පරමාදර්ශී ගුරු භූමිකාවේ කැඩපත “ගුරු ගීතය”

සැප්තැම්බර් 22, 2022

ලොව පුරා වෙසෙන ලක්ෂ සංඛ්‍යාත පාඨක පිරිසක් අමන්දානන්දයට පත් කළ ප්‍රකට රුසියානු සාහිත්‍යකරු චිංගීස් අයිත්මාතව් (Chinghiz Aitmatov) කිර්ගීසියානු බසින් රචිත පළමු ගුරුවරයා (The first Teacher) නවකතාව ඇසුරින් නිර්මාණය කරන ලද “ගුරු ගීතය ” සිනමා කෘතිය ප්‍රේක්ෂකයා හමුවට ගෙන එන්නේ , මෙයට ප්‍රථම කළු හිම (2018) සිනමා වියමන ප්‍රේක්ෂක දෑසට සමීප කළ උපාලි ගම්ලත් ඔහුගේ දෙවන සිනමා අධ්‍යක්ෂණය විලසිනි. මෙම සිනමා පටය ශ්‍රී ලංකාවේ මෙන්ම ලොව දර්ශනීය ස්ථානයක් ලෙස සැලකෙන නේපාලයේ අන්නපූර්ණ හිමාල කඳු පන්තියේ, මන්නාග් සහ ටිලිචෝ යන ප්‍රදේශයන්හි අති රමණිය දර්ශන තලයන් තුළ රූපගත කරන ලද්දකි. මෙහි දේශීය නළු නිළියන් මෙන්ම නේපාල ජාතික නළු නිළියන් ද රංගනයෙන් එක් වී තිබීම විශේෂත්වයකි. ලොව පුරා පැවැත්වෙන අන්තර්ජාතික තලයේ සිනමා උලෙළයන් කිහිපයක්ම නියෝජනය කරමින්, ඇගයීමට සහ සම්මානයට පාත්‍ර සිනමාපටයක් ද වේ.

අල්තීනායි (කල්පනී ජයසිංහ) ඇයගේ නව යොවුන් විය වන තුරා කිසිදු අධ්‍යාපනයක් නොලැබ අතිශය දුෂ්කර කඳුකර ප්‍රදේශයක වෙසෙන දෙමව්පියන් අහිමි අනාථ දැරියකි. මෙම දුෂ්කර ගම්මානයේ පාසලක් ආරම්භ කිරීම පිණිස දුයිෂෙන් (රොෂාන් රවින්ද්‍ර) නම් මනා පෙනුමකින් යුත් කඩවසම් තරුණයෙක් පැමිණෙයි. ඔහු විසින් ආරම්භ කරන ලද පාසලට ගම්මානයේ සෙසු දරු දැරියන් සමඟින් අල්තීනායි ද අධ්‍යාපනය හැදෑරීම පිණිස සහභාගි වෙයි. අධ්‍යාපනයේ නිසි වටිනාකම අවබෝධ නොකරගත් එම ගමේ වැසියන් මෙන්ම අල්තීනායිගේ මාමා සහ නැන්දා ද (ගාමිණී හෙට්ටිආරච්චි , ලංකා බණ්ඩාරනායක ) මෙම පාසල වැසීමට විවිධ උපක්‍රම යොදයි. ඉගැනීමට දක්ෂ අල්තීනායි සියලු බාධක මැද අධ්‍යාපනය හදාරයි. අල්තීනායි ප්‍රකාශ නොකළ ද , මෙම කාලය තුළ දුයිෂෙන් කෙරේ ආදරයක් ඇගේ හදවතේ හට ගනී. ඔහුට එය ප්‍රකාශ කිරීමට අවස්ථාවක් ඇයට උදා වන්නේ ද නැත. ඇයගේ මාමා විසින් ගමට පැමිණෙන වෙළෙන්දෙකු හට (ලක්රුවන් විතානගේ ) ඇය විකුණා දමයි. දැඩි වෙහෙසක් දරා ඇයව බේරා ගන්නා දුයිෂෙන් , වැඩිදුර අධ්‍යාපනය හැදෑරීම සඳහා නගරයට ඇයව පිටත් කර යවයි. ඉන් කාලයකට පසුව අල්තීනායි දුයිෂෙන් සොයා යළි ගමට පැමිණෙයි. යුද්ධය නිසා ගමෙන් ගිය දුයිෂෙන් නැවත ගමට නොපැමිණි බවත් , යුද්ධයේ දී ඔහු මිය යන්නට ඇති බවත් ගැමියන්ගෙන් දැන ගත් අල්තීනායි මහත් කම්පාවට පත් වෙයි.

ගුරු ගීතය රංගන දායකත්වය

රොෂාන් රවින්ද්‍ර, කල්පනී ජයසිංහ, දමයන්ති ෆොන්සේකා, හයසින්ත් විජේරත්න, ගාමිණී හෙට්ටිආරච්චි, ලංකා බණ්ඩාරනායක, ජෙහාන් ශ්‍රීකාන්ත, සුබෝධිනී ලක්මාලි, ලක්රුවන් විතානගේ, ලලිත් පියුම් පෙරේරා, හේමන්ත කරුණාරත්න, අනලි දිසානායක, ආචාර්ය අරෝෂ ප්‍රනාන්දු, අජිත් ක්‍රිශාන්ත සේරම්, චින්තක මධුරජීව, පූර්ණ ජයශ්‍රී Dom Thamang, Sonam Gurung, Aboo Gurung, Tsring Thamang, Anitha Gurung , Chunda Karma, Geetha Thamangඇතුළු අතිරේක රංගන ශිල්පීන් රැසක් මේ සඳහා එක් වී ඇත.

ගුරු ගීතය කාර්මික දායකත්වය

තිර රචනය, ශබ්ද සංකලනය,

සංස්කරණය සහ අධ්‍යක්ෂණය - උපාලි ගම්ලත්

නිෂ්පාදනය - ආචාර්ය අරෝෂ ප්‍රනාන්දු

සම නිෂ්පාදනය - උපාලි ගම්ලත්, ඇල්ප්‍රඩ් සෙනෙවිරත්න

සහාය අධ්‍යක්ෂණය - ලක්රුවන් විතානගේ, ඉසුරු තිසර

කැමරා අධ්‍යක්ෂණය - කාවින්ග රණවීර

කැමරා සහාය සහ නාභිගත කිරීම - මංජුල කුමාරසිංහ

කලා අධ්‍යක්ෂණය - පූර්ණ ජයශ්‍රී

කලා අධ්‍යක්ෂණ සහාය - තුෂාර චමිත් පෙරේරා / Anitha Gurung

අංග රචනය - තාරක අධිකාරි

ඇඳුම් නිර්මාණය - ලංකා බණ්ඩාරනායක