙනුවෙන් කැප වූ ඕ ඒ පිළිබඳව මහත් සතුටකින් පසුවන්නීය..
” මගෙ දුෂ්කරම කාලවලදිත් මගෙ දරුවන්ගෙ අධ්‍යාපන විභාග කටයුතුවලදිත් මම මුල්තැන දුන්නෙ ඒවාට..මම ලොකු මුදලක් රඟපෑමේදි අය කරනව වුණත් එන එන නිර්මාණ නම් බාරගන්නේ නම් නැහැ… ”
” අනේ මම කැමති නැහැ…අධ්‍යක්ෂ ඇක්ෂන් කියා කට් කියනවා..මම කැමරාවෙන් ඉවතට යනවා..ඒ වනතුරු විතරයි මම නිළිය..ඉන්පස්සේ මම චම්පා ශ්‍රියාණි…
මාව මගෙ රසිකයන්ට දැකගන්න ලැබෙන්නෙ අපේ ක්ෂෙත්‍රයේ කෙනකුගෙ අවමඟුලකදි..නැත්නම් විවාහ මංගල්ලෙකදි විතරයි..නළු නිළි ප්‍රදර්ශන තැන්වලදිවත් රූපවාහිනී වැඩසටහන් වලදිවත් මම ඒ තැන්වල නැහැ…ඇත්තෙන්ම වෙස්මුහුණු දාගෙන මං නිළියක් කියල ප්‍රදර්ශනයට පේවී ඉන්න මං කැමති නැහැ…”
ඇය ඒ ටික කීවේ මා ඇයගෙන් විමසූ පැනයකදීය…
” මගතොටේදි දකින අය මගෙ ළඟට ඇවිත් මගෙ රඟපෑම් ගැන අගය කරද්දි මම ඉහළින්ම සතුටු වෙනවා..”
ඔබ තවදුරටත් රඟපාන්නේදැයි කළ විමසුමකදී ඇය කියන්නී..
“හොඳ පිටපතක්..හොඳ නිර්මාණයක්..නම් මම පිටපත සම්පූර්ණයෙන්ම අධ්‍යයනය කරල ගුණාත්මක නම් බාරගන්නවා…”
හොඳ නිර්මාණ කරන්න..ඒ වෙනුවෙන් වියදම් කරන්න සමත් හොඳ නිෂ්පාදකවරුන් ඉන්නවා..ඒත් තමන් ලොකු පිරිවැයක් යොදලා හොඳ නිර්මාණයක් කළ පළියට ඒ වියදමට සරිලන සාධාරණ විදිහට ඒ නිර්මාණය මිලදී ගන්න අය විරලයි…එතැනදි නිෂ්පාදකයාගේ සතුට නැතිවෙනවා..ලාභයක් නැති තැන කලකිරිමක්නෙ ඉතුරු වෙන්නෙ..මේ නිසා හොඳ ගුණාත්මක පිටපත් අකුළාගෙන ඉන්නවා..වටිනාකමට දී ගන්න බැරිව හිත අමාරුවෙන් ඉන්නවා..එයින් සිද්ද වෙන්නෙ ගුණාත්මක නිර්මාණ රටට අහිමිවීමයි..”
තමන් පැමිණි ගමන් මග දෙස ආපසු හැරී බලන ඇය මහත් සොම්නසකට පත්ව සිටින්නීය..
” ඇත්තමයි මම බොහොම තෘප්තිමත් …දක්ෂ අධ්‍යක්ෂකවරුන්…දක්ෂ නළු නිළියන්…වගේම හොඳ ටෙලි නිර්මාණවලත් මට රඟපාන්න ලැබුණා…ඒ වගේම මම අයකරන මුදලට සාපේක්ෂව මගේ කාර්යය මැනවින් කළ බවට ඉහළම ප්‍රතිචාර ලැබෙනවා…ඉදිරියේදි මට සෑහීමකට පත්විය හැකි චරිත පමණක් ලැබුණොත් භාරගන්න බලාපොරොත්තු වෙනවා..සකර්මා වැනි ටෙලි නාට්‍යවල නිර්මාණශීලී අධ්‍යක්ෂකවරුන් බොහොම වටිනවා..”
“මම මගේ ජීවිතයේ මම බොහොම මධ්‍යස්ථයි..මම බොහොම සරල කාන්තාවක්..මගේ තාත්තාගෙන් හුරු වුණ පොතපත කියැවීමෙන් තවමත් බොහෝ දේ මගෙ ජිවිතයට උපයා ගන්නවා..ඒ වෙනුවෙන් මගෙ මහත්තයාත් අවශ්‍ය පරිසරය මට ලබාදී තියෙනවා…
පෙර කුසලයට ලැබුණු මේ හැමදේම තාවකාලිකයි.බලන්න සුසන්තා චන්ද්‍රමාලිගෙ දෛවය..ජීවිතයේ අනිත්‍යතාව තේරුම් ගත යුතුම දෙයක්..මගේ පිළිවෙත් දන්න ඈයො මට තෑගි කරන්නෙත් වටිනා පොත්පත්…
අනේ ඇත්තමයි. මං නිළියක් කියලා රත්තරන් බඩු වලින් දිලිසෙන්නයි …ලොකු හීන මවන්නයි තේරුමක් නැහැනෙ…දැන් මගෙ එකම සතුට මගෙ රත්තරන් මුනුපුරා තමයි…මට කියල පුතෙක් නැති නිසා මුණුපුරා මට දැන් ළඟම ඉන්නවා…”
අපේ ආදරණිය රංගවේදිනිය චම්පා ශ්‍රියාණිගෙන් සමුගන්නට මොහොතක් තිබියදී…ඇය සොයා පැමිණි සරසවියට මුවනොසෑහෙන තරමට ස්තුතිවන්ත වෙමින් අව්‍යාජ සිනහවකින් යුතුව පසුවන්නීය..
අමල් යශෝමන් ජයසිංහ