වචන සමූහයක් පෙළ ගැස්වූ සැණින් ගීතයක් යනුවෙන් හඳුන්වා දීමට නොහැකිය. ගීතයක් තුළ ගැබ් වී ඇති වචන හරවත් විය යුතුයි. ඒ වගේම ගීතයේ කිසියම් අර්ථයක් කතාවක් පණිවිඩයක් තිබිය යුතුයි.
එහෙත් වර්තමානයේ අපිට හරසුන් ගීත බොහෝ විට අසන්නට ලැබේ. අතීතයේ අප ඇසූ ගීත අපේ මතකයෙන් තවමත් ඈත් නොවී පවතින්නේ එම ගීත හරවත් බවින්, රසවත් බවින් යුක්ත වූ නිසායි. එහි සම්පූර්ණ ගෞරවය හිමි විය යුත්තේ අපේ රටේ සිටින ප්‍රවීණ ගීත රචකයින් සහ රචකාවන්ටයි. අතීතයේ ජීවත් වූ අපෙන් සමුගෙන ගිය ප්‍රවීණ ගීත රචකයන්ටයි. ඔවුන් රචනා කළ ගීත එදත්, අදත්, හෙටත් නොමැකී පවතිනු ඇත.
අද අසන්නට ලැබෙන ගීත ඇතැම් විට ශබ්ද රසයෙන් යුක්ත වූවත් එහි කිසිදු අර්ථ රසයක් ගැබ්වී නොමැත අර්ථවත් නිර්මාණ බිහිකිරීමට අද සමාජයේ සිටින පිරිස ඉතා අල්පය. ඒ පිරිස අතරින් ඉතාමත් රසවත් හරවත් ගී පද ගොතන්නෙක් සරසවිය හමුවට පැමිණියේය.
ඔහු නමින් නවක ගී පද රචකයෙක් වූ තාරක කළුබෝවිලයි.
හෙළයේ කලා අසපුවක් වූ කොළඹ ආනන්ද විදුහලෙන් සිප් සතර හැදෑරූ තාරක මුල්වරට කවි ගී ලිවීමට පෙලඹෙන්නේ පාසල් සමයේදීමය.
“මම ඉගෙන ගත්තේ කොළඹ ආනන්ද විද්‍යාලයේ. ඉස්කෝලේ කාලෙ ඉඳන්ම මට කවි ගීත ලියන්න සහජ හැකියාවක් තිබුණා. ඒ කාලේ හැම පාසලකම වගේ බිත්ති පුවත්පතක් තියෙනවා. අපේ පාසලේ බිත්ති පුවත්පතට වැඩිපුර ලිව්වේ සමාජයේ වෙන සිදුවීම් දිහා බලලා ඒ හා බැඳුණු ලිපි, කවි, ගීත මම ලිව්වා. පාසල තුළ ඒවා ගොඩක් ජනප්‍රිය වුණා. ඒත් කවුරුවත් දැනගෙන හිටියේ නැහැ ඒ ලියන්නේ මම කියලා.
“මගේ යාළුවෝ එයාලගේ පෙම්වතියන්ටත් කවි ගීත ලියා ගත්තේ මට කියලා”.
“මම ඉතින් රසවත්ව ඒ දේවල් ලියලා දුන්නා”.
මට ගීතයක් ලියන්න වැඩි කාලයක් ගතවෙන්නේ නැහැ. අදහස් ඔළුවට ආවොත් එසැණින් ගීත ලියන්න පුළුවන්. මම ගීතයකට වචන ගළපන්න ක්ෂණිකව පුළුවන්.
තාරක කළුබෝවිල එක්සත් රාජධානියේ ජීවත්වන කෙනෙක්. ඔහුට ලංකාවේ මෙන් නිදහස නැත. තාරක එහි ගත කරන්නේ අතිශය කාර්යබහුල ජීවිතයක් එහෙත් ඔහු අතින් ලිය වී ඇති ගී ඉතාමත් රසවත්.
