කුඩා අවධියේ සිටම ඇය නර්තනයට ඇලුම් කළාය. නර්තන ගුරුවරියක වීම ඇගේ එකම සිහිනය විය. අද ද එකී සිහිනය ඈ කෙරෙන් දුරස්ව ගොස් නැත. නවක රංගන ශිල්පිනියක ලෙසද අද වනවිට ඇය අප හමුවට එන්නීය…නිවේදනයට ද දස්කම් දක්වන ඇය, රංගනයේ යෙදුණ ද නර්තනය අදටත් ඇඟ පුරාම දිවයයි. එමතු ද නොව ලේඛනයට ද හපන්කම් දක්වන ඇය අයෝධ්‍යා සෙව්වන්දියි….හිරු රූපවාහිනී නාළිකාවේ විකාශය වන “ඇගේ කතාව “‘ටෙලිනාට්‍ය මාලාවෙන් අයෝධ්‍යා මෙරට ප්‍රේක්ෂක සිත් ඇදබැඳතබාගැනීමට සමත් වූවාය. සිය කලාදිවිය පිළිබඳ සරසවිය හා ඇය කියූ “ඇගේ කතාව”ට අපි සවන් දෙමු…
නර්තනයට කුඩා කල ඉඳන්ම විශේෂ ආසාවක් තිබුණා නේද…?
අම්මෝ ඔව්. මම මොන්ටිසෝරි යන කාලයේ ඉඳන්ම ඩාන්සින්වලට ආසයි. ඒ කාලයේ ඉඳන්ම ඩාන්සින් කළා. ඒවගේම මොන්ටිසෝරි කාලයේදීත් 01-02 වසරවල ඉගෙනගනිද්දිත් නැටුම් තරගවලට ඉදිරිපත් වී තිබෙනවා. ලොකුවට කලාවට එන්න අදහසක් තිබුණේ නැහැ. මට ඕනවෙලා තිබ්බේ නැටුම් ගුරුවරියක් වෙන්න. මම 09 වසරේ ඉද්දි නැටුම් කරද්දි මාව ඒ වේදිකාව උඩ ඉඳන් පල්ලෙහාට වැටෙනවා. එතැනදී මගේ කකුල ඩැමේජ් වෙලා මට නැටුම් නවත්වන්න වෙනවා. එහෙම ටික කාලයක් ඉද්දි මගේ ඥාති අයියා කෙනෙක්ගේ වෙඩින් එකක ඩාන්ස් කරන්න වුණා. එතැනින් පස්සෙ කොහොමහරි මම ඩාන්ස් කරනවාමයි කියන අදහස සිතට ගත්තා. ඊටපස්සේ මම වේදිකාවල සහ ප්‍රසංගවල නර්තනයට යොමුවුණේ ලලිත් පැරකුම් සර් නිසයි. මට සර්ව හමුවෙන්නේ කොරියන් ප්‍රසංගයකදී. ගෙදර නිදහසේ ඉද්දි මම අදටත් පැයක් විතර නර්තනයට අදාළ අභ්‍යාසවල නිරතවෙනවා. නැතත් ඒ දේ ඉබේට හෝ සිදුවෙනවා.
රංගනයට මුලින්ම අවස්ථාව ලැබුණු ආකාරය කීවොත්….?
මුලින්ම වේදිකා නාට්‍යයකට සම්බන්ධ වෙන්න ලැබුණේ. රාජ්‍ය නාට්‍ය උළෙලට ඉදිරිපත් කරන වේදිකා නාට්‍යයක් ඒක. රඹුක්කන ප්‍රදේශයේ සිටින ලාල් සර්ගේ නාට්‍යයක්. එහි මට ප්‍රධාන චරිතය ලැබුණේ. කොහොමහරි ඒ සර්ගේ වේදිකා නාට්‍යයට සම්බන්ධ වුණා. එතැනින් තමයි වේදිකා නාට්‍යවලට එකතුවෙන්නේ. මේක තමයි රංගනය පැත්තෙන් මගේ පළමු රංගනය. මට ඇත්තෙන්ම ඇක්ටින් උණක් තිබ්බේ නැහැ. ඩාන්සින් උණක් තිබ්බේ. කුඩා කාලයේ ගොඩක් අය මට කිව්වා “ඔයා රඟපාන්න, ඔයාට ඒ පැත්තෙන් හොඳ අනාගතයක් තියෙනවා “කියලා. පසුව මගේ නංගි තමයි මාව බලෙන්ම ඇදගෙන ගියේ “දෙවෙනි ඉනිම” ටෙලිනාට්‍යයට. එහි සාමූහික දර්ශනයකට හිටියේ… ඒ අවස්ථාවත් එක්ක ටිකෙන්ටික වැඩ එන්න ගත්තා. වෙළෙඳ දැන්වීම්වල පෙනීසිටින්නත් අවස්ථාව ලැබුණා .
