‘නීලම්’ චිත්‍රපටය තිරගත වන තුරු බලාසිටිනවා

රංගන ශිල්පිනී රුක්ෂාන්ති පෙරේරා
ජනවාරි 5, 2023

 

ජීවිතයේ වෙනසක් ඕනෑයි කියලා හිතපු කාලය වෙනස් කර ගත්තේ කොහොමද ?

මගේ ජීවිතේට මම ගොඩක් දේවල් සෙමෙන් ළඟා කර ගත්ත කෙනෙක්. ඒ වගේ ආපු ගමනක ප්‍රතිඵලයක් තමයි මම අද භුක්ති විඳීන්නේ. පාසල් යන කාල සීමාවේ දී මම විවිධ සමිති සමාගම්වල කලා කටයුතුවල නිරත වුණා. පාසලෙන් සමුගත්තාට පස්සේ කලාවේ නිරත වෙන්න අවස්ථාවක් ඕනෑ නෑ කියල හිතුණ වෙලාවල් තිබුණා. මේ වකවානුවේදී මගේ මල්ලි වෙළෙඳ දැන්වීම් කලාවට යොමු වෙලා හිටියා. එයා නිසා තමයි මම වෙළඳ දැන්වීම් කලාවට නිරූපිකාවක් ලෙසට පැමිණියේ. ඒ ආපු ගමනෙදි මම අවුරුදු 4ක් වෙළෙඳ දැන්වීම් කලාවේ නිරත වුණා. පළවෙනි එක, දෙක කරන විට මට ලොකු ආසාවක් ඇති වුණා කලාවේ නිරත වෙන්න හොඳම කාලේ කියලා. ඔය විදිහට තමයි මම මේ ගමන පටන් ගන්නේ.

 

ඔබ දැනට වෙළඳ දැන්වීම් කොපමණ සංඛ්‍යාවක රඟපා තිබේ ද ?

දැනට මම වෙළෙද දැන්විම් 60,70 විතර රංගනයේ නිරත ⁣වෙලා තියෙනවා. මේ සියලුම වෙළඳ දැන්වීම් මම හරි ම අශාවෙන් කළේ. මේ දැන්වීම් ප්‍රේක්ෂකයා අතර හොඳ ජනප්‍රියත්වයකට පත් වුණා. සමහර වෙළෙඳ දැන්වීම්වල නමින් මට කතා කරන්න බොහෝ දෙනා පුරුදු වෙලා සිටියා. ඉන්පසු මට ටෙලි නාට්‍ය ගණනාවකට ආරාධනා ලැබුණා. ඒ ආපු ටෙලිනාට්‍යවලින් තෝරා බේරාගෙන චරිතයට සාධාරණයක් කරන්න මම හැමවිටම උත්සාහ ගත්තා.

වෙළෙද දැන්විම් කලාවේ එක දිගටම නිරත ⁣වෙන්නට අමාරුයි ද?

එක ඇත්ත. එතැනින් පස්සේ තවත් අයට අපි අවස්ථාව දෙන්න ඕනෑ. මම වෙළෙඳ දැන්වීම් කලාවේ නිරත වෙලා ඉන්න කාල සීමාව තුළ මම ලබපු අත්දැකීම් හා රංගනය පිළිබඳ ලැබුණු හැකියාව නිසා මට කලාවේ යම් ප්‍රගමනයක් ඇති වුණා. අපි ජීවිතේ බලාපොරොත්තු වූ සියලුම දේවල් අපිට ලැබෙන්නෙ නැහැ. වෙළඳ දැන්වීම් කලාවේ නිරත වෙලා ඉන්න කාලසීමාවේදි ‘ඇය’ සහ ‘සකල ගුරු’ ටෙලි නාට්‍ය චරිතවලට අවස්ථාව ලැබුණේ.