“ඔව්. මම පදිංචි වෙලා ඉන්නේ එංගලන්තයේ. ඒත් නිවාඩුවක් ලැබුණ ගමන් මම ලංකාවට එනවා. මම එහේ ගත කරන්නේ කාර්යබහුල ජීවිතයක්. ගීත ලියන්න මම කාලය හොයාගන්නවා.
උනන්දුව තියෙනවා නම් කොතරම් කාර්යබහුල වුණත් ගීතයක් ලියන්න කෙසේ හෝ කාලය හොයාගන්න පුළුවන්.
ඉතින් ඉඩ ලැබෙන හැම වෙලාවකම මම ගීතයක් ලියන්න පෙලඹෙනවා.”
තාරක අතින් ලියවුණු ගීත 16ක් පසුගියදා කොළඹ කදිරගාමර් අනුස්මරණ ශාලාවේදී එළි දක්වන ලදී. ඉතා සුන්දර චාම් එහෙත් ගාම්භීර අන්දමින් පැවැත්වුන ගී එළිදැක්වීමේ උත්සවයේ ගීත විචාරය කිරීමට පැමිණියේ ප්‍රවීණ ගේය පද රචක ධම්මික බණ්ඩාරයන්ය. ගීත ගායනයේ ජනප්‍රිය ගායක ඡායාරූප ශිල්පී දයාන් විතාරණ, අජිත් රත්නවීර, අයේෂා ප්‍රනාන්දු සහ සුචිර සුමංග විසින් ගයනා කළහ.
“මම ඒ ගීත 36 ලියලා තියෙනවා. ඒත් මම එළිදැක්වූයේ ගීත 16යි. මම මේ ගීත සියල්ල ඇල්බම් 03ට සැකසුවා. ආදරණීය කම්බි, ආදරණීය හෂි සහ ආදරණීය සඳු ඒවා නම් කළා. මේ වෙනකොට ගීත 32ක් තනු දාලා නිම කරලා තියෙනවා.
සමහර වෙලාවට කාට හෝ යම් දෙයකට ගීතයක් ලියලා දෙන්න කිව්වොත් මම ඒක කල් නොයවා හරි ආසාවෙන් ලියලා දෙනවා.
මම එංගලන්තයේ ඉන්නකොට අපේ හිතවත් කාන්තාවක් මුණගැසුණා. ඇය කිව්වා ඇයගේ 50වෙනි විවාහ සංවත්සරය වෙනුවෙන් ගීතයක් අවශ්‍ය බව.
“ඒ වෙනුවෙන් කාගේ අතින් හෝ ලියවුණු ගීත තියෙනවද කියලා මම හොයලා බැලුවා. එහෙම ගීතයක් මට හම්බවුණේ නැහැ.”
“ඒ වෙනුවෙන් මම අලුතින් ගීතයක් රචනා කළා.
අතැගිලි බැන්දේ
ඔබ හා එක්වී
එක දිවි ගමනම
යන්න සිතන්
හදවත් පිරුනේ
මිල මුදලින් නොව
ආදරයෙන් ලද
හුස්ම පොදින්
ඉහත සඳහන් කර ඇත්තේ තාරක අතින් ඒ හිතවතියට ලියූ ගීතයේ මුල් පද පේළි කිහිපයක් මෙවැනි ගීත රාශියක් ඔහු අතින් ලියැවී ඇත. මුලින්ම සඳහන් කළාක් මෙන් ඒ හැම ගීතයක් පිටුපසම බොහෝවිට ඇත්තේ සත්‍ය සිදුවීම්ය.
තාරක විසින් රචනා කොට එළිදැක්වූ ගීත 16ට සවන් දෙන විට ඒ සෑම ගීතයකම යම් කතාවක් ගැබී ඇති බව පෙනී යයි. ඒ පිළිබඳ තාරක අදහස් පළ කළේ මෙසේය.
