වල්ලි-කඳකුමර ප්‍රේම පුරාවත

ජූලි 13, 2023

පෙරදිග හෝ අපරදිග ප්‍රචලිත දේව කතා සාහිත්‍යයෙහි මිනිස් දුවක් සරණ පාවා ගත් දෙවියෙකු පිළිබඳව සඳහන් වන්නේ නම්, ඒ කතරගම දෙවියන් ගැනම පමණි. සියැසින් නුදුටු එම දෙවියන්ට බාල කාලයේ පටන් ආලය කළ, ඒ ආලයේ, ස්නේහයේ මහිමයෙන් ඔහු කතරගමට ගෙන්වා ගෙන සරණ කරගත් අසිරිමත් රූමතිය වැදි ජනයා අතර හැදුණු වැඩුණු වල්ලී නම් විය. ඔවුන් දෙදෙනාගේ ප්‍රේම වෘත්තාන්තය වරෙක ඓතිහාසිකය, වරෙක සාහිත්යිකය, තවත් වරෙක විචිත්‍ර කල්පනාවක් හෝ මනෝ නිර්මිතයක් හෝ ස්වප්නමය සංසිද්ධියක් ය.මෙම කදිර දිව්‍යරාජ, සිනමා කාව්‍ය වනාහී සත්‍යයත් ඇස්බැන්දුමක් වු මායාවත් අතර විවිධාකාරයෙන් දෝලනය වන්නාවු වල්ලි-කඳකුමර ප්‍රේම ආඛ්‍යානයයි. දෙසවනින් අසා සිතින් මවාගත් ඒ අසිරිමත් ප්‍රේම වෘත්තාන්තය නෙතින් දැක විඳ ගැනීමේ වරම නුදුරේම ප්‍රේක්ෂක සැමට උදාවනු ඇත.

හෙළ සාහිත්‍ය කලාවේ බොහෝ ඉසව් අතිසාර්ථකව ස්පර්ශ කරමින් ජයගත් සම්මානිත මහාචාර්ය සුනිල් ආරියරත්නයන්ගේ නවතම සිනමා වියමනයි කදිර දිව්‍යරාජ සිනමා කෘතිය. සාහිත්‍ය, ශාස්ත්‍රීය, ගාන්ධර්ව නිර්මාණ, සංස්කරණ හා පරිවර්ථන කෘති විශාල ප්‍රමාණයක් පාඨක ප්‍රජාව හමුවට ගෙන ආ ඔහු, සිංහල සිනමා ප්‍රේක්ෂකයා වෙනුවෙන් , අනුපමා (1978), සරුංගලේ (1979), පොඩි මල්ලි (1979), සිරිබෝ අයියා (1980), කිඳුරු කුමාරි (1980), කෝලංකාරයෝ (1981 - තිස්ස නාගොඩවිතාන සමඟින්), බඹා කෙටූ හැටි (1981) , සතර පෙර නිමිති (1981), වජිරා (1981) , බඹර ගීතය (1982) , ජීවිතයෙන් ජීවිතයක් (1982), කැලෑමල් (1982), මුහුදු ලිහිණි (1983), මිහිඳුම් සළු (1985), ක්‍රිස්තු චරිතය (1990), අහස් මාළිගා (1994), සුදු සෙවණැලි (2002), උප්පලවණ්ණා (2007), කුස පබාවතී (2012), පත්තිනි (2016), අලි කතාව (2017), යශෝධරා (2018) සහ විජයබා කොල්ලය (2019) ක්ෂීර සාගරය කැලඹිණ (2023) යන සිනමා නිර්මාණ ඉදිරිපත් කර ඇත.

කදිර දිව්‍යරාජ රංගන දායකත්වය

සමර් වීරමානි (ඉන්දීය), සොනාක්ෂි සිං රාවත් (ඉන්දීය), නදීපා රණසිංහ, ජගත් චමිල, රොෂාන් පිලපිටිය, නිල්මිණි තෙන්නකෝන්, ධනංජය සිරිවර්ධන, වීනූ සිරිවර්ධන, වසන්ත කුමාරවිල, සම්පත් තෙන්නකෝන්, චරිත් අබේසිංහ, අජිත් ශාන්ත, රංගී රාජපක්‍ෂ, සරත් කොතලාවල, හරිනි කාව්‍යාංජනී, වසන්ත විට්ටච්චි, ජයතිස්ස අතුලසිරි, සමිත හෙට්ටිගේ, සමූදි ජයසිංහ ඇතුළු රංගන ශිල්පීන් විශාල පිරිසක් මේ සඳහා දායක වී ඇත.