රූපවාහිනී මාධ්‍ය තුළ විවිධ නාලිකා වල විකාශය වූ විවිධ කලා වැඩසටහන් බොහොමයක ඇඳුම් නිර්මාණ ශිල්පිනියක ලෙස කටයුතු කළ බානු කරුණානායක මේ වන විට රංග ශිල්පිනියක, චිත්‍රපට නිෂ්පාදකවරියක. නර්තන ශිල්පිනියක, වේශ නිරූපණ ශිල්පිනියක මෙන්ම ප්‍රඩන්ෂන් හවුස් ආයතනයක හිමිකාරිනියක වී සිටී. මේ වන විට රංගනයට හා කලා නිර්මාණ නිෂ්පාදනයට වඩාත් ආශාවක් දක්වන බානු ලෝකයේ විවිධ රටවල් බොහොමයක ඇඳුම් නිර්මාණය පිළිබඳ හා රංගනය පිළිබඳ දීර්ඝ හැදෑරිමක් සිදුකර අත්දැකිම් බොහොමයක් ලද තැනැත්තියකි.
අපි කතා කරමු බානු කරුණානායක සමඟ බානු කොහොමද කලාවලට ප්‍රවිෂ්ටයක් ලබාගත්තේ?
මම පුංචි කාලයේ පටන් කලාවට ආශාවක් දැක් වු කෙනෙක්. මම මීට අවුරුදු පහළවකට පෙර තමයි කලාවට අවතිර්ණ වුණේ. 2010 වසරේ විතර පටන් මම කලාවේ නොයෙක් ඇසූ පිරූ තැන් සොයා යාම ආරම්භ කළා.
කොහොමද ඒ ගමන ආරම්භය පටන් ගත්තේ?
ජැක්සන් ඇන්තනී මහත්තයා තමයි මට ඒ අවස්ථාව උදාකරල දුන්නේ. ස්වර්ණවාහිනියේ විකාශය වූ ස්වර්ණෝදය වැඩසටහනේ ඇඳුම් නිර්මාණකරණය පිළිබඳ ඉදිරිපත් කරන්නෙකු ලෙස තමයි මුලින්ම මම ගමන පටන් ගත්තේ නිරූපණ ශිල්පීන් යොදාගෙන ඇඳුම් නිර්මාණය ගැන මම ප්‍රේක්ෂකයන්ට කියාදීම සිද්ධ කළා.
පාසල් අවධියේ පටන් ඔබ ඇඳුම් නිර්මාණයට වැඩි කැමැත්තක් දැක් වූ පුද්ගලයෙක්?
මම ඉගෙන ගත්තේ වත්තල ශාන්ත මරියා විද්‍යාලයේ පාසල් ශිෂ්‍යයකුව ඉන්න අවධියේ පටන් මම ඇඳුම් නිර්මාණය කළා. පාසලේ මොනයම් හෝ නාට්‍ය රඟදැක්වීමක දී ඒ සඳහා ඇඳුම් නිර්මාණය කළේ මම. ඩිසයින් පැත්තේ හැකියාවක් කුඩා කල පටන් මගේ හිතේ තිබුණදෙයක්.
අපොස සා.පෙළ සමත්වීමත් සමඟ ඔබට ඇඳුම් නිර්මාණය පිළිබඳ ශිෂ්‍යත්වයක් ලැබ විදෙස් ගත වෙනවද?
ඔව්. මට ඇඳුම් නිර්මාණය පිළිබඳ ඉගෙන ගන්න ශිෂ්‍යත්වයක් ලැබුණා ස්විට්සර්ලන්තයට යන්න එහිදී මාස හයක කාලයක් මම ඇඳුම් නිර්මාණකරණය ගැන ඉගෙන ගත්තා. ඊට පස්සේ මට රුසියාවට යන්න ලැබුණා. තව දුරටත් ඇඳුම් නිර්මාණය හා නිරූපණ ශිල්පය පිළිබඳ හැදෑරීමට එහිදී මං මේ ක්ෂේත්‍ර දෙක පිළිබඳ පුළුල් දැනුමක් ලබාගත්තා වසරක පමණ කාලයක්. ඔය අතරේ ඒ රටේ හිිටියා. රංගනය පිළිබඳ හැදැරිම් සිදු කළ මගේ මිත්‍රයෝ මම ඔවුන්ගෙන් රංගනය පිළිබඳ දැනුමකුත් ලබාගත්තා. ඔය අතරේ ක්ෂේත්‍ර කීපයක දැනුම් සම්භාරයක් මම සතු කරගෙන යලිත් මම ලංකාවට පැමිණියා.
