මෙය ලංකාවේ හා ජපානයේ අතිශයින්ම ජනප්‍රිය වූයේ ආදායමි වාර්තා තබමිනි. මෙය පසු කලෙක නිතරම පාහේ රූපවාහිනියේ විකාශය විය. ලංකාවේ කැසැන්ඩ්‍රා ක්‍රොසිං උන්මාදයක් ඇති විය.

‘නියුමොනික් වසංගතය’ (පෙනහලු ආශ්‍රිත රෝගී වසංගත) බෝවුණු, බන්ධනාගාර රෝහලක දැඩි ආරක්ෂා මත සිටි ත්‍රස්තවාදින් හතරදෙනෙක් එම රෝහලෙන් පැන යති. මෙය ඉතාමත් දරුණු අවස්ථාවක් වූයේ මෙම වසංගතය එය හැදුනු පුද්ගලයා ගෙන් ඉතාමත් ඉක්මනින් තවත් පුද්ගලයන්ට බෝවී එය පැතිරී යන නිසාත්ය. එමෙන්ම මෙය බෝවීමෙන් පසු එය සුවවීමේ හැකියාව ඉතාමත් අවම වීමය. 

මෙම රෝගය දරුණු අන්දමටම වැලඳුණු එසේ පැන ගිය එකී 4 හතර දෙනාගෙන් දෙදෙනෙකු ආරක්ෂක භටයන් තැබූ වෙඩි පහරවල් වලින් මිය ගිය අතර, තව අයෙක්ව අල්ලා ගත හැකි විය. එහෙත් එක් අයෙක් ආරක්ෂක භටයන්ගෙන් මිදී පැන ගියේය. 

එසේ පැන ගිය ත්‍රස්තවාදියා ගේ නම ‘එක්ලන්ඩ්’ය. ඔහු ස්වීඩන් ජාතිකයෙක් විය. බන්ධනාගාර රෝහලෙන් පැන ගත් ඔහු දිව ගොස් එල්ලුණේ ස්විට්සර්ලන්තයේ ජිනිවා සිට ස්වීඩනයේ ස්ටොකොම් නගරය බලා යන මගී දුම්රියකය. එය කිලෝමීටර් 2000 කට අධික දුරක ගමනනි. (උපරිම 2028).

මෙම දුම්රියේ විශාල මඟින් පිරිසක් සිටි අතර ඔවුන් විවිධ තරාතිරමේ අය විය. ඇතැම් අය උසස් පැලැන්තියට අයත් වූවන් අතර ඔවුන් ගමන් කළේ සුවපහසු පළමුවන පන්තියේය. ⁣දෙවන පන්තියේ මධ්‍යම පැලැන්තියේ අයත් තුන්වන පන්තියේ සාමාන්‍ය අයත් ගමන් කළහ. මේ කිසිවෙක් මෙම දුම්රියේ දරුණු, බෝවන වසංගත රෝගියෙකු සිටින බවක් දැනගෙන සිටියේ නැත. එසේම ඔහු ත්‍රස්තවාදියෙක් බවක් ද දැන සිටියේ නැත.

ජිනිවා සිට ස්ටොක්හෝම් දක්වා දුර යන මේ දුම්රිය අධි ශීඝ්‍රගාමි ගමනක යෙදෙන නිසා, රට රටවල් පහු කරන දේශ සීමාවල පමණක් නතර වෙනු ඇත. ඉන් අදහස් වූයේ දුම්රිය නතර වන්නේ රටකින් රටකට මාරු වන අවස්ථාවේදි පමණි. 

