ගායනයෙන් රංගනයෙන් දස්කම් දැක්වූ ඔහු පසුගිය වසර දෙක තුනෙහි නිහඬතාවයකින් පසුවිය. යළිත් ඔහුගේ හඬ කරළියෙන් ඇසෙන්නට පටන්ගෙන ඇත. තව නොබෝ කලකින් ඔහුගේ රුව සිනමා තිරය මත මැවෙනු ඇත. ඔහු මීට වසර කිහිපයකට පෙර දඩබ්බරයෙකි. කතා කළේ සැමවිටම සෘජුවය. ඔහුව ඇතැම් දෙනා හැඳීන්වූයේ අහංකාර ගතිපැවතුම් ඇත්තෙක් ලෙසය. ඔහුගේම වචනයෙන් කියනවා නම් ඔහු තම පළමු ඉනිම ක්‍රීඩා කොට විරාමයකට ඉඩ දුන්නේය. ටික කලක් නිහඬව සිට යළිත් ඔහු දෙවෙනි ඉනිම සඳහා පැමිණෙන්නේ හාත්පසින්ම වෙනස් වූ චරිතයක් ලෙසය. වෙනස් චරිතයක් යනුවෙන් සඳහන් කළත් ඔහු වෙනස් වී ඇත්තේ රූපයෙන් නොවෙයි. ඔහු වෙතින් දිස්වූ කඩවසම් බව රූපස්වභාවය තවමත් පෙර සේමය. පෙර තිබූ දඩබ්බර දඟකාර ගතිය ඔහුගෙන් පලාගොස් ඇත. ගතිපැවතුමෙන්ද වෙනස් වී ඇත. කතාව සෞම්‍යය. මතු පිටින් ඔහු ගැන මැන බැලූ උදවියට ඔහු පිළිතුරු දීමට සූදානම්ය.
ඉතා නිහතමානී ලෙස මිත්‍රශීලීව ඔහු පසුගිය දිනෙක පත්තර මහ ගෙදරට පැමිණියේය.
ඔහු චිලී තිලංකය. තවමත් ඔහු තරුණියන්ගේ ආකර්ෂණයට ලක්වූ චරිතයකි. මෙතැන් සිට ඇරඹෙන්නේ ඔහුගේ දෙවෙනි ඉනිම පිළිබද තොරතුරුය.
නිහැඬියාවකින් පසුව ඔබ නැවතත් කලා කටයුතු පටන්ගෙන නේද?
ඔව්. පොඩි විරාමයක් ගත්තා. අවුරුදු තුනක් පමණ කලා කටයුතු වලින් ඈත් වුණා. පළමු ඉනිම සෙල්ලම් කරල ටිකක් විවේක අරගෙන දෙවෙනි ඉනිම සෙල්ලම් කරන කොට එය සාර්ථකයි. නැවතත් සුපුරුදු විදිහට ගායනය, රඟපෑම් කටයුතුවල නිරත වෙන්න ඕන කියල හිතුවා. ඒ නිසා ඉදිරියේදී මගේ හැකියාවන් නැවතත් ප්‍රේක්ෂකයන්ට, රසිකයන්ට දකින්නට අසන්නට ලැබෙයි.
අලුත්ම සිනමා නිර්මාණයකින් නුදුරේදීම ඔබව දැකගන්නට ලැබෙයි නේද?
ඉදිරියේදී තිරගත වීමට නියමිත ‘දේවි කුසුමාසන’ චිත්‍රපටයේ රඟපෑවා. එය ප්‍රවීණ සිනමා අධ්‍යක්ෂවරයෙක් වන ජයන්ත චන්ද්‍රසිරිගේ නිර්මාණයක්.
කෙසේද ඔබට ඒ අවස්ථාව ලැබුණේ ?
මීට අවුරුදු පහළොවකට කලින් මම ජයන්ත චන්ද්‍රසිරි මහතාගේ රංගන වැඩමුළුවකට සහභාගී වුණා. ඒ නිසා ඔහු මා ගැන දන්නවා. ඒත් නොහිතපු විදිහට ලැබුණු ආරාධනය මාව පුදුම කළා. ඔහුම තමයි මට කතා කළේ. මම සංගීත කටයුතු කරගෙන යන අතරතුර තමයි මට රඟපාන්න මේ අවස්ථාව ලැබුණේ. ජයන්ත චන්ද්‍රසිරි මහත්මයා මගෙන් ඇහුවා ඔහුගේ සිනමා නිර්මාණයට දායක වෙන්න කැමතිද කියලා. මම එසැණින් කැමත්ත දුන්නා.