ලංකාවට පැමිණිමත් සමඟ ඔබ රංග ශිල්පිනියක් බවටත් පත්වෙනවා නොවේද?
ඇඳුම් නිර්මාණය මෝස්තර නිර්මාණ ශිල්පිය පිළිබඳ මා තුළ දැනුමක් තිබුණත් රංගනය කියන දේ පිළිබඳ හැදෑරීමක් කරල තිබුණා මිසක් නිර්මාණයක් වෙනුවෙන් දායක වෙලා තිබුණේ නෑ. මගේ මිත්‍රයෝ මට කිව්වා රංගනය පැත්තෙනුත් ඉදිරියට යන්න කියල. ඒ අනුව මම මුලින්ම රත්නසිරි පරණවිතානගේ අංකුර වේදිකා නාට්‍යයේ රඟපෑම සඳහා එක්වුණා සුළු චරිතයක් වෙනුවෙන්. එහි රඟපෑ සුළු චරිතයක් වුණත් මගේ හිත තුළ ලොකු ආශාවක් ඇති කළා රඟපෑම පැත්තට.
රඟපෑම කරන්න පටන්ගන්න ඔබ නැවතත් ඇඳුම් නිර්මාණයට දැඩි සේ පෙම් කරන්න පටන් ගන්නවා නොවේද?
ක්ෂේත්‍රයේ නොයෙක් අයගෙන් මට යෝජනා ආවා ඇඳුම් නිර්මාණය පැත්තෙන් ඒි යෝජනා නිසාවෙන් මගේ අතමිටත් ආර්ථික අතින් ශක්තිමත් වුණා. ඒ නිසාම මම රඟපෑම පසෙක තබා ඇඳුම් නිර්මාණය මෝස්තර නිරූපණය වෙනුවෙන් වැඩි නැඹුරුවක් දැක්වුවා. මටම කියල ඉල්ලුම්කරුවන් පිරිසක් ගැනුම්කරුවන් පිරිසක් නිර්මාණය වුණා. ඔය තත්ත්වය තුළ රංගනය මගෙන් ඈත් වුණත් මගේ හිතේ ආශාව අඩු වුණේ නෑ.
යළිත් ආශාව නිසාම ටෙලි නාට්‍ය රංගනයට එක්වුණා නොවේද?
එරංග සේනාරත්නයන්ගේ ආදරවන්තයෝ ටෙලි නාට්‍යයේ රඟ පෑ නිරෝෂා හේරත් ගේ මල්ලිට රඟපාමින් මම ටෙලි නාට්‍ය රංග ශිල්පියෙක් බවට මුලින්ම පත්වුණා. ඊට පස්සේ සනත් අබේසේකරගේ සමනලයාණෝ ටෙලි නාට්‍යයේ පාසල් ශිෂ්‍යයකුගේ චරිතයක් රඟපෑවා.
ඔය අතරේ වේදිකා නාට්‍ය කිහිපයක් වෙනුවෙන් රත්නසිරි පරණවිතානගේ ජයසේකර අපෝන්සුගේ නිර්මාණ කීපයකට මම රිහසල් ගියා නමුත් වේදිකා ගතවෙනකන් හිිටියේ නෑ. මම සිනමාවට සම්බන්ධ වුණා. ඒ නිසාම ඒ නාට්‍යය මඟහැරිල ගියා.
සිනමාවට කොයි ආකාරයෙන් ද සම්බන්ධ වුණේ?
