ඉන්දියානු ගායිකා නිත්‍යා මගේ පදමාලාවට කැමැති වුණා

-වත්සලා සමරකෝන්
ජූලි 14, 2022

 

ඇය වත්සලා සමරකෝන්. හින්දි ගීතයට ඇලූ‍ම්කරන ඔබ වෙනුවෙන් ගීත ගොන්නක් රැගෙන සෑම බ‍්‍රහස්පතින්දාවකම රාත‍්‍රීයේ ඔබට ආමන්ත‍්‍රණය කළේ ඇයයි. ජාතික රූපවාහිනියේ සුහානි රාත් වැඩසටහන හැඩ වැඩ කළ ඇය සමඟ සරසවිය අපි කතා කරන්න හිතුවා. කලාවේ විවිධ පැතිකඩ ස්පර්ශ කරමින් ආ ගමන ගැන වත්සලා හඬ අවදි කළේ මේ විදිහට.

 

වත්සලා හින්දි භාෂාව ඉගෙනගන්න හිතුවේ ඇයි?

මම පොඩි කාලේ සිටම සංගීතය හැදෑරුවා. දයා පෙරේරා, අශෝක පෙරේරා (ගිටාර්* සර්ලා මතක් කරන්න ඕන. මගේ පාසල මහනුවර පුෂ්පදාන බාලිකා විද්‍යාලය. සංගීතය සමඟ හින්දි භාෂාව ඉගෙනගන්න එක හොඳයි කියලා මට හිතුණා. මගේ මුල්ම ගුරුතුමිය මාලති කරුණාරත්න. ඇයගෙන් මම මේ භාෂාව ඉගෙන ගන්න පටන් ගත්තේ. අද මම කැලණිය විශ්වවිද්‍යාලයේ හින්දි භාෂාව පිළිබඳ විශේෂවේදී උපාධිධාරීනියක් වගේම හින්දි භාෂාවෙන් දර්ශනපති උපාධිය හදාරනවා. ඒ නිසාම මට මේ දිනවල කියවන්න ලැබෙන්නේ හින්දි සාහිත්‍ය කෘති. එයත් හරිම ආස්වාදජනකයි.

 

ඔබ වෘත්තීයෙන් කවුද?

මම රුහුණු විශ්වවිද්‍යාලයේ නූතන භාෂා සහ ශිෂ්ටාචාර මධ්‍යස්ථානයේ හින්දි භාෂාව පිළිබඳ බාහිර කථිකාචාර්යවරියක් විදිහට කටයුතු කරනවා. ඊට අමතරව තවත් අධ්‍යාපන ආයතන දෙකක ඉගැන්වීම් කටයුතු කරනවා.

 

පවුලේ විස්තර?

මගේ අම්මා විශ‍්‍රාමික විදුහල්පතිනියක්. අප්පච්චි මිනින්දෝරුවරයෙක්. මට අයියලා දෙන්නෙක් ඉන්නේ සමීර සහා හර්ෂ. මම විවාහකයි. මගේ ආදරණීය සැමියා ඩිල්ෂාන්. ඔහු ගණකාධිවරයෙක්. ඔහුත් මගේ විශ්වවිද්‍යාලයේම අයෙක්. ඉතා හොඳ කලාකාමී හදවතක් තියෙන කෙනෙක්. ඒ නිසාම මට නිදහස දෙනවා කලා කටයුතු කරන්න.

මාධ්‍ය එක්ක ගනුදෙනුව ආරම්භ වෙන්නේ කොහොමද?

රූපවාහිනී නිවේදිකාවක් වෙනවට මටත් වඩා කැමැති වුණේ මගේ අම්මා. ඇය මාධ්‍ය කලාවට බොහොම කැමැතියි. මම මුලින්ම ප‍්‍රවෘත්ති නිවේදනය ඉගෙන ගන්නේ මහනුවර ස්පේඞ් මීඩියා ආයතනයෙන්. ජ්‍යෙෂ්ඨ නිවේදිකා සේනානි වික‍්‍රමසිංහට මගේ හඬ ඇහිලා ඇය මට කිව්වා අයැදුම් කරන්න කියලා ගුවන්විදුලි සංස්ථාවට. මම 2013 වර්ෂයේදී ගුවන්විදුලියට එකතුවෙනවා. ඒ වසරේම මට ප‍්‍රියන්ත වෙදමුල්ල නිෂ්පාදකවරයා යටතේ රූපවාහිනියේ ව්‍යාපාරික ලෝකය වැඩසටහන ඉදිරිපත් කරන්න ලැබෙනවා. ඒ කාලේ මම විශ්වවිද්‍යාලයේ පළමු වසරේ ඉගෙනගත්තේ. ඔය අතරතුර මට ශිෂ්‍යත්වයක් ලැබෙනවා වසරක කාලයක් ඉන්දියාවට ගිහින් ඉගෙනගන්න. මම ආග‍්‍රාවලට ගියා. එතැනදී මාධ්‍ය කටයුතු සියල්ලම නතර වුණා.