ස්විස් ආරක්ෂක හමුදාව මෙම ත්‍රස්තවාදියා අනිවාර්යයෙන්ම මෙම දුම්රියේ සිටිය යුතු බව නිගමනය කළේ, ඔහුට රට ඇතුළේ සැඟවී සිටීමට කිසිදු අවශ්‍යතාවක් නොමැති නිසාය. ඒ ඔහුට නැවත සිර ගෙට යෑම වළක්වා ගත හැකි එකම මාර්ගය දේශ සීමාව පසු කිරීම පමණක් නිසාය. ස්විස් දේශ සීමාව පසු කළ පසු ස්විස් රජයට එම වැරදිකරුවාව අත්අඩංගුවට ගැනීමට බලයක් නැත. ත්‍රස්තවාදියා එය හොඳටම දන්නා නිසා ඔහු අනිවාර්යයෙන්ම උත්සහා කරනුයේ දේශ සිමාවෙන් පනින්නටය. එයට තිබෙන එකම හා පහසු ක්‍රමය මෙම දුම්රියේ ගමන් කිරීමය. එහෙයින් ඔහු මෙම දුම්රිය තුළ සිටින බව ස්විස් ආරක්ෂක අංශය අවධාරණය කළ හෙයින් දුම්රිය යන අතර දුම්රිය ඇතුළත පරික්ෂා කිරීමේ කටයුතු පටන් ගතී. එය භාර වූයේ ‘කර්නල් මැකෙන්සි’ ටය. මේ අතරේ ස්විස් සෞඛ්‍ය දෙපාර්තමේන්තුවද කර්නල් මැකෙන්සි සමඟ මෙම ත්‍රස්තවාදියා වූ 'එක්ලන්ඩ්' ව සෙවීමට එකතු වූයේ ඔහු බෝ වෙන වසංගත රෝගියෙක් නිසාය.

කර්නල් මැකෙන්සි, දුම්රියේ ගමන් මාර්ගය වෙනස් කිරීමට අදහස් කළේ පෝලන්තයේ ජනෝව් නගරයේ ඇති නාසි වෛද්‍ය සුබ සාධන කඳවුරට ගොස් සියලු මගින්ව නිරෝධායන කිරීමටය. එහෙත් එතැනට යාමට තිබූ එකම අපහසු තාවය වූයේ ‘කැසැන්ඩ්‍රා’ නම් වූ යකඩ පාලම පසු කරන්නට සිදුවීමය.⁣ එයට මූලික හේතුව වූයේ එම පාලම 1948 සිට පුරා අවුරුදු 30ක් පමණ භාවිතයෙන් තොර වීමත්, ඒ අවුරුදු 30 ඇතුළත කිසිදු අලුත් වැඩියා කිරීමක් නොසිදුවුණු නිසාත්ය. එහෙයින් එය අනිවාරයෙන්ම ඇත්තේ අබලන් තත්වයේය . කර්නල් මැකෙන්සි අනුමාන කළේ දුම්රිය, පාලම පසු කරනවාත් සමඟම බොහෝ දුරට පාලමත් සමඟ කඩාගෙන වැටීමට ඉඩ ඇති බවය.

ඉහත තැනක කී ලෙසට මෙම දුම්රියේ යන විවිධ මගින් අතරේ කථාවට සම්බන්ධ වන ප්‍රධාන චරිත කීපයක් විය. ඒ අතරේ ප්‍රසිද්ධ ස්නායු විශේෂඥ දොස්තරවරයෙකු වූ ජොනතන් චැම්බර්ලේන් සහ ඔහුගේ මුල් කසාදේ බිරිඳව සිටි ජෙනිෆර් රිසෝපොලි ද විය. එලෙසම ලෝක මහා යුද්ධයේදී සමුල ඝාතනයට ලක්වූවන් අතරේ සිට බේරී පැමිණි ‘හර්මන් කප්ලාන්’, ජර්මානු අවි වෙළඳ නියෝජිතයෙකු ගේ බිරිඳ වූ නිකෝලේ ඩ්‍රෙස්ලර්, හා ඇයට වඩා බොහෝ වයසින් අඩු ඇයගේ අලුත් පෙම්වතා රොබි නැවාරෝ ද විය. රොබි, හෙරෝයින් මත් ද්‍රව්‍යවල⁣ට ඇබ්බැහි වූවෙක් සේම හෙරොයින් මත්ද්‍රව්‍ය දුම්රියෙන් වෙනත් රටවල ඒජන්තවරුන්ට රැගෙන යන්නෙක් ද විය. ඒ අතරට ඉන්ටර්පෝල් ජාත්‍යන්තර පොලිසියේ ඒජන්ත වරයෙක් ද සිටියේ ය.හේ නමින් ‘හලේ’ ය. ඔහු සිටියේ කතෝලික පූජකවරයෙක් ලෙස වෙස් වෙලා ගෙනය. ඒ හෙරෝයින් දුම්රියෙන් ප්‍රවාහනය කරන රොබි නැවාරෝ ව සාක්කි පිට අත් අඩංගුවට ගැනීමේ බලාපොරොත්තුවෙනි.