ඒ ලැබුණු අවස්ථාව මම හරි සතුටින් භාරගත්තා. ‘ඇය’ හා ‘සකල ගුරු’ ටෙලි නාට්‍යයෙන් පසු මට දිගටම ටෙලිනාට්‍ය සහ චිත්‍රපටවලට ආරාධනා ලැබුණා. මට අවස්ථාව ලැබෙන විදියට ඒ නිර්මාණවලට දායකත්වය දුන්නා.

 

වෙළඳ දැන්වීම් කලාවේ නිරත වීම අතමිට සරුකර ගන්න හොඳ මාධ්‍යයක් ද?

යන මාවත හරියාකාරව තේරුම් අරගෙන අපි නිරත වන දේ හරියට කළොත් ජීවිතේ ජය ගන්න පුළුවන්. අපි ඕනෑම භාණ්ඩයක් විකුණන්නෙ මුදලක් මතයි. ඒ භාණ්ඩයට මගෙන් සාධාරණයක් ඉටු කරන්න පුළුවන් නම් නිරූපණයෙන් ඒක භාණ්ඩය ලබපු ජයග්‍රහණයක් සහ පාරිභෝගිකයා තුළ විශ්වාසයක් ඇති විය යුතුයි. වෙළඳ දැන්වීම් කලාව තුළ තියෙන්නේ නිර්මාණශීලීත්වයයි. සාමූහික බැඳීම තුළින් එකතු වෙලා කරන නිර්මාණයක් තුළ ජයග්‍රහණයක් දකින්න පුළුවන්. මම කළ සියලුම නිර්මාණ ජයග්‍රහණ ලබපු ඒවායි. ඒ නිසා තමයි මට අවුරුදු හතරක් එක දිගට ම වෙළඳ දැන්වීම් කලාවේ නිරත වෙන්නට පුළුවන් වුණේ. ලෝකෙ වෙළඳ දැන්විම් කලාවේ නිරත වන සියලු දෙනාටම හොඳ තත්ත්වයක් තමයි තියෙන්නේ. එහෙම කවුරුවත් හොද නෑ කියලා කියන්නෑ. මගේ ජයග්‍රහණයේ එක් පැතිකඩක් තමයි වෙළෙඳ දැන්වීම් කලාවේ නිරත වීම. මම අදටත් කැමති වෙළඳ දැන්විම් කලාවටම තමයි.

 

සිනමාවට අවතීර්ණ වන්නේ කොහොමද?

නාලක විතානගේ සරුංගල් සිනමාපටයෙන් තමයි මම සිනමාවට අවතීර්ණ වෙන්නේ. ‘සරුංගල්’ වලින් පසුව මට ‘රශ්’ චිත්‍රපටයට අවස්ථාව ලැබෙනවා. සරුංගල් සහ රශ් සිනමාපට දෙකම තිරගත වුණත් මම කරපු පළමු සිනමා නිර්මාණය තමයි ‘නිලම්’ චිත්‍රපටය. ‘ඇය’ සහ ‘සකල ගුරු’ ටෙලි නාට්‍යය දෙකෙන් පසුව තමයි මට අවස්ථාව ලැබෙන්නේ මගේ කුලුඳුල් සිනමා නිර්මාණයට. ඒ ‘නීලමි’. මේ සිනමා පටය, අපෙන් වෙන්වී ගිය දර්ශන් ධර්මරාජ් සමග ප්‍රධාන භූමිකාවේ රංගනයේ යෙදෙන්න මට අවස්ථාව උදා වුණා. සිනමා පටයක මට ලැබුණු හොඳම අවස්ථාව නීලම් චිත්‍රපටයයි. කන්ද උඩරට වලව් පන්තියක මැණිකෙගේ චරිතයක් මම ‘නීලම්’ සිනමා පටය හරහා රංගනයේ යෙදෙන්නේ. මේ චරිතය සඳහා කිහිපදෙනෙකුම තිර පරීක්ෂණයට පෙනී සිටියා. තිර පරීක්ෂණයෙන් තෝරා ගත්තේ මේ චරිතයට මමයි. මගේ ආශාව තියෙන්නේ මේ සිනමාපටය තිරගත වෙන්නේ කවදාද කියලා බලාගෙන ඉන්න එකයි. දැනගන්න ලැබෙන විදිහට පෝලිමේ තියෙන බව ආරංචියි. මැණිකේගේ රඟපෑම එදාට දැකගන්න පුළුවන් වුණත් එහි ප්‍රධාන භූමිකාවේ අනිත් චරිතය අපෙන් වෙන්වී දිගු කලක් ගත වේවි. සිනමාපටය ඉවර වෙලා දර්ශන් අයියා පුදුම සතුටකින් එදා හිටියේ. ඒක මම මේකේ මතක් කළ යුතුම නිසයි මං මේක කියන්නේ. ඒ වගේ දක්ෂ රංගන ශිල්පියෙක් එක්ක රංගනයේ යෙදීම මම ලබපු භාග්‍යයක් කියලත් හිතනවා.