 

ඇවිත් හින්දියෙන්ම වැඩ පෙන්වන්න ගත්තා?

(සිනාසෙමින්*

නැවත විශ්වවිද්‍යාලයේ අධ්‍යාපන කටයුතු ආරම්භ කළා. මම 2019 වසරේ දී නැවතත් ගුවන්විදුලියේ සිටි. එෆ්. එම් හි ප‍්‍රසන්න චන්දන බණ්ඩාර අයියා එක්ක නමස්තේ සිටි.එෆ්.එම් වැඩසටහන ඉදිරිපත් කළා. ඔය කාලෙදීම විනීතා කරුණාරත්න මහත්මියට අවශ්‍ය වෙලා තිබුණා සුහානි රාත් අලූ‍ත් මුහුණුවරකින් කරන්න. ඇය මාව තෝරගත්තා. පෙරට වඩා හින්දි භාෂාව මට හසුරවා ගන්න පුළුවන් නිසාත් සංගීතයට තිබුණ කැමැත්ත නිසාත් සුහානි රාත් වැඩසටහන මම ඉතාම කැමැත්තෙන් ඉදිරිපත් කළා. විශේෂම දේ එහි පිටපතද මම ම නිර්මාණය කළා. එය මට ලොකු අත්දැකීමක් වුණා. විශේෂයෙන්ම මතක් කරන්න ඕන ජ්‍යෙෂ්ඨ කථිිකාචාර්ය රවිලාල් විමලධර්ම ශුරින්ගේ ගී අමධාරා වැඩසටහනේ හරිම ලස්සන ගීතාර්ථ තිබුණා. අපේ පරම්පරාවට ඒවා අහන්න ලැබුණේ නැහැනේ. ඒ පිළිබඳ මට ලොකු දැනුමක් ලබා දුන්නා විනේතෘ ජ්‍යෙෂ්ඨ මහාචාර්ය උපුල් රංජිත් හේවාවිතාන ගමගේ සර්. ඔහුවත් ආදරෙන් මතක් කරනවා. ඔහුගෙන් ලබාගත් දැනුමෙන් මට වැඩසටහන තවත් ලස්සන කරන්න හැකි වුණා.

 

ඒ ගත් මහන්සියේ ප‍්‍රතිඵල ලැබුණා නේද? ඔබ සම්මානයට පාත‍්‍රවුණේ මේ වැඩසටහනෙන්?

සුමති සම්මාන සඳහා අයැදුම් කළෙත් මම නොවෙයි. විනීතා මහත්මියමයි. 2020 වසරේ හොඳම වැඩසටහන් පූරක සුමති සම්මානය මට ලැබෙනවා. එය ලැබුණම මට වඩා සතුටු වුණේ නිෂ්පාදකතුමිය. එය ජීවිතයේ ලැබුණු වටිනා ජයග‍්‍රහණයක්.

 

කොහොමද ලැබුණු ප‍්‍රතිචාර?

මේ වැඩසටහනේ දී මට ලංකාවේ ජ්‍යෙෂ්ඨ කලාකරුවන් බොහොමයක් සමඟ කතා කරන්න ලැබුණා. මහාචාර්ය සනත් නන්දසිරි, මහාචාර්ය සුනිල් ආරියරත්න, ආචාර්ය ‍රෝහණ වීරසිංහ, ආචාර්ය ‍රවීන්ද්‍ර රන්දෙණිය, මේ අයගෙන් මට ගොඩක් ප‍්‍රශංසා ලැබුණා. හින්දි භාෂාව ඉතාම හොඳින් උච්චාරණය කරනවා කියලා ඔවුන් කිව්වා.

 

දැන් වැඩසහටන නතරවෙලා?

ඔව්. නිෂ්පාදකතුමිය විශ‍්‍රාම ගැනීමත් එක්ක වැඩසටහන නතරවුණා. මේ වැඩසටහන නිෂ්පාදනය වෙනුවෙන් යන පිරිවැය දරන්න අපහසු වීමත් තවත් එක් හේතුවක්.

 

සිංහලෙන් ගීත රචනා කරනවාට වඩා හින්දියෙන් පහසුයිද?