“ඔව්. මගේ ගීත බොහෝමයක යම් කතාවක් ගැබ්වෙලා තියෙනවා. ඇතැම් ගීතවල සත්‍ය කතාවක් ලියවිලා තියෙනවා. සමහර ගීත මගේ ජීවිතයටත් සම්බන්ධයි.”
මම මගේ සහෝදරයා වෙනුවෙන් ගීතයක් ලිව්වා ඔහු ජීවිතයෙන් සමුගත්තට පසුව.
තමාගේ ජීවිතයට අපූරු යහළුවන් හමුවීම ඉතා සුන්දරයි. ඒ මිත්‍රකම නිර්මාණයක් කිරීමේදී මහඟු උපකාරයක් වෙයි. තාරකටද ජීවිතයේදී හමුවූ එවන් මිතුදමක් නිර්මාණකරණයටද සම්බන්ධ කරගැනීම ඔහුගේ ගී නිර්මාණ සාර්ථක වීමට ප්‍රධානම හේතුව වී ඇත.
“මගේ ජීවිතයට ප්‍රදීප් හේෂාන් හමුවීම මගේ වාසනාව. ඔහුත් සමඟ එකතුවෙලා තමයි මම ගීත ලියන්නේ. ඔහු ඔහුගේ අදහස් කියනවා. සමහර වෙලාවට ඒ සම්බන්ධව මත ගැටුම් පවා ඇති වෙනවා. ඒත් අවසානයේ සුන්දර ගීතයක් නිර්මාණය වෙනවා. මම දිගටම ගීත ලියන්නේ ප්‍රදීප් එක්ක විතරයි. අපි දෙන්නගේ අදහස් එක වගේ. මම සමහර ගීත ලියල ප්‍රදීප්ට එවනවා. ඒ වෙලාවෙම ප්‍රදීප් ඒකට ලස්සන තනුවකුත් දානවා. අමුතුම බචතඥදබ එකක් තියෙන්නෙ ප්‍රදීප්ට. ඒ වගේම එයාගේ තියෙන ඳභචතඪබර එකට මම කැමතියි. එහෙම යාළුවෝ හරි අඩුයි. ප්‍රදීප් දක්ෂ ගිටාර් වාදකයෙක්.
අපි දෙන්න සාකච්ඡා කරලා තමයි ගායක ගායිකාවෝ තෝරාගන්නෙත්.
ගායක ගායිකා තෝරාගැනීමේදී අප ඔවුන් ජනප්‍රියද නැද්ද කියලා බලන්නේ නැහැ. අපිට අවශ්‍ය නිර්මාණයට සාධාරණයක් කරන්න පුළුවන් අය.
“අපේ පළමු ගීත 16 එළිදැක්වීමේදී එයට සහභාගි වූ පිරිසට එය හොඳීන් තේරුම් යන්නට ඇති. දයාන් විතාරණ වැනි දක්ෂ ජනප්‍රිය ගායකයෙක් අතරේ ජනප්‍රිය නොවූ ගායක ගායිකාවන් ගීත ගායනා කළා. අපේ රටේ දක්ෂ යොවුන් ගායකයෙක් වූ දුමාල් වර්ණකුලසූරියත් මගේ එක් ගීතයක් ගායනා කරනවා. ඉදිරියටත් අපි නවකයින්ට මෙන්ම ජනප්‍රිය ගායක ගායිකාවන්වත් සහභාගී කරගන්නවා.
තාරක කළුබෝවිල නවක ගී පද රචකයෙක් වුවත් ඔහුගේ ගීත අර්ථවත්ය. හරවත්ය. රසබරය. එහෙත් තවමත් ඇතැම් ගීත එළිදක්වා නැත නුදුරේදීම එම ගී සියල්ල රසිකයින්ට අසන්නට ලැබේවි. තාරක අතින් තවමත් සිනමාවට හෝ ටෙලි නාට්‍යවලට ගීත ලියැවී නැත. ඒ පිළිබඳ ඔහුගේ අදහස් මෙසේ පළ කළේය.
