සත් සමුදුරෙන් එහා සිටියද තම මව්බිම අමතක කළ නොහැකිය. මහා සාගරයෙන් වටවූ මේ පුංචි දූපතෙන් එතෙරට පියඹා ගියද ඔහුගේ සිත නතර වූයේ මේ පුංචි රටේය. ලෝකයේ ධනවත් සහ බලවත් රටක ජීවත් වුවත් තමා උපන් රට ඔහුට සුරපුරයකි. ඔහු තම සංගීත දිවිය අරඹන්නේ මේ ලක්මව තුරුළේදීය. ඔහු ගායකයෙකි. ගීත රචකයෙකි. කෙටි නිවාඩුවක් ලද සැණින් තම මව් රටට පියඹා ඒම ඔහුගේ සිරිතය. එතෙර සිටියත් සිංහල සංගීතයට , සිංහල ගීතයට ඇලුම් කරන ඔහු චම්පික ලොකුහේවාය. ඉතාමත් සුහද ලීලාවෙන් ඔහු තම නවතම තොරතුරු මෙසේ සරසවිය සමඟින් බෙදාහදා ගත්තේය.
මම ලංකාවෙන් පිටවුණේ 1993 දී. මගේ විවාහය සිදුවීම නිසා මගේ බිරිඳ ජීවත් වී සිටින ඇමරිකා එක්සත් ජනපදයට ගියා. මම මුලින්ම සංගීතයට යොමුවුණේ පාසල් යන කාලයේදීමයි. මගේ ගම මාතර. මම පාසල් විෂයයන් ලෙස සංගීතය ඉගෙන ගත්තා. මම ඉගෙන ගෙන ඉවර වුණාට පසුව තමයි මගේ තාත්තා මට ගිටාරයක් අරගෙන දුන්නේ. ඒ කාලේ මාතර සුපර් බ්‍රේක් වෝටර් නමින් සංගීත කණ්ඩායමක් තිබුණා. එහි නායකයා ලෙස සිටි සමන්ත කණ්ඩම්බිගෙන් මම ගිටාර් වාදනය ඉගෙන ගත්තා. එහි සිටි තවත් සාමාජිකයෙක් වන ඕෂධි ජයවික්‍රමත් මට සහය දුන්නා. අපි ඔක්කොම හොඳ යාළුවෝ. මට ඒ කාලේ ගීතයක් කරන්න ලොකු ආශාවක් තිබුණා. එහෙත් උසස් පෙළ විභාගයට සූදානම් වෙන්න අවශ්‍ය නිසා ඒ අදහස අත්හැරියා. මට මේ අවස්ථාවේ අපූරු සිද්ධියක් මතක් වුණා. පාසල් කාලයේ ඉංග්‍රීසි විෂය ඉගෙන ගන්න මමත් මගේ මිතුරෙක් සමඟ මාතර ශාන්ත මේරි පාසලට ගියා. සවස් වරුවේ තමයි පන්ති තිබුණේ. එහි සිටියා සිස්ටර් කෙනෙක් සිස්ටර් පීටර් කියලා. දවස් මම යනකොට දැක්කා කාර්‍යාල කාමරයේ බොක්ස් ගිටාර් එකක් තියෙනවා. මා ඒ පිළිබඳ විමසුවා. ඇය ඒ ගිටාරය මට දුන්නා . කැමති නම් අරගෙන යන්න කියලා. මට පුදුමාකාර සතුටක් දැනුණා. මම ගෙදර ගිහින් ගිටාරය වාදනය කරන්න පටන් ගත්තා. එය ඇසුන ගමන් තාත්තා ඇවිත් ඇහුවා ගිටාරය ගැන විස්තර. මම සියල්ල ඔහුට පැවසුවා. තාත්තා ඒ වෙලාවේම මාව එක්කගෙන සිස්ටර් පීටර් මුණගැසෙන්න ගියා. මම උසස් පෙළ කරන නිසා ගිටාර් වාදනය කරන්න දෙන්න බෑ කියලා තාත්තා කිව්වා. ඒ සිදුවීම මට තාමත් මතකයි. උසස් පෙළ සමත් වුණාට පසුව මම බිස්නස් මැනේජ්මන්ට් ඩිප්ලෝමා එකක් කළා. ඉන්පසු තමයි මම විවාහ වෙලා ඇමරිකාවට පදිංචියට ගියේ.