කර්නල් මැකෙන්සි, වසංගත රෝගය බෝවී සිටින ත්‍රස්තවාදියා ගැන මුලින්ම කීවේ ජොනතන් චැම්බර්ලෙයින්ටය. ඔවුන් දෙදෙනා ත්‍රස්තවාදියාව සොයා මුළු දුම්රියේ අස්සක් මුල්ලක් නෑරම ගියහ. එක්ලන්ඩ් නම් වූ ත්‍රස්තවාදියා ඔවුනට හමුවුණේ එසේ සොයන අතර වාරයේය. ඒ වන විට රෝගය ඔහුගේ සිරුර පුරාම පැතිර ගොස් තිබුණි. මොහුව වහාම දුම්රියෙන් ඉවත් කළ යුතු වූවද, හිතු තරම් පහසුවෙන් එය කිරීමට නොහැකි විය. කර්නල්, එම ත්‍රස්තවාදි රෝගියාව හෙලිකොප්ටරයක් යොදවා දුම්රියෙන් ඉවත් කර ගන්නට උත්සහයක් යෙදුවද, එය ව්‍යර්ථ වූයේ දුම්රිය ඒ වන විට දිගු බිම් ගෙයක් තුළින් යන නිසාය. කෙසේ හෝ ඔහුට දැං ඇති එකම විකල්පය දුම්රිය නාසී කඳවුරට රැඟෙන යාමය. මේ වන විට ත්‍රස්තවාදි රෝගියා ගැනක්, දුම්රිය වෙනත් මාර්ගයකින් ගොස් නාසි කඳවුරදෙසට යන බවක් දන්නේ කර්නල් මැකෙන්සි, ජොනතන් චැම්බර්ලෙයින්, ඔහුගේ පෙර බිරිඳ ජෙනිෆර් රිසෝපෝලි, හා දුම්රිය රියදුරු ඇතුළු සේවක මඬුල්ල පමණි. දුම්රිය වෙනත් මාර්ගයකට හරවන බවක් මෙහී යන මගීන් දැනගතහොත් ඇතිවන කලබලය හොඳ හැටි තේරුම් ගත් කර්නල් මැකෙන්සි, එයට උප්පරවැට්ටියක් යොදා ගති. ඔහු මගීන්ට දන්වා සිටියේ දුම්රිය යන මාර්ගයේ ⁣රේල් පීලි මැද ත්‍රස්තවාදින් විසින් බෝම්බ අටවා ඇති බවක් පොලිසිය විසින් තමාට දන්වා එවූ නිසා වෙනත් විකල්ප මාර්ගයකින් ගමනාන්තයට ළඟා වෙන බවකි.

චැම්බලින්, හැකි උත්සහයක් දැරුවේ ක්‍රැසැන්ඩ්‍රා පාලම පසු ⁣කර යන අදහස කර්නල් මැකෙන්සිගේ සිතෙන් ඉවත් කර දමන්නටය. ඔහු කර්නල්ට පෙන්වා දුන්නේ පාලම කඩා වැටුණොත් මෙම දුම්රියේ සිටින සියලුම මගීන් මිය යන බවකි. අන් අතකට, ඒ වන විට ත්‍රස්තවාදියා ගේ රෝගය දුම්රියේ මඟින් කීප දෙනෙකුටම බෝවී තිබූ අතර එයින් කීප දෙනෙක් මිය ගියද, එම රෝගය මුලදී සිතූ තරම් දරුණු නොවන බවත් චැම්බලින් කර්නල්ට අවධාරණය කළේය. රෝගය දරුණු නොවන නිසා ක්‍රැසැන්ඩ්‍රා පාලම හරහා නොගොස් සුපුරුදු ගමන් මාර්ගයේ යන ලෙස දොස්තර විශේෂඥ ජොනතන් චැම්බලින් කර්නල්ට කීවද, ඔහු එය පිළිගන්නට කැමති වූයේ නැත. ඒ වන කොටත් තවත් කීපදෙනෙකුටත් රෝගය වැලඳී ඇති බව ජෙනිෆර් පැවසූ අතර, ඇය තම පෙර සැමියා සමඟ එක්වී රෝගීන්ට හැකි අයුරින් ඇප උපස්ථාන කළාය. 