මොඩ්ලින්වලටත් යොමුවුණා නේද…..?
ඔව්, “Miss Green Beauty” සඳහා අවස්ථාව ආවා. දමිත් අංජු සර් තමයි ඒක කරන්නේ. ඒකටත් මම බැහැ කියද්දි නංගි තමයි මාව ඇදගෙන ගියේ. එතැනදි ඔඩිෂන් එකේදිත් 1st Place හම්බවුණා. ඉන්පසු මොඩ්ලින් අංශයටත් එක් වුණා. ෆොටෝ ෂූට්ස්වලටත් අවස්ථාව එනවා. Bridal, Casual තමයි ගොඩක්ම කරන්නේ. ඇත්තෙන්ම මොඩ්ලින්වලටත් මගේ ලොකුවට ආසාවක් තිබ්බේ නැහැ. මොඩ්ලින්වලදි රෑම් කළාට පස්සේ පොඩි කැමැත්තක් ඇතිවුණා මොඩ්ලින්වලටත්. දමිත් අංජු සර් මට කතාකළා Out Of Srilanka එහෙම තියෙනවා, අපි ඒවට සම්බන්ධ වෙලා වැඩ කරමු, ඔයාට හොඳ ගමනක්‍ යන්න පුළුවන් කියලා. තවමත් සර් යටතේ මොඩ්ලින් ඉගෙනගන්නවා…
චිත්‍රපටවලටත් රංගනයෙන් එක්වුණා නේද….?
අලුත් චිත්‍රපටයක ගැමි චරිතයකට ආරාධනා කර තිබෙනවා. ඒක අධ්‍යක්ෂණය කරන්නේ සනත් අබේසේකර මහතා. මෙයට පාදක වෙන්නේ 1400 ගණන්වලට අයත් ඉතිහාසගත කතාවක්. මහනුවර, ඇම්බැක්කේ ආශ්‍රිතව රූගතකිරීම් සිදුවෙන්නේ. එහි රූගතකිරීම් කරද්දි මට හමුවුණු අනුෂා දමයන්ති මිස් හරිම නිහතමානී කෙනෙක්. අපි අලුත් අය කියලා එහෙම වෙනසක් කරන්නේ නැහැ. ඇගෙන් අපට බොහෝ දේ ඉගෙනගන්න පුළුවන්
ඩාන්සින්වලදී ලැබූ ජයග්‍රහණ මොනවද….?
නර්තන අංශයෙන් මට සහතිකනම් බොහෝ ලැබී තියෙනවා. මම කොරියන් තරගාවලියකට ගියානේ. ඒක මම ජයග්‍රහණය කළා. ඩාන්සින් තරග රැසක්ම මම ජයග්‍රහණය කර තිබෙනවා
ඩාන්සින්වලින් ඔබේම යම් නිර්මාණාත්මක දෙයක් කරන්න අදහසක් නැද්ද …..?