 

වේදිකාව, ටෙලිනාට්‍ය, සිනමාව සහ වෙළඳ දැන්වීම් කලාව යන අංශයන්ගෙන් ඔබ වඩාත්ම කැමති කුමකටද?

මම කොපමණ වෙළෙඳ දැන්වීම්වල නිරූපණය යෙදුණත් මේ මාධ්‍ය තුළ මම වඩාත් කැමැති සිනමාවටයි. ඕනෑම රංගන ශිල්පිනියක්, ශිල්පියෙක් තමන්ගේ අරමුණ කරා එක මාවතක ගමන් කළ යුතුයි. ඒ නිසා මගේ මාධ්‍යය ලෙස මම තෝරාගන්නේ සිනමා මාධ්‍යය යි. අපි ජීවත්වන පරිසරය තුළ අපට ආර්ථික අපහසුකම් ඇති නොවෙනවා කියන්න බෑ. ඒ නිසා තමයි විවිධ ක්ෂේත්‍රයන් හරහා කලාකරුවන් ඔවුන්ගේ ජීවන ගමනේ යෙදෙන්නේ. 60- 70 දශකවල බලපුවාම එකම ක්ෂේත්‍රයක නිරත වෙච්ච පිරිසක් සිටියා ඔවුන් අද ශක්තිමත් ලෙස අපිට දකින්නට පුළුවන්. අපි නිරත වන මාධ්‍ය තුළ ප්‍රායෝගික හා න්‍යායාත්මක අවබෝධයක් තියෙනවා නම් අපි නිරතවන මාධ්‍ය තුළ අපිට හරියාකාරව හැසිරෙන්න පුළුවන්. අද අපිට ක්ෂේත්‍රය තුළින්ම පමණයි ප්‍රායෝගික හා න්‍යායාත්මක අවබෝධය ලබා ගන්නට හැකි වෙලා තියෙන්නේ. පොත පත විද්‍යුත් මාධ්‍ය පරිශීලනය කරමින් අපිට අපේ න්‍යායාත්මක හා ප්‍රායෝගික අවබෝධය ලබා ගන්නට අද හැකි වෙලා තියෙනවා. ඉඩ ලැබෙන ඕනෑම මොහොතක නිසැකවම තමන්ගේ දැනුම ගබඩා කර ගත යුතුයි. එවිට අපි සියලු දෙයින්ම සන්නද්ධ වෙලා සිටින නිසා තව කෙනෙකුට අත දිගු කරන්නට නොහැකියි. මම ඒ ආකාරයෙන් තමයි මගේ ගමනත් යන්නේ.

දැනට දායක වුණු නිර්මාණ ගැන කතා කළොත්?