ඇඳුම් නිර්මාණ ශිල්පියකු ලෙසත් රංගශිල්පියෙකු ලෙසත් දෙආකාරයෙන් මම මුලින්ම සිනමාවට සම්බන්ධ වුණා. මගේ මුල්ම චිත්‍රපට රංගනය වුණේ උදයකාන්ත වර්ණසුරියගේ බහුභූතයෝ චිත්රපටය. මෙහි මම යකෙක්ගේ චරිතයක් වෙනුවෙන් රංගනයෙන් දායකවීමක් සිදුකළා. මේ චිත්‍රපටයේ සිංදු තුනක ඇඳුම් නිර්මාණ සිදුකළේ මම ඊට පස්සේ උදයකාන්තගේ රෝස වසන්තේ චිත්‍රපටයේ සිංදුවල ඇදුම් නිර්මාණය සිදුකළා.
චිත්‍රපට රංගනයට පැමිණි විගස වගේම යළිත් ඔබ විදේශගතවීමක් සිදුකරනවා නොවේද අධ්‍යාපන කටයුතු වෙනුවෙන්?
ඔව්. මම ඇඳුම් නිර්මාණය පිළිබඳ තවදුරටත් හැදෑරීමක් කරන්න මැලේසියාවට ගියා. සෑහෙන කාලයක් මම එහි ඉගෙනුම ලැබුවා. ඊට පස්සේ පෝලන්තයට ගියා. මගේ යාළුවෙකුගේ ආරාධනයට ඔහු මට ඒ රටේ මගේ ෆීල්ඩ් එකේ මට ඉගෙන ගන්න ඕනෙ කරන දේට අවශ්‍ය ඒ රටේ ආයතන මට සම්බන්ධ කරමින් මාස තුනක පමණ කාලයක් හැදෑරිමක් සිදුකරන්න අවස්ථාව උදා කරල දුන්නා. ඒ කටයුතු අවසන් කරලා මීට අවුරුදු හයකට කලින් මම නැවත ලංකාවට පැමිණියා.
අධ්‍යාපන කටයුතු නිමාකොට ලංකාවට පැමිණෙන ඔබ යළිත් රංගනයට එක්වෙනවාද?
මුලින්ම මම ලංකාවට ඇවිත් මගේම කියල වත්තල පටන් ගත්තා ඇනීෂියා කියලා ප්‍රඩක්ෂන් හවුස් එකක් ඒ වගේම ඇනීෂියා කියල පැෂන් ඇකඩමියක් පටන් ගත්තා. මේ ආයතන දෙකේම පරිපාලන කටයුතු සිදුකළේ මම.
මෙරට රූපවාහිනී නාළිකා සඳහා නැතුවම බැරි පුද්ගලයෙක් බවටත් බානු කරුණානායක පත්වෙනවා?
ඔව්. සිරස, දෙරණ, ස්වර්ණවාහිනී හිරු නාළිකාවල වැඩසටහන් රාශියක් වෙනුවෙන් මගේ දායකත්වය ඔවුන් දීර්ඝ කාලයක් ලබාගත්තා ඇඳුම් නිර්මාණය පැත්තෙන්. ඩාන්සින් ස්ටාර්, මෙගා ස්ටාර්, සිටිඔෆ් ඩාන්ස් මේ හැම වැඩසටහනක් වෙනුවෙන්ම මම ඇඳුම් නිර්මාණය කළා.
බානු කියන්නේ පරිත්‍යාගශීලී පුද්ගලයෙක් කියල මම හැඳින්වුවහොත්?
වචනයේ පරිසමාප්ත අර්ථයෙන්ම මම ඒ වගේ පුද්ගලයෙක් මට රැයක් දවාලක් නැතුව එකදිගට වැඩ ලැබුණා. කොච්චර ද කියනවා නම් ඉල්ලුම වැඩිවෙනකොට මටත් හරි වෙහෙසකර වුණා. ඒ නිසා මම මේ ක්ෂේත්‍රයේ තවත් නවක දක්ෂයන්ට ඒ මට එන වැඩ කරගෙන යන්න අරන් දුන්නා. මගේම ගෝලයෝ නොවුවත් මම ඔවුන්ට ඒ අවස්ථාව ලබාදුන්නා ඔවුන් ගැන ගරුත්වයක් ලබාදෙමින් අදවෙනකොට ඒ වගේ අය ගොඩක් ක්ෂේත්‍රයේ වැඩ කරනවා. මට හරිම සතුටුයි.