“මම තවම ඒ ගැන හිතලා නැහැ. ඉල්ලීමක් තිබුණා මගේ ගීතයක් දෙන්න කියලා සිනමා නිර්මාණයකට. මම ඒ අවස්ථාවේ ඒ සඳහා කැමැත්ත දුන්නේ නැහැ. මගේ ඉලක්කය තියෙන්නේ මගේ ගීත ටික එළිදක්වන්න. ඒ වෙනුවෙන් ප්‍රසංගයක් පවත්වන්න. ප්‍රසංගය වෙනුවෙන් තමයි මේ දිනවල මහන්සි වෙන්නේ. එම ප්‍රසංගය නම් කරලා තියෙන්නේ “ආදරණීය ගී in concert” නමින්. ලබන අවුරුද්දේ පෙබරවාරි තමයි අපි ප්‍රසංගය පවත්වන්නේ. මගේ මිත්‍රයා ප්‍රදීප් හේෂාන් මට ඒ සඳහා දිරි දෙනවා. ඒ වගේම ලංකාවේ මෙන්ම පිටරටවල වල ජීවත්වෙන මගේ මිතුරු මිතුරියන්ද මට මේ සඳහා ශක්තිය ලබා දෙනවා.
මුලින්ම සඳහන් කළා වගේ මගේ ගීත 36 ජනතාව අතර ප්‍රචලිත කිරීම තමයි ආදරණීය ගී in concert තුළින් බලාපොරොත්තු වන්නේ. ඒවගේම මම ලියපු ගීතවල තියෙන්නේ මගේ ජීවිතයට සමීප අත්දැකීම් සහ තවත් කෙනෙක්ගෙන් මට අසන්නට, දකින්නට ලැබුන සිද්ධීන්. මට අවශ්‍ය මා ලද අත්දැකීම් ගීතය හරහා සමාජ ගත කරන්න.
මගේ ආදරණීය ගී in concertහි සංගීත නිර්මාණ කටයුතු කරන්නේ මාත් එක්ක සම්බන්ධ වෙලා ගී ලියන ප්‍රදීප් හේෂාන්මයි. අපි සංගීත භාණ්ඩ වැඩිපුර උපයෝගී කරගන්න උත්සාහ කරනවා. විශේෂයෙන් මවුත් ඕගනය සහ සැක්සෆෝනය. එම භාණ්ඩ උපයෝගී කරගත්තහම අමුතුම මිහිරක් තියෙනවා. මම ඒක අත්දැකලා තියෙනවා. ඉන්දියාවේ තැනුණු අතිශයින් ජනප්‍රිය වූ දොස්ති චිත්‍රපටයේ ගීත වලට මවුත් ඕගනය භාවිතා කරලා තියෙනවා. මම එම නිර්මාණත් අධ්‍යයනය කරලා තමයි ප්‍රදීපයේ නිර්මාණ කරන්න උපදෙස් දෙන්නේ.
තාරක කළුබෝවිල ඉතාමත් සුන්දර හදවතක් ඇති නිර්මාණකරුවෙක්. ඔහුගේ ජීවිතය කලාවයි. ගීත කලාවට යම් දෙයක් දායාද කිරීම ඔහුගේ අරමුණයි. එමෙන්ම ඔහු අපේ රටේ සිටින ප්‍රවීණ ගීත රචකයින්ට ගරු කරන කෙනෙක් සහ ඔවුන්ගේ නිර්මාණ අධ්‍යයනය කරන කෙනෙක්.
මම ඉස්සර ඉඳන් ප්‍රිය කරපු ගීත රචකයන් දෙදෙනෙක් තමයි ප්‍රේමකීර්ති ද අල්විස් මහත්මයා සහ කේ.ඩී.කේ. ධර්මවර්ධන මහතා. ඔවුන් ලියූ හැම ගීතයකම ගැබ්වෙලා තිබුණේ ඔවුන් අත්දැකපු සිද්ධීන් සහ ජීවිත අත්දැකීම්. මම අනුගමනය කරන්නෙත් ඔවුන්ගේ ගීත රචනා කලාව.