ජයන්ත චන්ද්‍රසිරි වැනි අධ්‍යක්ෂවරයෙක්ගෙන් ආරාධනාවක් ලැබුණු විට ඔබට එය දැනුණේ කෙසේද?
එය මට පුදුමයක් වුණා. හිතපු නැති වෙලාවක එවැනි අවස්ථාවක් ලැබුණු නිසා. එදා රෑ මට නින්ද ගියේ නැහැ. ජයන්ත චන්ද්‍රසිරි මහතාමද කතාකළේ කියලා හිතුණා. එය කිසිසේත් බලාපොරොත්තු නොවූ දෙයක්. එය මට සතුටක් ගෙන දුන් ආරාධනාවක්. මම මීට පෙර චිත්‍රපට කිහිපයක රඟපාල තියෙනවා. එහෙත් එවැනි චරිතයක් ලැබෙයි කියලා බලාපොරොත්තුවක් තිබුණේ නැහැ.
දේවි කුසුමාසන චිත්‍රපටයේ ඔබේ භූමිකාව ගැන කතා කළොත්?
එය ඉතිහාස කතා තේමාවක් අනුව නිර්මාණය වූ චිත්‍රපටයක්. ලංකාවට පෘතුගීසීන් පැමිණි කාලයේ සිදුවූ කතා පුවතක්. මට එහි රඟපාන්න තිබුණේ පෘතුගීසි කැප්ටන් කෙනෙකුගේ චරිතයක්. එය චිත්‍රපටය පුරා දිවෙන චරිතයක්.
ඔබේ රංගනය ගැන ඔබට කුමක්ද හිතෙන්නේ?
මට ලැබුණු චරිතය මම හොඳීන් කළා. මම එයට සාධාරණයක් කළා කියා සිතනවා. මට ලැබුණ චරිතය වෙනුවෙන් මම කැපවෙලා වැඩ කළා. එයට සම්බන්ධ වූ පිරිසක් චිත්‍රපටය නරඹා තිබුණා. ඔවුන් මගේ රංගනය අගය කර තිබීම ගැන සතුටුයි. ඉදිරියේදී එය නැරැඹීමෙන් පසුව මගේ රඟපෑම් ගැන ප්‍රේක්ෂකයන්ට තිරණය කළ හැකියි. මම හිතනවා මම රඟපෑ චරිතය ඔවුන්ට දැනෙයි කියලා. සුබවාදී බලාපොරොත්තු තියාගෙන ඉන්නවා. චිත්‍රපටය තිරගත වෙනකල්. එය මගේ ජීවිත කාලය පුරාවටම ලැබුණ ඉත වටිනා අත්දැකීමක්. දේවි කුසුමාසන මගේ අටවන චිත්‍රපටය.
ඔබට ලැබෙන චරිත තෝරාබේරා ගැනීමකට ලක් කරනවාද?
අනිවාර්යයෙන් ඉදිරියේදී එසේ කරනවා. මගේ හැකියාවන් හොඳ නිර්මාණයකින් එළිදක්වන්න මම කැමැතියි. ලැබෙන සෑම චරිතයක්ම කරන්න මම කැමති නැහැ. හරසුන් දේ කරල ප්‍රේක්ෂකයන් හෙම්බත් කරන්න මම ආස නැහැ.
ඔබ නැවතත් සිනමාවට පා තැබූ නිසා වර්තමාන සිනමාව ඔබ දකින්නේ කෙසේද?
වර්තමානයේ අලුත් චිත්‍රපට නිතර නිතර රිලීස් වෙනවා. ඒ අතර හොඳ චිත්‍රපට තිබෙනවා. ඇතැම් චිත්‍රපට එළිදක්වනවා පමණයි. ඉන්පසු තිරගත වෙන්නේ නැහැ. එයට හේතුවක් තියෙනවා. හොඳ නිර්මාණ කළොත් ප්‍රේක්ෂකයන් ඒවා වැලඳ ගන්නවා. ඇතැම් චිත්‍රපට නැරැඹූ විට සිතෙනවා ඇයි එවැනි චිත්‍රපට හැදුවේ කියලා. ඒ වගේ නිර්මාණ කරපු අයටවත් තේරුම් ගන්න බැරුව ඇති ඔවුන් එවැනි නිර්මාණ කළේ ඇයි කියලා. අද සිටින ප්‍රේක්ෂකයා බලාපොරොත්තු වන්නෙත් ගැඹුරු හිතට වදින නිර්මාණ නරඹන්න. හරබර නිර්මාණ දකින්න ඔවුන්ගේ වැඩි කැමැත්තක් තියෙනවා. එසේ වෙන්නත් අවශ්‍ය නැහැ. සෑම වර්ගයකටම අයත් නිර්මාණ බිහිවෙන්න ඕන. කුමන වර්ගයෙන් නිර්මාණය කළත් එයින් ප්‍රේක්ෂකයන්ට නරඹා රසවිඳීය හැකි නිර්මාණයක් වෙනවා නම් හොඳයි. අධ්‍යක්ෂකවරයාත්, ප්‍රේක්ෂකයාත් දෙගොල්ලන්ම නම්‍යශීලී වෙනවානම් සිනමා ක්ෂේත්‍රය සාර්ථකයි.