කුඩා කාලයේ ඉඳන්ම මගේ සිහිනය වුණේ ඩාන්සින් ටීචර් කෙනෙක් වීමයි. මම තවමත් ලලිත් පැරකුම් සර්ගෙන්, අවිෂ්ක සර්ගෙන් ඩාන්සින් ඉගෙනගන්නවා. මම සිතාගෙන ඉන්නවා මමයි මගේ බාප්පාගේ දුව ඒ නංගියි අපි දෙන්නා එකතුවෙලා කුඩාවට Entertainment එකක් ආරම්භ කරලා ඒක දියුණු කරගෙන යාමට. ලබන දෙසැම්බර් මාසය වෙද්දි මේ වැඩේ පටන්ගන්න හිතාගෙන ඉන්නවා
කලා ලොවේදී සිදුවූ අමතක නොවන මිහිරි මතකත් ඇති…..?
මොඩ්ලින් අංශයෙන් අමතක කරන්න බැරි මිහිරිම සිදුවීම තමයි මගේ පෙම්වතාව මට මුණගැසීම. එයත් මොඩ්ලින් කරන කෙනෙක්. පැජන්ට් එකකදී තමයි මට ඔහු හමුවුණේ. මම ආදරය කියන දේ ගැන නොහිතපු කෙනෙක්. කුඩා කාලයේ සිටම මම විවාහ විය යුතුයි යන මතයේ හිටියේ නැහැ. ඒත් මගේ පෙම්වතා මගේ ඒ අදහස් බොහෝ දේවල් වෙනස් කරන්න සමත්වුණු කෙනෙක්…
ඔබව පුංචිතිරයේ බොහෝදෙනා හඳුනන්නේ “ඇගේ කතාව” ටෙලිනාට්‍ය මාලාවෙන්. කොහොමද ඒකට සම්බන්ධ වෙන්නේ….?
මට මුලින්ම “ඇගේ කතාව”ට ආරාධනාවක් ආවා සපෝටින් රෝල් එකකට. මම ඒකට කැමැති වුණත් ඒ අවස්ථාව මඟහැරෙනවා. ආයෙත් දවසක කතා කළා ඇගේ කතාවේම ප්‍රධාන චරිතයට. ඒ වෙද්දී මම ප්‍රධාන චරිතයක් කර තිබුණේම නැහැ. ඇගේ කතාවෙන් තමයි මම ප්‍රධාන චරිතයකට යොමුවෙන්නේ. වේදිකා නාට්‍යයක ප්‍රධාන චරිතය කළාට ටෙලි-සිනමා කැමරාවක් ඉදිරියේ ප්‍රධාන චරිතයක් කරලම තිබුණේ නැහැ. මම ඇගේ කතාවේ ප්‍රධාන චරිතයට කැමැති වුණා. මමත් හරි කැමැතියි අභියෝග භාරගන්න. ඉන්පසු ඇගේ කතාවේ අධ්‍යක්ෂ ලසිත සමරතුංග අයියා මට කතා කරලා ඇහුවා ‘ඔයා කලින් රඟපාලා තියෙනවද” කියලා. වෙළෙඳ දැන්වීම්වල රඟපෑ බව මම කිව්වා….ලසිත අයියා ඇහුවා “එහෙනම් මම ද ඔයාට මුලින්ම ප්‍රධාන චරිතයකට කතා කරන්නේ” කියලා. ඇත්තෙන්ම ඇගේ කතාවෙන් තමයි රූපවාහිනී ප්‍රේක්ෂකයා මාව හඳුනාගන්නේ.
ඇගේ කතාවේ රංගන මතකය අවදි කළොත් …?
ඔව්, පළවැනි දවසේ රූගතකිරීම්වලට යද්දි මට පොඩි තැතිගැන්මක් ආවා මට මේක කරගන්න පුළුවන් වේවිද කියලත්. රූගතකිරීමේදී හොඳට හුරුපුරුදු කෙනෙක් වගේ මම චරිතය ඇතුළට ගිහින් රංගනය කියන දේ හොඳීන් කළා කියලා මට හිතෙනවා. ඔයා වේදිකා නාට්‍ය කරලා තියෙනවනම් ඔයාට අනිවාර්යයෙන් බැරිවෙන්න විදිහක් නැහැ කියලා ලසිත අයියා මාව දිරිමත් කළා. සමහර අවස්ථාවල අධ්‍යක්ෂ ලසිත අයියා මට දෙබස් දුන්නේ නැහැ, ඔයාට හිතෙන දෙබස ඒ අවස්ථාවට අනුව කියන්න කියලා ඒ නිදහසත් මට දුන්නා. රූගතකිරීම් අවසානයේ ලසිත අයියා මට කිව්වා එයා හිතුවට වඩා හොඳීන් මම ඇක්ට් කළා කියලා. අලුත් කෙනෙක් කියලා හිතන්න අමාරු මට්ටමටම මගේ රංගනය තිබෙනවා කියලත් ඔහු කිව්වා. මේකේ ඔයානම් පුරුදුකාරියක් වගේ අඬනවා කියලත් කිව්වා.