ඔබේ පැෂන් ඇකඩමිය හරහා බිහිවූ අය වගේම ක්ෂේත්‍රයේ ඔබේ හයියෙන් දිරියක් එක් කරගත් අය අද ඔබට අභියෝග වෙලා නැද්ද?
මට ඒක ප්‍රශ්නයක් නෑ. මට ඕනේ කවුරු කවුරුත් මේ ක්ෂේත්‍රය හොඳින් පවත්වාගෙන යනවා දකින්න. මම දන්න දේ මගෙන් දැනුමක් ගන්න ඉන්න අයට නිර්ලෝභීයව ලබාදෙනවා හරියට පැෂන් කරන විධිය. මම ලෝකෙ වටේ ගිහින් ලබාගත් දැනුම ඒ අයට බෙදල දෙනවා. ඒ අය ඒ දැනුම තමන්ගේ හැකියාවට ගොනුකරගෙන ඒ අයගේ ඉමේජ් එක ගොඩනගන් ඉදිරියට යනවා.
රංග ශිල්පිනියක් ලෙස ඔබ මලයාලම් චිත්‍රපට සඳහාත් දායක විමක් වුණා කියල දැනගන්න තියනවා?
ඔව් මම මලයාලම් චිත්‍රපට දෙකක රඟපෑවා. මේ අවස්ථාව මට උදා වුණෙඩොනල්ඩ් ජයන්ත අධ්‍යක්ෂණය කළ ආර්. සදේශ් කුමාර්, ශ්‍රීමතී සදේශ් කුමාර් නිෂ්පාදනය කළ ප්‍රවේගය චිත්‍රපටයේ මුලින් ඇඳුම් නිර්මාණය කළේ මම. ඒ චිත්‍රපටයේ මේකප් ආටිස්ලා හිටියේ ඉන්දියාවේ අය. ඒ අය මම ඇඳුම් නිර්මාණය කරන කොට මාත් සමඟ සුහද වුණා. මගේ දක්ෂතා ඒ අය හඳුනාගත්තා. අපි මිත්‍රයෝ බවට පත්වුණා. ඒ මිත්‍රකම මාව මලයාලම් චිත්‍රපට දෙකක් සඳහා රංගනයෙන් දායක වෙන්න ගමනක් අරන් ගියා. ඩී. ගනේෂන් අධ්‍යක්ෂණය කළ මුරුගන්, රත්නම් අධ්‍යක්ෂණය කළ රියල් ලයිෆ් මලයාලම් චිත්‍රපට දෙකේ මම රඟපෑවා.
ඉන්දීය ශිල්පීන්ගේ ඇසුර මිත්‍රකම නිසාවෙන් ඔබට ලැබෙන ඉන්දීය චිත්‍රපට දෙකේ මොනවගේ චරිත ද ඔබ රඟපාන්නේ?
චිත්‍රපට දෙකේම මම කළේ කාන්තා චරිත මුරුගන් චිත්‍රපටයේ මන්ද බුද්ධික චරිතයක් කරනවා. රියල් ලයිෆ් චිත්‍රපටයේ විදී ගණිකාවකගේ චරිතයක් කරනවා. මේ චිත්‍රපට දෙකේම මට හොඳ රංගනයක් ඉදිරිපත් කරන්න අවකාශ උදා වුණා. මීට අවුරුදු එක හමාරකට කලින් මේ චිත්‍රපට දෙකේ රඟපෑම ඉදිරියේදී බලාගන්න පුළුවන්. ඒ නිර්මාණ තිරගත වෙන්න නියමිතයි තව නොබෝ දිනකින්.
ඔබේ ඇනීෂියා ප්‍රඩක්ෂන් හවුස් නිෂ්පාදනයක් ලෙසින් තවම චිත්‍රපටයක් නිර්මාණය කළේ නැද්ද?
කළා. මේ මෑතකදී අපි කෙටි චිත්‍රපටයක් කළා. හේමන්ත ප්‍රසාද් මහත්තයා තමයි චිත්රපටය අධ්‍යක්ෂණය කළේ. එහි පිටපත රචනා කළෙත් ඔහු සන්සුන් වර්ණ තමයි චිත්‍රපටයේ නම විනාඩි විසිපහක කාලයක් පුරා දිවෙන සිනමාපටයක් මේක.