පසුගිය කාලයේ සමාජ මාධ්‍යයේ ඔබ පළකළ ඇතැම් පෝස්ට්, වීඩියෝ නිසා ඔබට යහපත් මෙන්ම අයහපත් ප්‍රතිචාරත් ලැබුණා නේද?
ඔව්. මට ඒ නිසා විවිධ ප්‍රතිචාර ලැබුණා. මම ඉපදුණු පරිසරය අනුව තමයි මම හැඩගැසී තිබෙන්නේ. මම පාසැල් ගියේ කොළඹ රාජකීය විද්‍යාලයට. මට හමු වූ යාළුවොත් එක වගේ. අපේ සමාජ මට්ටමට ගැළපෙන අය. ලොකු කමකට කියනව නෙවෙයි අපි යම් සමාජ තලයක ජීවත් වන උදවිය. විශේෂ අහංකාර කමක් මගේ නැහැ. එහෙත් අපි හැසිරෙන, කතා විලාශය, අඳීන පලඳීන විදිහට පිටත ලෝකයට අපිව පේන්නේ වෙනස්ම විදිහට. සමාජ මාධ්‍යයන්ට මම යොමුකළ ඇතැම් දේ නිසා මට විවිධ ප්‍රතිචාර ලැබුණා. ඉන්පසුව මට වැටහී ගියා ඉන් තරමක් ඈත් වියයුතු බව.
කොවිඩ් කාලේ මම දුටුදෙයක් ගැන කියන්නම්. සමාජ මාධ්‍යයේ. එක්තරා ප්‍රසිද්ධ කාන්තා චරිතයක් කෑම හදල ඒව කන හැටි පවා සමාජ මාධ්‍යයෙන් පෙන්නුවා. ඒක දැකල මටත් මෙහෙම හිතුණා. මමත් එවැනි ක්‍රියා සමාජ මාධ්‍යයට මුදාහැරියා නේද කියලා. ඒත් පසුව මම තේරුම් ගත්තා එවැනි දෑ පළකිරීම සුදුසු නැති බව. බඩගින්නේ ඉන්න පිරිසක් ඉන්න පුළුවන්. ඒ අය ගැනත් අපි සිතන්නට ඕන. අද මට හිතෙනවා එවැනි දෑ පළකිරීම නුසුදුසුයි කියලා. මම දැන් පරිස්සම් වෙනවා සමාජ මාධ්‍යයට යමක් මුදා හැරීමේදී. සැම විටම සැළකිලිමත් වෙනවා ඒ ගැන.
ඔබ සැමවිටම කිවයුතු දේ ප්‍රසිද්ධියේ සෘජුවම කතා කරන කෙනෙක්. ඒ නිසා ඔබට අවාසියක් වෙලා නැද්ද?
ඇයි නැත්තේ. මම එසේ කතාකිරීම නිසා හානියක් වෙලා තියෙනවා. මම කලිනුත් කිව්වා වගේ දැන් මම කතා කරන්නේ ඉතා කල්පනාකාරීව. හිතලම කතා නොකර ඉන්න අවස්ථා තියෙනවා. ඉස්සර මම රූපවාහිනී වැඩසටහන් වලට සහභාගී වුණාම වැඩිපුර කතා කරනවා. දැන් එහෙම නැහැ. ඒ කාලේ මම රටේ කාලීන මාතෘකා අනුව කතා කළා. දැන් මම කතා කරන්නේ මට අදාළ දේ පමණයි. අනවශ්‍ය දේ කතා කරල අනෙක් අයගේ හිත රිද්දන්න කැමති නැහැ. නිකරුනේ මම බැනුම් අහන්නත් කැමති නැහැ.