මේ වන විට මම වෙළඳ දැන්වීම් 60, 70කට විතර දායක වෙලා තියෙනවා. ඒවගේම සිනමාපට 6කට විතර රංගනයෙන් දායක වුණා. ඉදිරියේදී එන්න තියෙන නිර්මාණ කිහිපයක් තියෙනවා. ටෙලි සිනමා පට 10 කට සහ ටෙලිනාට්‍ය ද රැසකට මේවන විට දායකව සිටිනවා. තවත් නිර්මාණ ගණනාවකටම මට කතා කරලත් තියෙනවා.

වෘත්තිමය නිළියක් වීමට ද නිරූපිකාවක් වීමට ද ඔබ වඩාත් කැමති ?

මගේ අරමුණ තියෙන්නේ සිනමාව කරා යන ගමනයි. ඒ නිසා මගේ කැමැත්ත තියෙන්නෙ වෘත්තිමය නිළියක් වීමටයි. යම් කෙනකු තමන්ගේ වෘත්තිමය හැකියාව පෙන්නන යම් මාධ්‍යයක් වේ නම් ඒ මාධ්‍යයේ තියන ඉහළම දේ ද ළඟා කරගත යුතුයි. ඒ නිසා මම මට ඕන පසුබිම මේ වකවානුවේ සකස් කර ගනිමිනුයි යන්නේ. තිරය මත නම තුන් හතර වතාවක් ලියල ආයේ දකින්නට නොලැබෙන විදිහට නම ලියාගන්න මම කැමැති නැහැ. සදාකාලික නමක් ලිවීම තමයි මගේ එකම අරමුණ වෙන්නේ.

 

සිනමාවට ඔබ දැඩ් ඇල්මක් දැක්වුවත් මෙගා රැල්ලේ ටෙලිනාට්‍ය කලාවට කැමති බවයි වැටහෙන්නේ?

මගේ එහෙම විශේෂත්වයක් නැහැ. ගිහාන් රවීන්ද්‍රගේ ‘නීලම්’ සිනමා පටයේ රූගත කරන අතර තුර තමයි මට ‘සංගීතේ’ ටෙලි නාට්‍යයට අවස්ථාව ලැබෙන්නේ. මේ කාල පරිච්ඡේදය මගේ කලාවේ පරිච්ඡේදයයි. ඒ නිසා මම රංගනයෙන් ඉදිරියට එන්න නම් තෝරා බේරාගෙන රඟ පෑ යුතුයි. ‘සංගීතේ’ ටෙලි නාට්‍යය මට ලැබුණු එක් අවස්ථාවක්. ඒ හරහා ‘සංගීතේ’ මෙගා නාට්‍යයක් වුණාට අද තියන නාට්‍ය අතරින් ඉහළ තැනක තියෙනවා. අද ජනප්‍රිය රැල්ලේ ටෙලි නාට්‍ය කොටස් 150කට වැඩි ප්‍රමාණයකින් යුතුයි. ගෙදර ආලින්දයේ ඉන්න ප්‍රේක්ෂකයාට රස වින්දනයක් ගෙන දෙන්න පුළුවන් නම් අපිට කරන්න පුළුවන්නේ අපේ රංගනය තුළින් පමණයි. මම රංගන ශිල්පිනියක් හැටියට සමාජයට මගෙන් කරන්න පුළුවන් කාර්යභාරයක් මම ඉටු කරන එක තමයි මම කරන්නේ. වර්ගීකරණයකට යටත් වෙලා මේ කාලයේ රංගනයේ යෙදෙන්න අමාරුයි. චරිතයට සාධාරණයක් කිරීම තමයි මූලික වී තියෙන්නේ.

 

නවක ශිල්පීන්ට ක්ෂේත්‍රය තුළින් ලැබිය යුතු දේවල් ගැන කියන්න තියෙන්නේ මොනවාද ?