‘සන්සුන් වර්ණ’ නිර්මාණයට පාදක වන සුවිශේෂී සිද්ධියක් තියනවාද?
මේ චිත්‍රපටයට අන්තර්ගත වී තිබෙන කතාව අපේ රටේ සත්‍ය සිදුවීමක්. යාපනය ප්‍රදේශයේ ත්‍රස්තවාදී කලබල තියන වකවානුවේ දෙමළ ජාතිකයකුට සිදු වූ ඛේදනිය සිද්ධියක් තමයි මේ චිත්‍රපට කතාව තුළ තියෙන්නේ. අදටත් මේ චිත්‍රපටයේ පිළිබිඹු වන චරිත ජීවත් වෙනවා.
මම මලයාලම් චිත්‍රපට දෙකේ රඟ පෑ චරිත අඩංගු ට්‍රේලර් මේ වෙනකොට අන්තර්ජාලයේ දකින්න තියනවා. සමාජ මාධ්‍ය තුළ ඒ ට්‍රේලර් සංසරණය වෙනවා දැක්ක දැනට කැනඩාවේ පදිංචි මේ සිද්ධියට මුහුණ පෑ කෙනා මට දවසක් කතා කරල යෝජනාවක් ගෙන ආවා. එයාට වුණ මේ කතාව කෙටි චිත්‍රපටයක් වශයෙන් කරන්න. දැන් සම්මාන උලෙළෙවලටත් කෙටි චිත්‍රපට තමයි තැනෙන්නේ මටත් ඕනෙ කළා. ඒ වගේ දෙයක් කරන්න. එයාට සිදුවෙච්ච දේ කතාවක් විධියට මට කිව්වා. මගෙන් එයා ඉල්ලීමක් කළා ලංකාවේ නළුවෙක් හැටියට එයාගේ කැරැක්ටරය මමම කරනවා දකින්න එයා ආශයි කියල. මගේ මිත්‍රයෙක් ඉන්නවා. කිරංජි සොයිසා කියල මම එයාට මේ කතාව කිව්වා. ඔහු මාව හඳුන්වල දුන්නා. හේමන්ත ප්‍රසාද්ට අපි කතා බහ කළා. කාස්ට් එක තෝරාගැනීම කළා. මම කතාව දුන්නා. හේමන්ත තිරරචනය කළා. මගේ අර කැනඩාවේ යාළුවා කිව්වා එයා වියදම් කරන්නම් ඔයාගේ ප්‍රඩක්ෂන් හවුස් එකේ නිෂ්පාදනයක් ලෙස මේක කරන්න කියලා. දිනෙත් ද සිල්වා මේ චිත්‍රපටයේ එක කැරැක්ටරයකට තෝරාගත්තා. ඔහු ඒ චරිතයට හරියට ගැළපුණා. හරිම තාත්විකව ඒ චරිතය ඔහු කළා. හොඳට දෙමළ උච්චාරණය අවශ්‍ය නිසා අපි ඉන්දියාවේ ආටිස්ලා කීප දෙනෙකුත් ගත්තා. කිරන් ජි සොයිසාවත් අපි මේ චිත්‍රපටයේ චරිතයකට ගත්තා. වැඩි කොටසක් ඉන්නේ ඉන්දියන් ආටිස්ලා.
‘සන්සුන් වර්ණ’ ෂුට් කළේ කොයි කාලයේ ද?
මේ වසරේ මැයි මාසයේ තමයි යාපනයේ ෂූට් කළේ. මේ චිත්රපටය කරන්න කියල අපෙන් ඉල්ලීම කරපු කෙනාට ඕනෙම වුණා. එයා මේ සිද්ධියට මුහුණ දුන් හැටි යාපනයේ ඒ පරිසරයේම මෙය නිර්මාණය වනවා දකින්න.
ඔබේ පළමු චිත්‍රපට රංගනය ගැන මොකද හිතෙන්නේ?