තාරක තම පළමු සරසවිය පිළිසඳර අවසන් කිරීමට මත්තෙන් මෙසේ තම අදහස් ප්‍රකාශ කළේය.
“මම මේ වනවිට ගීත රාශියක් ලියලා තියෙනවා. සමහරවිට නැවත ගීත ලියන්න හිතක් එයිද දන්නේ නැහැ.
අපි මේ ලෝකෙට එනකොට කිසි දෙයක් අරගෙන ආවේ නැහැ.
යනකොට කිසි දෙයක් අරගෙන යන්නෙත් නැහැ.
ඒත් අපි යම් නිර්මාණයක් කළොත් එය රසිකයින්ගේ මතකයේ රැඳේවි.
ඒ වගේම මගේ ගීත කවුරු නොඇහැව්වත් මැරෙනකම් මට මේ ගී අහන්න පුළුවන්.”
තාරක එසේ පවසද්දී ඔහු අතින් ලියැවුණු එක් විශේෂ වූ ගීතයක පදවැල් කිහිපයක් ඔබ හමුවේ තැබිය යුතුයි.
මා එන්නේ නැත
ඔබ රිදවන්නට
අපි වෙන් වුණ හින්දා
වෙනෙකෙකු හිතගෙන
ඉවත බැලුවද
නුඹ තාමත් මගේ
දරුවන්ගේ අම්මා
හදවත කොපමණ
ඉකිබිද හැඬුවද
ගිලිහුණු දෑ ආයේ
සතු නෑ
ආදර පුදසුන පරමල්
යහනකි
තුන් සිත තරහක්
නෑ
මේ ගීතය ඉතාමත් විශේෂයි ඔබටද හැඟේවි. තම පවුලෙන් වෙන් වී තව කෙකුගේ ආදරය පතා ගියත් නුඹ තවමත් මගේ දරුවන්ගේ අම්මා…
තාරක ඒ ගීයෙන් අදහස් කරන්නේ සමුගෙන ගිය බිරිඳක් ගැන.
ආදරේ එසේමයි.
තරහක් නැත යන්නයි.
මේ ගීතය ගායනා කරන්නේ ජනප්‍රිය ඡායාරූප ශිල්පී ගායක දයාන් විතාරණය. මේ ගීතය මේ වන විටත් රසිකයින්ගේ සිත් දිනා ගත් ගීතයකි.
තාරක කළුබෝවිල මේ උත්සාහ දරන්නේ ඔහු ලියූ ගී ජනතාව අතර ප්‍රචලිත කිරීමටයි.
ඒ වෙනුවෙන් ලබන පෙබරවාරි මාසයේදී පැවැත්වෙන ආදරණීය ගී in concert ප්‍රසංගයට ඔහු මේ දිනවල ලහි ලහියේ සූදානම් වන්නේය. විදෙස් රටක ජීවත් වන ඔහු වැන්නෙකු සිංහල ගීත රචනා කලාව පෝෂණය කිරීමට ගන්නා උත්සාහය අගය කළ යුතුයි.
තාරක කළුබෝවිල නම් නවක ගීත රචකයාණෙනි,
ඔබේ බලාපොරොත්තු මල්ඵල ගැන්වේවා !
සුන්දර ගීත සමුදායකයින් සමන්විත ආදරණීය ගී in concert සමඟින් අපි යළි හමුවෙමු.
අවසානයේ ඔහුගේ මුවින් පිට වූ ඔහුගේ අතින් ලියැවුණු ගීතයක පද පේළි කිහිපයක් ඔබ හමුවේ තබමින් තාරක කළුබෝවිල සරසවියට සම දුන්නේය.
හදවතින් බැඳුණු බොහෝ තැන්වල
අතැඟිලි නොබැඳුණේ ඇයි?
අතැඟිලි බැඳුණු බොහෝ සිත් වල
ආදරය නොදැනුණේ ඇයි?
නයනාංජලි දෙහිපිටිය