කලා ක්ෂේත්‍රයට පිවිසෙන කිසිවකුට ඊඩඥචබපඥ ඉජඩධධත එකක් නොමැතිවීම ලොකු අඩුවක් ලෙස පෙනෙනවා. විදේශීය රටවල් එක්ක සංසන්දනය කරන විට අපට ඔවුන් සමඟ මුහුවෙන්න පේනතෙක් මානයක් නොමැති බවයි වැටහෙන්නේ. එක එක රංගන ශිල්පීන් සහ ශිල්පිනියන් ක්ෂේත්‍රයෙන් ලබා ගත්ත දැනුම තුළින් ඔවුන් පාඨමාලාවන් කරගෙන යනවා. ඒත්, ඒවා කොච්චර දුරට සාර්ථකයි ද කොච්චර දුරට අධ්‍යාපනයක් ලබා ගත හැකිද කියලා දැනුම මැන ගන්නට නොහැකියි. මම දකින විදිහට නම් න්‍යායාත්මක හා ප්‍රායෝගික දැනුම දේශීය සහ විදේශීය විද්වත් මණ්ඩලයක් මඟින් තියටර්ස් හෝල් එකක් ස්ථාපිත කර ලැබෙනවා නම් දක්ෂ ශිල්පීන් පිරිසක් ක්ෂේත්‍රයට දායාද වෙයි. වසරකට ඉන්දියානු සිනමාව තුළින් සිනමාපට 700කට අධික සංඛ්‍යාවක් නිෂ්පාදනය කරනවා. මේ සෑම සිනමා පටයකට ම දායාද කර ගනු ලබන්නේ තියටර් ස්කූල් එකෙන් එළියට එන පිරිසයි. අපිට ගොඩක් සම්පත් තිබිලත් අනාගතයේ අපිට එවැනි දේවල් නැති වෙන එක ගැන දුකකුයි තියෙන්නේ.

 

නිර්මාණයකට ශිල්පීන් තෝරා ගැනීමේදී අධ්‍යක්ෂවරුන්ගෙන් සහ නිෂ්පාදකවරුන් ගෙන් ඔබට කිසියම් බලපෑම් එල්ල වෙලා තියෙනවාද?

නිර්මාණයකට ශිල්පීන් තෝරා ගැනීමේදී විවිධ ක්‍රමෝපායන් අනුගමනය කරනවා. ඒත්, මට පෙනුණ විදිහට දක්ෂයන්ට ගොඩක් තැන අහිමි වෙනවා. ක්ෂේත්‍රය. තුළ සිදුවන විවිධ දේවල් ගැන මම කතා කරන්න කැමති නෑ. එහෙම කතා කළොත් හෙට ක්ෂේත්‍රයෙන් එළියට යන්න බලාගෙන තමයි සියලු දේම කතා කරන්න වෙන්නේ. ඕනෑම ක්ෂේත්‍රයක් තුළ හොඳ සහ නරක කියලා දෙපැත්තක් තියෙනවා. ඒ තුළ තමයි හැම දෙයක්ම සිදු වෙන්නේ. තමන් යන ගමන නිවැරදිව දිශානුගතව ගමන් කළොත් දිසාව හරියාකාරව යන්න පුළුවන්. මම මේ තාක් ගියේ හරි පාරේ. මම කවදාවත් වැරදි පාරක යන්නේ නැති හින්දා මට මේවා ගැන පැහැදිලි කිරීම් කරන්න අමාරුයි.

 

ඔබ ඕනෑම චරිතයක් නිරූපණය කරන්න කැමතිද?