මම හිතනවා මම ඒ චරිතය හොඳින් කළා කියලා. මට හේමන්ත ප්‍රසාද්ට කියන්න තිබුණේ ටික දෙයක් විතරයි. මම රංගනය ගැන හදාරල තිබුණ නිසා චරිතය කතාව තුළ ගලාගෙන යා යුතු විධිය මට හොඳින් අවබෝධ වෙලා තිබුණා. මේ චිත්රපටය මානුෂීය අයිතිවාසිකම් වෙනුවෙන් කළ චිත්‍රපටයක්. දිනෙත් ද සිල්වාගේ පෙම්වතිය ලෙස තමයි මම රඟපෑවේ. ලිංග වෙනස්විමකට ලක් වූ තැනැත්තියක වන පුනම් නැමැති පෙම්වතියගේ චරිතය තමයි මෙහිදී මම නිරූපණය කළේ. මම ප්‍රධාන චරිතයත් කළ මුල්ම චිත්‍රපටයත් මේක.
දැනට වැඩ අවසන් කර ඇති සන්සුන් වර්ණ ප්‍රේක්ෂක දිගහැරුම ළඟදීම සිදුකරනවාද?
දැනට චිත්රපටය ඇජන්ටා ෆෝටි ෆිල්ම් ෆෙස්ටිවල්, යාපනය ෆිල්ම් ෆෙස්ටිවල් සඳහා ඉදිරිපත් කරල තියෙන්නේ. තවත් සම්මාන උලෙළ කීපයක් සඳහා ඉදිරිපත් කරන්නත් නියමිතයි. මේ චිත්‍රපට උලෙළ ඉවර වූ සැනින් අපි බලාපොරොත්තු වෙනවා. චිත්රපටය තිරගත කරන්නත් සමාජ මාධ්‍යයට මුදා හරින්නත්.
මේ වන විටත් ඔබට තව චිත්‍රපට රංගනයන්ට ආරාධනා ඇවිත් තියනවාද?
ඔව්. තවත් කෙටි චිත්‍රපටයකට ආරාධනා ඇවිත් තියනවා.
ඉදිරියේ මොනවගේ චරිත ද කරන්න බලාපොරොත්තුව?
ලිංගික සංක්‍රාන්තිය ඉස්මතු වන කෙනෙක්ගේ චරිත කරන්න මගේ සාමාන්‍ය පෙනුමත් ඒ වගේ නිසා මම කැමැතියි ඒ ටයිප් එකේ චරිත කරන්න. ෂීමෙල් චරිත වලත් විවිධ අයගේ චරිත කරන්න මම ආශයි. මම හිතනවා මට විකට චරිත කරන්න බෑ කියල හැබැයි සිරියස් චරිත මට කරන්න පුළුවන් කියන දැඩි විශ්වාසය මට තියනවා.
නිළියක් වුණාම විවිධ චරිත කරන්න ඕනෙනේ. එකම චරිතයක් කරනවා කියල කොටුවීම උචිතද?
මට වෙනත් චරිත කරන්න පුළුවන්. ඒක තීරණය කරන්නේ අධ්‍යක්ෂවරයා. ෂීමේල් චරිත කරනවා කියල ලැබෙන හැම චරිතයක්ම මම කැමැති නෑ භාරගන්න. නිර්මාණයකරන අධ්‍යක්ෂවරයත් මට වැදගත් ෂිමෙල් වුණ පලියට විකාරයක් වෙන්න මම කැමැති නෑ ෂීමේල් වුණපලියට අපි අපිම විහිළුවක් කරගත යුතු නෑ.වගේම අන් අයගේ උසුළු විසුළු වලට ලක්විය යුතුත් නෑ.
ඔබේ ප්‍රඩක්ෂන් හවුස් එක හරහා ඉදිිරියේ දී සිනමා නිර්මාණ බිහිකරන්න සැලැසුමක් නැද්ද?
තියනවා මානුෂීය කතා තේමා අඩංගු නිර්මාණ සඳහා මගේ ලොකු කැමැත්තක් තිබෙනවා.
ලෝක සිනමාව අධ්‍යයනය තුළ ඔබ වඩාත් ඇල්මක් දක්වන්නේ?
මා තුළ මලයාලම් සිනමාවට ලොකු ඇල්මක් තියනවා.