කලා කටයුතු කරගෙන යාමේදී ඔබට බිරිඳගෙන් සීමා පැනවෙනවාද?
නැහැ. කොහෙත්ම නැහැ. ඇය මට මගේ කලා කටයුතු නිදහසේ කරගෙන යාමට ඉඩදීලා තිබෙනවා. මම මටම සීමා පනවා ගෙන තිබෙනවා. තව දුරටත් සින්දු කියමින් මල්ගස් වටේ දුවන චරිත නම් මම කරන්නේ නැහැ.
රංගනය පැත්තෙන් ඔබ බලාපොරොත්තුව වෙන දේවල් මොනවාද?
මම කලින් සඳහන් කළා වගේ මල්ගස් වටේ දුවන චරිත කරන්නේ නැහැ. මට කළහැකි හොඳ නිර්මණයකට දායක වෙන්න තමයි කැමැත්ත. එවැනි ච්ත්‍රපට වලට සම්බන්ධ වෙන්න දක්ෂ සිනමා නිර්මාණකරුවන් මුණ ගැසෙයි කියා බලාපොරොත්තුවෙන් ඉන්නවා. දේවි කුසුමාසන චිත්‍රපටයෙන් පසු තවත් චිත්‍රපටයකට සම්බන්ධ වෙන්න තවම අවස්ථාවක් ලැබුණේ නැහැ. මින් පෙර කළ චිත්‍රපට දෙකක් තිබෙනවා. එහෙත් ඒවා තාම තිරගත වුණේ නැහැ.
ඔබේ සංගීත කටයුතු ගැනත් කතා කරමු නේද?
ඔව්. මම නැවතත් සංගීත කටයුතු පටන් ගත්තා. මම සංගීත ක්ෂේත්‍රයට ඇවිත් අවුරුදු 18 ක්. එයින් අවුරුදු 15 ක් සක්‍රීයව වැඩ කළා. ඉන්පසු පොඩි විවේකයක් ගත්තා. දැන් නැවතත් සංගීතය පැත්තෙන් වැඩ කරන්න පටන් ගත්තා. දැන් ඉස්සර කාලෙට වඩා ප්‍රසංග ලැබෙනවා. නිතර සංගීත කටයුතු සමඟින් තමයි කාලය ගෙවෙන්නේ.
ගායනය පැත්තෙන් කෙරෙන අලුත් නිර්මාණ කටයුතු මොනවාද?
අලුත් ගීත කිහිපයක් නිර්මාණය කරමින් ඉන්නේ. දැනට ගීත විස්සක් පමණ එළිදක්වා තිබෙනවා. හතළිහක් පමණ නිර්මාණය කර තිබෙනවා. ඒවායින් සමහර ගීත යූ ටියුබ් එකටවත් දාල නැහැ. මට හිතට දැනෙන ගීත පමණයි මා එළිදක්වන්නේ.
ඔබේ ඉදිරි බලාපොරොත්තු මොනවාද?
මගේ ගීත සියල්ල එකතු කරල ඒක පුද්ගල ගී ප්‍රසංගයක් කරන්න ආසාවෙන් ඉන්නවා. එය මේ වසරේ කෙසේ හෝ කිරීමට බලාපොරොත්තුවක් තියෙනවා. මේ දිනවල එය සැලසුම් කරමින් ඉන්නේ.
ඔබ දැන් පියෙක්. පුතා සහ දියණිය ගැනත් කතා කරමුද?
දරුවන් නිසා අපි සතුටින් කාලය ගත කරනවා. ඒ දෙන්නා තවම පුංචියි. පුතාගේ නම ලිතිල් ලියෝන් වෙළදගොඩ පතිරණ. දුව ජොර්ජියා ලිවේනා වෙළඳගොඩපතිරණ. ඔවුන් සමඟ ගෙවන ජීවිතය සුන්දරයි. ඒ දෙන්නාට තවම ලොකුවට දෙයක් තේරුම් ගන්න අමාරුයි. තාත්තා සින්දු කියන බව නම් දන්නවා. කවදා හෝ ඔවුන් කලාව තෝරාගනියිද කියල දැන්ම තීරණය කරන්න බැහැ. කොහොම වුණත් ඔවුන් දෙදෙනාට හොඳීන් අධ්‍යාපනය ලබා දීලා සමාජයේ යහපත් පුරවැසියන් කිරීම තමයි බි‍රිඳගේත් මගේත් එකම අරමුණ.
සේයාරූ – නිශ්ශංක විජේරත්න
නයනාංජලි දෙහිපිටිය