ලංකාවෙන් පිට වුවත් මම සංගීතය අත් හැරියේ නැහැ. එහි සිටින සංගීතය කරන ශ්‍රී ලාංකිකයන් සමඟ එකතු වෙලා අපි බ්‍රෑන්ඩ් එකක් හදාගත්තා. ශ්‍රී ලංකාවේ සිටින ජනප්‍රිය ගායක ගායිකාවන් අපි ඇමරිකාවට ගෙන්නල සංගීත ප්‍රසංග පැවැත්වුවා. ඒවා අති සාර්ථකය වුණා. එකල ජනප්‍රිය ප්‍රසංගයක් වූ උදුම්බරා ප්‍රසංගය අපි ඇමරිකාවේ පැවැත්වූවා. කීර්ති පැස්කුවල්, ක්ලැරන්ස් විජේවර්ධන, පුන්සිරි සොයිසා, ඉන්ද්‍රානි පෙරේරා වැනි ජනප්‍රිය ගායක ගායිකාවන් ගෙන්වා ගෙන ප්‍රසංග පැවැත්වූවා. ඒ වගේම ශ්‍රී ලාංකික රංගන ශිල්පීන් වන නිළි රැජින මාලිනී ෆොන්සේකා, ප්‍රවීණ නිළි ශ්‍රියානි අමරසේන, බන්දු සමරසිංහ වැනි කලාකරුවන් විශේෂ උත්සව සඳහා අපි ගෙන්වා ගත්තා.
මම ගායනය වගේම ගීත ලිවීමේ කලාවටත් යොමු වෙලා ඉන්නවා. මම ගායනා කරන ගීත අහන්න ඇමරිකාවේ පදිංචි වී සිටින ශ්‍රී ලාංකිකයන් ප්‍රිය කරනවා. ඒ අය අතර මම ගායනා කරන ගීත ජනප්‍රිය වෙලා තියෙනවා. අම්මා ගැන මම ගායනා කරන ගීතය මගේ රසිකයන් අතර ජනප්‍රියයි. එම ගීතය ලිව්වේ මගේ මාමා කෙනෙක්. ගීතය සංගීතවත් කළේ ලංකාවේ ඉන්න රොෂාන් ද සිල්වා. ඔහු මගේ හිතවතෙක්. අපි දෙන්නා රටවල් දෙකක සිටින නිසා මම හඬ පටිගත කරල ඔහුට එව්වා. රොෂාන් මෙහිදී එයට සංගීතය මුසු කර අපූරු ගීතයක් නිර්මාණය කළා. මම ගීත හයක් නිර්මාණය කර තිබෙනවා. ඉන් දෙකක් පටිගත කළා. මම ගීත ලියන්නේ මනස සැහැල්ලු කර ගන්න. මගේ තාත්තා ජීවිතයෙන් සමුගත්තා. ඒ වෙනුවෙන් දෙන දානය සඳහා අවශ්‍ය මාළු ගන්න මම මගේ බාල සහෝදරයාත් සමඟ දෙවුන්දර වැල්ලට ගියා මල්ලි එක්ක. ඔහු ඒ වැඩකටයුතු අවසන් කරගෙන පැමිණෙන තුරු මම මුහුද දිහා බලාගෙන සිටියා. එවිට මට අපූරු අදහසක් ආවා ගීතයක් ලියන්න. ඒත් මට කොළයක් තිබුණේ නැහැ වචන ගළපා ලියන්න. වාහනේ ඇතුළ බලන විට තාත්තා වෙනුවෙන් මුද්‍රණය කළ මරණ දැන්වීමක් හම්බ වුණා. මම ඒ කොලේ ඉඩ තිබෙන තැන්වල මට ආපු අදහස ගීතයක් බවට පෙරලුවා.
දියඹේ ඇදෙනවා
ඔරුවක් පායනවා
ඈත සිටින අඹුදරුවන්
මට සිහි වෙනවා
මෙම ගීතය රචනා වුණේ ඒ විදිහට. මට මගේ හිතවතුන් බොහෝමයක් ගීත ලියා දෙනවා. ලස්සන ශ්‍රී ලංකා කියන ගීතයත් මම ගායනා කරන කවුරුත් ආස ගීතයක්. එහි පද රචනය ජෝසප් විසිදාගමගේ. ජනප්‍රිය ගීත රචක හේමසිරි හල්පිට මා වෙනුවෙන් කාලයකට පෙර ලියූ ගීතයක් මෙවර මා ලංකාවට ආ පසු පටිගත කළා. මම ලංකාවට ආ පසු මහින්ද බණ්ඩාර අයියාව මුණ ගැසෙන්න ගියා. ඔහු තමයි මට ක්‍රිස්ටිනාව හඳුන්වා දුන්නේ. ක්‍රිස්ටිනාව මා හඳුනාගෙන තිබුණේ යූ ටියුබ් එකෙන්. මහින්ද අයියා ඇයව හඳුන්වා දුන් පසුවයි මා දැන ගත්තේ ක්‍රිස්ටිනා ඔහුගේ ලේලිය බව. මහින්ද අයියාගේ පුතා තිසර බණ්ඩාරත් මට හොඳ සහයෝගයක් දුන්නා එම ගීතය වෙනුවෙන්. එය යුග ගීතයක්. ක්‍රිස්ටිනා සමඟයි මම ඒ ගීතය ගායනා කරන්නේ. එය ආදර ගීතයක්.