ලියන්නත් ඔබ දක්ෂයි නේද……?
මම “අහස්නා” නමින් කතාවක් දැන් ලියාගෙන යනවා. ඒ කතාව මම මුහුණු පොතේ කොටස් වශයෙන් පළකරනවා. ඒකට හොඳ ජ්චද ඡචඵඥ එකක් තියෙනවා. මෙය නවකතාවක් විදිහට ප්‍රකාශනයට පත්කරන්න සිතාගෙන ඉන්නේ.
“අහස්නා”ට තේමා වුණේ ඔබේ කතාව ද…?
ඒකට ඔව් කියන්නත් පුළුවන්, නැහැ කියන්නෙත් පුළුවන්.
“සිංගාරම”නම් ඔබ රංගනයෙන් දායක වූ යූටියුබ් චිත්‍රපටයේ පූර්ව ප්‍රචාරක පටයට විශාල ප්‍රේක්ෂක ආකර්ෂණයක් තිබෙනවා?
ඒ පූර්ව ප්‍රචාරක පටය දැනට ඉතා ජනප්‍රිය වී තිබෙනවා. පසුගිය දෙසැම්බර් අග මහව ප්‍රදේශයේ මෙහි රූගතකිරීම් කළේ. සැඟවී ගිය නිදන් පිළිබඳ ලස්සන කතාවක්.
වැඩකරන්න කැමැති විශේෂ අධ්‍යක්ෂවරයෙක් ඉන්නවද….?
මම අධ්‍යයනය කරන කෙනෙක් තමයි මේඝ සූරියආරච්චි. එයා කරන නවතම නිර්මාණ, අධ්‍යක්ෂණ කාර්යයන්වලට මම හරිම කැමැතියි.ඔහු රංගනයෙන් දායක වූ “මන්දාරා” චිත්‍රපටය, “නන්නත්තාර” ටෙලිනාට්‍යය එහෙම මම නරඹා තියෙනවා. මම කැමැතියි ඔහුගෙන් අධ්‍යක්ෂණය පිළිබඳ ඉගෙනගන්න. ඔහුගේ තිර රචනාවලට පවා මම හරිම කැමැතියි. ඒවා හරවත් දේවල් කියා සිතනවා. ඒවගේම ලසිත අයියාගේ නිර්මාණයකට කතා කළොත් අනිවාර්යයෙන් සහභාගි වෙනවා.
ඔයා රැකියාවක් කරනවද..?
මම කලින් පෙර පාසල් ගුරුවරියක් ලෙස සේවය කළා. ප්‍රාථමික අධ්‍යාපනය සම්බන්ධව මහනුවර විවෘත විශ්වවිද්‍යාලයේ උපාධියක් හදාරමින් ඉන්නේ. නැටුම් ගුරුවරියක්වීමේ ආසාව කුඩා කාලයේ ඉඳන්ම තිබ්බා. මම ඉගෙනගත්ත දේ තව කෙනකුට දෙන්න මම හරිම ආසයි. වෘත්තියමය වශයෙන් ලංකාවේ ඉන්න මගේ බලාපොරොත්තුවක් නැහැ. කොරියන්වලට දාලා තියෙනවා, එහි පෙර පාසල් ගුරුවරියක් ලෙස සේවය කරන්න.. මම ඒ සඳහා අධ්‍යයන කටයුතු කරන ගමන් තමයි ඉන්නේ…..ඒ කොහේ ගියත් කලාව නම් අතහරින්නේ නැහැ.
මනෝජ් රුක්මල් කුමාරසිංහ