මම ගීත ලියනකෙනෙක් විදිහට දැනගන්න ලැබුණේ සංගීතවේදී දර්ශන රුවන් දිසානායක නිසා. ඔහුව මම ආදරෙන් සිහිපත් කරනවා. හැමවෙලේම අලූ‍ත් අයට අතහිත දෙන කෙනෙක්. ගී පද රචනය මම අත්හදා බලන්නේ ඉන්දියාවේ ඉන්න කාලේ විනෝදෙට සිංහල තනුවලට හින්දි වචන ලියලා බැලූ‍වා. කුරුටු ගෑ ගී පොතේ ගීතයට ලිවූ හින්දි වචන මෑතක මම සුනිල් ආරියරත්න සර්ට පෙන්නුවා. එතුමා සතුටු වුණා. මගේ මිතුරු දර්ශන රාජමන්ත‍්‍රී අයියාව ආදරෙන් මතක් කරනවා ඔහු ඒ කාලේ මාව දිරිමත් කළා. ගසල් අහන්න මම ආසයි. සංගීතයයි අර්ථයයි කියවගන්න පුළුවන් කෙනෙක්ට ගසල්වල රසය හොඳින්ම අහුවෙනවා. මේවායින් මට ගීත රචනයට හොඳ උත්තේජනයක් ලැබුණා. ඔය අතරවාරෙදි මට දර්ශන රුවන් අයියාගෙන් ආරාධනාවක් ආවා සිංහල තනුවට හින්දි වචන ටිකක් ලියන්න කියලා. මට හිතුණා මෙය වටිනා අවස්ථාවක් කියලා. මගේ වචනවලට දර්ශන අයියා එකහෙළාම කැමැති වුණා. දර්ශන රුවන්ට කලාපීය භාෂා ගැන තිබෙන හොඳ කියවීම නිසාම ඔහු සමඟ මේ වැඬේ කරන්න පහසු වුණා. පළවෙනි ගීතය ලිව්වා. ‘මුන්නාර්‘ කියලයි එය හැඳින්වූයේ. මේ ගීතය ගායනා කළේ මලයාලම් සිනමා ගායිකා නිත්‍යා මම්මෙන්. මං ලියපු දෙවැනි ගීතය ‘ආජා පවන්‘.

 

ඔබේ හින්දි පදවැලට ඉන්දියාවත් කැමති වුණා?

ඇත්තටම මම බයේ හිටියේ මේ ගීතයේ අර්ථය ඔවුන්ට දැනුණේ නැත්නම් කියලා. නමුත් ගීතය ගායනා කළ නිත්‍යා මේ වචනවලට කැමැති වුණා. ඉතාම හොඳ ප‍්‍රතිචාර ලැබුණා.

 

හඬ කැවීමත් කරනවා?

ඒ බලපෑම එන්නේ රූපවාහිනියේ ජ්‍යෙෂ්ඨ ශිල්පීන් නිසා. මහාචාර්ය සුනිල් ආරියරත්න සර්ගේ නවතම සිනමාපටය (තවම එය තිරගත වී නැහැ* කදිර දිව්‍යරාජ චිත‍්‍රපටයේ ප‍්‍රධාන චරිතයට පණපොවන ඉන්දියානු රංගන ශිල්පිනියගේ චරිතය සඳහා හඬ කැවීම් ශිල්පිනියක් හොයමින් හිටියා. මම නිකමට වොයිස් ටෙස්ට් එකක් දුන්නා. සුනිල් සර් මාව තෝරගත්තා. එයින් පසු මට හිතුණා මට හඬ කැවීමත් කරන්න පුළුවන් කියලා. පසුව සිරස නාලිකාවේ ඉම්ලි කියන ඉන්දියානු ටෙලි නාට්‍යයේ චරිතයක් සදහා මට ආරාධනා ලැබුණා. මම කලාවට කැමැති නිසා මෙයත් මට වෙනස්ම අත්දැකීමක්.

 

ස්තූතියි කියන්න බොහෝ පිරිසක් ඇති?

මගේ මාධ්‍ය වැඩකටයුතුවලට මාව නිදහස් කරමින් මං කරන කියන දේට ශක්තියක් වු කැලණිය විශ්වවිද්‍යාලයේ ආචාර්ය අනූෂා සල්වතුර මිස්ට ස්තූතියි කියන්න ඕන. මගේ සැමියා මට ලබාදෙන ශක්තියට, ඒ වගේම හැමදේටම මං එක්ක ඉන්න මගේ මිතුරියන් ගයා, ඊෂණී, ලකී, සකූ, වරූ මේ යාළුවන්ට ස්තූති නොකරම බෑ.





සේයාරුව - විදුමිණ ඉහළගෙදර