ඇමරිකාවේ සිටින සුදු ජාතිකයන් මගේ ගීත අහනවා. එහෙත් ඔවුන්ට ගීත තේරුම් ගන්න බෑ. නමුත් ඔවුන් අපේ සංගීතය ඉතා හොඳීන් රස විඳීනවා. මහින්ද බණ්ඩාර අයියා සංගීතවත් කළ ගීතයක් මම එහේ ස්ටූඩියෝ එකක පටිගත කළා. එහි සේවය කරන කොඳෙව් ජාතිකයෙක් ඒ ගීතය අහන්න ඉල්ලුවා. ඔහු එය තුන් වතාවක් ඇහුවා. ඔහු පුදුමයට පත්වුණා මහින්ද අයියාගේ හැකියාව ගැන. ඔහු මහින්ද අයියාගේ දක්ෂතාවය ඉහළින් වර්ණනා කළා. විදේශිකයෙක් අපේ රටේ වාදකයෙක්ව වර්ණනා කළ සැටි අහගෙන හිටපු මගේ හිතට ලොකු ආඩම්බරයක් දැනුණා. මට බොහෝ දෙනෙක් ගීත ලියා දෙන බව මා ඉහතදීත් සඳහන් කළා. මාතර සංගීත කණ්ඩායමේ හිටපු මොහොමඩ් රම්ස් කියන මගේ හිතවතාත් මට ගී ලියා දී තිබෙනවා. ඒ ගීතය නම් බයිලා රිද්මයක් යොදන්න පුළුවන් ගීතයක්. මට මාධ්‍යයෙනුත් සහය ලැබෙනවා. පෞද්ගලික රූපවාහිනී නාලිකාවල මා වෙනුවෙන් වැඩසටහන් කරල තියෙනවා. මම ගායන සහ ගීත රචනා කලාවට අමතරව ඇමරිකාවේ රැකියාවක නිරත වෙලා සිටිනවා. රැකියාව නිම වී නිවසට ආ පසු මම මගේ සංගීත වැඩකටයුතු වල නිරත වෙනවා. මගේ සංගීත කටයුතු සඳහා මගේම ස්ටූඩියෝ එකක් තියෙනවා. සති අන්තයේ දින දෙකක් නිවාඩු ලැබෙන නිසා විවේකය තිබෙන සෑම මොහොතකම සංගීතයත් සමඟ තමයි මම ජීවත් වෙන්නේ. මම එහිදී උත්සව අවස්ථාවලදී ගීත ගායනය සඳහා සම්බන්ධ වෙනවා. වර්තමානයේ බොහෝ දෙනෙක් සාද සහ විශේෂ උත්සව අවස්ථා සඳහා සංගීත කණ්ඩායම් යොදා ගන්නේ නැහැ. වියදම් අධික නිසා. ඒ නිසා මා තනිවමත් ගීත ගායනා කිරීමට සම්බන්ධ වෙනවා. එහිදී මගේ ගීත වගේම ප්‍රවීණයන්ගේ ගීතත් මා ගායනා කරනවා. ඒ අතරින් මම කැමැත්තෙන් ගායනා කරන්නේ ප්‍රවීණයන්ගේ ගීත. අපේ රටේ ජනප්‍රිය දක්ෂ ගායකයෙක් වන රූකාන්ත ගුණතිලකත් කාලයක් ඇමරිකාවේ ජීවත් වුණා. මම ඔවුන් සමඟ ඉතා සමීපයි. අපි ඇමරිකාවේදී නිතර හමුවුණා. මම බලාපොරොත්තුවෙන් ඉන්නවා ඔහු වෙනුවෙන් ගීතයක් රචනා කරන්න.