එහෙම මම ඕනෑම චරිතයක් නිරූපණය කරන්න කැමැත්තක් නෑ. නමුත් මගේ යම් සිමාවක් තියෙනවා. ඒ පිළිවෙළට උචිත නම් මං ඒ චරිතය රඟපානවා. කොහෙත්ම නිරුවත් සහ අඩ නිරුවත් චරිත නම් මම කිසිසේත්ම රඟපාන්නෑ. මම විවාහකයි. මට හොඳ මහත්තයෙක් සහ දුවෙක් ඉන්නවා. ඒ නිසා මම මවක්. අපේ ශ්‍රී ලාංකික සංස්කෘතියට අනුගත පිළිවෙළක් තියෙනවා. ඒ සීමාව දැනගෙන වැඩ කටයුතු කරන එක තමයි හොඳම දේ කියලයි මම හිතන්නේ. ලැබෙන චරිතයට උපරිම සාධාරණයක් කිරීම නිළියක් හැටියට මම නිර්මාණ අධ්‍යක්ෂකවරයාට සහ නිෂ්පාදකවරයාට බැඳීලා ඉන්නවා. ක්ෂේත්‍රය තුළ ප්‍රශ්න මතුවෙනවා. නමුත් ඒ ප්‍රශ්න තුළ අපි ඒවා ගණන් නොගෙන අපේ වගකීම් ඉෂ්ට සිද්ධ කිරීම තමයි මූලික වෙන්න ඕන. එවිට අපට ක්ෂේත්‍රය තුළින් යම් යහපත් ප්‍රතිචාරයක් ලැබෙනවා. ඒ ප්‍රතිචාරය තමයි අපිට ලැබෙන හොඳම දේ කියලයි මම හිතන්නේ. ඒ නිසා මම කතුරට හසු වෙච්ච නිළියක් ලෙස දකින්න කැමැති නෑ .රාමුවකට කොටු වෙච්ච නිළියක් වෙනවට වැඩිය චරිතාංග නිළියක් වෙන්නට කැමතියි.

 

ඔබේ මේ ගමනට පවුලෙන් ලැබෙන සහයෝගය කොහොමද?

මහත්තයාගෙන් සහ අම්මලා⁣ගෙන් උපරිම සහයෝගයක් ලැබෙනවා. මගේ ගමනට ඔවුන් තමයි හැම වෙලේම මට රැකවරණයට ඉන්නේ. මහත්තයාගෙන් ලැබෙන සහයෝගය කියලා නිම කරන්න බැහැ. ඇත්තටම ඔහු මං මේ ක්ෂේත්‍රයේ රැඳීලා ඉන්නවට හරිම කැමැත්තෙන් ඉන්නේ. ජීවිතයේ අන්‍යෝන්‍ය අවබෝධය තමයි ඕනෑම ක්ෂේත්‍රයක් තුළ ඉදිරි පැවැත්ම තුළ රඳා පවතින්නේ. ඒ නිසා මම හැම දෙයක්ම සමබරව කරගෙන යනවා. නිර්මාණයකට දායකත්වයක් දක්වන විට පවුලෙන් සහයෝගයක් නොලැබුණොත් ඒ නිර්මාණයට සාධාරණයක් ඉෂ්ට කරන්න පුළුවන් වෙයිද කියලා මට කියන්න බැහැ. ඒ නිසා මට මේ ලැබෙන සහයෝගය නිසා මං කරපු සියලුම නිර්මාණ සාර්ථක වුණා.

 

අනාගතය වෙනුවෙන් ඔබේ ඉලක්කය මොකක්ද?

මගේ ඉලක්කය තමයි මගේ පවුලත් සමඟ සාර්ථකව ජීවත් වෙලා ලැබෙන හොඳ නිර්මාණවලට දායකත්වය සැපයීම. දක්ෂ කුසලතාවලින් පිරිපුන් අධ්‍යක්ෂකවරයෙක් යටතේ හොඳ නිර්මාණයකට මගේ හැංගිච්ච දක්ෂතාවයන් ඉස්මතු කරලා ගේන්න පුළුවන් නම් කුසලතාවයන් පෙන්නන්න රංගන ශිල්පිනියක් ලබන ලොකුම සතුට ඒ තමයි. චරිතාංග ශිල්පිනියක් ලෙස ඉදිරියට යාම තමයි මගේ එකම බලාපොරොත්තුව.

 

[email protected]