ලංකාවේ දැන් දක්ෂ තරුණ පිරිසක් සිටිනවා. සංගීත ක්ෂේත්‍රයේ. අපේ කාලයට වඩා ඔවුන්ට පහසුකම් තියෙනවා ගීත නිර්මාණය කරන්න. සංගීත ලෝකයේ පෙරළියක් ඇතිවෙලා කිව්වොත් නිවැරදියි. සංගීත කණ්ඩායම් බොහෝමයක් තියෙනවා. අලුත් දෙයක් කරමින් ඉදිරියට යාම පිළිබඳ සතුටුයි.
මම ලංකාවට පැමිණියේ කෙටි නිවාඩුවක් සඳහා. ඒ ආ කාලය තුළ සංගීත කටයුතු කිහිපයක් කළා. ලංකාවේ සිටි කාලය සතුටින් ගෙවුණා. පවුලේ උදවිය සමඟ කාලය ගත කළේ හරිම සතුටින්. මට අක්කලා දෙදෙනෙක් අයියලා දෙදෙනෙක් සහ මල්ලී කෙනෙක් ඉන්නවා. පොඩි අයියා ගායනයට දක්ෂයි. මල්ලී ඉස්සර රඟපෑවා. පසුව ඔහු ටෙලි නාට්‍ය නිෂ්පාදකයෙක් විදිහට වැඩ කළා. මගේ බිරිඳ සහ දියණිය ඉන්නෙත් ඇමරිකාවේ දුව නම් ගීත ගායනය කරන්නේ නැහැ. ඇය දක්ෂ නර්තන ශිල්පිනියක්. උඩරට සහ පහතරට නර්තනය් ඇයට හොඳීන් පුළුවන්. විශේෂ උත්සව අවස්ථාවලදී ඇය නර්තනයෙන් දායක වෙනවා. මගේ බිරිඳ දේවිකා ලොකුහේවා. දියණිය මේධනී ලොකුහේවා.
නැවතත් ලංකාවට පැමිණීමේ බලාපොරොත්තුවෙන් තමයි ලංකාවෙන් සමුගන්නේ. තවත් ගීත කිහිපයක් නිර්මාණය කරන්න බලාපොරොත්තු වෙනවා. පටිගත කර අවසන් වූ ගීත සඳහා රූප රචනය කරන්න අදහසක් තියෙනවා. ලෝකයේ කොහේ සිටියත් මම ඉපදුණ රටට මට පුළුවන් හැම වෙලාවකම පැමිණෙනවා. ඒ වගේම තමයි කුඩා කළ සිට මම ආදරය කළ සංගීත ක්ෂේත්‍රයේ පුළුවන් තාක් කල් රැදී සිටිනවා.
මේ කතාබහ අවසානයට පෙර මෙන්න මේ විශේෂ කාරණය ගැනත් දැනුම්වත් කළ යුතුයි කියා මම හිතනවා. කලාකරුවන්ගේ නම භාවිතා කරමින් වංචා සිදුවෙනවා. රැවටීම් සිදු වෙනවා. දුරු රටක පදිංචි වෙලා ඉන්න අපි අපේ රටේ කලාකරුවන්ට ආදරෙයි. මමත් එවැනි වංචාවකට හසුවුණා. පසුගිය කාලයේ මම ආදරය කරන ජනප්‍රිය සහ ප්‍රවීණ ගායකයෙක්ගේ නම සඳහන් කරමින් ඔහු කරන සත්කාරයක් වෙනුවෙන් එක්තරා පුද්ගලයෙක් මගෙන් මුදල් ලබා ගත්තා. ඒ බව මම ආදරය කරන ගායකයාට මා දන්වා සිටියා. නමුත් ඔහු කාගෙන්වත් මුදල් ඉල්ලා නැහැ. විදෙස් ගතව සිටින ශ්‍රී ලාංකිකයන්ට බොහෝ විට මෙවැනි සිද්ධීන්වලට මුහුණ පාන්නට සිදුවෙනවා. අපේ ආදරණීය කලාකරුවන්ගේ නම පාවිච්චි කරල එවැනි වංචා කරන එක පිළිකුල් කළ යුතුයි.
පුෂ්පික ලොකුහේවාගේ සිත තුළ සංගීතයට ඇති ලැඳීයාව, ආදරය අතිමහත්ය. ඔහු දුරු රටක සිටියත් උපන් රටේ සංගීතයට ලෝකයට හඳුන්වා දෙමින් තම මව් භාෂාවෙන් ගී ගයමින් අපේ මියුරු නාදරටා සුදු ජාතිකයන්ට අසන්නට සලස්වමින් ඔහු කරනා මෙහෙයට සරසවියෙන් සුබ පැතුම්!.
නයනාංජලි දෙහිපිටිය