දුම්රිය තුළ රෝගින් සංඛ්‍යාව වැඩි වන විට කර්නල්ට දුම්රිය නාසි කඳවුරට ගෙන යාමේ අවශ්‍යතාවය තවත් දැඩි විය. එහෙයින් ඔහු ඒ අදහස වෙනස් කළේ නැත. 

මේ අතර ඇමරිකන් වෛද්‍ය භට කණ්ඩායමක් දුම්රියට එකතු වූහ. ඔවුන් මුළු දුම්රියම ඔක්සිජන්වලින් ආවරණය කළ අතර, දුම්රිය මුද්‍රා තැබීය. එලෙසම ඒ වන විට දුම්රියට රෝගය ගෙන ආ ත්‍රස්තවාදියා මිය ගොස් සිටි අතර ඔහුගේ මිනිය සෞඛ්‍ය සම්පන්න ව මිනී පෙට්ටියක අසුරා එය වසා මුද්‍රා තැබීය.  

හමුදා භටයන් දුම්රියට පැමිණ ඇත්තේ තමාව අල්ලා ගෙන යාමට යැයි සිතු නිකොලා ඩ්‍රෙස්ලගේ තරුණ මත් ද්‍රව්‍ය නියෝජිත පෙම්වතා වූ රොබී නැවැරෝ දුම්රියේ දොරෙන් එළියට පැන එන්ජිම දෙසට යන්නට විය. ඔහු රෝගියෙක් යැයි සැක සිතූ හමුදා භටයන් ඔහුව අල්ලා ගැන්මට උත්සහා කළ අවස්ථාවෙදී ඇති වූ වෙඩි පහරකින් රොබී නැවැරෝ මිය ගියේය. 

ජොනතන් චැම්බලින් , තම පෙර බිරිඳ 'ජෙනිෆර්', මෙන්ම 'හාලේ' හා 'කප්ලාන්', සමඟ එකතු වී දුම්රියේ පිටු පස කොටස වෙන් කරන්නට උත්සහ කරන්නට විය. ඔහු එයින් අදහස් කළේ, දුමිරියේ පිටු පස කොටස අයින් කෙරූ පසු දුම්රියේ බර අඩුවන නිසා, කැසැන්ඩ්‍රා පාලම කෙතරම් අබලන් වූවත් එය ඔරොත්තු දෙනු ඇතැයි සිතාය. ඔවුන් එය තර්කයකින් තොරව පිළිගත්තේ දුම්රියෙ බර අඩු වූ පසු එයට, පාලම තරණය කළ හැකි බව වැටහුණු නිසාය.

දුම්රිය තුළ මෙතෙක් කර්නල් මැකෙන්සි ඇතුළු කීපදෙනෙකු විසින් සඟවා ගෙන තිබූ රහස එළිවී තිබුණි. දුම්රිය තුළ දරුණු ලෙස බෝවෙන රෝගයක් ඇති රෝගියෙක් සිටි බවත්, එම රෝගය නිසා දැනටමත් කීප දෙනෙක් මිය ගොස් ඇති බවත්, දුම්රිය නියමිත ගමනාන්තයට නොගොස් වෙනත් පාරකින් නාසි වෛද්‍ය සුබසාධන මධ්‍යස්ථාන කඳවුරකට යන බවත්, එහිදී ඔවුන් නිරෝධායන කරන බවත් දැ⁣න ගැනීමය. ඒ නිසා ඔවුන් දුම්රිය තුළ කලබල ඇති කරන්නට තැත් කල අතර යුද හමුදාව යොදා තත්වය පාලනය කරන්නට කර්නල් මැකෙන්සි උත්සහ ගතී. 

⁣දුම්රියේ පිටු පස කොටසට මගින්ගෙන් වැඩි පුර දැමීමට චැම්බලින් අදහස් කළේ, ඉදිරි පස කොටස පාලම හා ගැටීමේදී පිටු පස කොටස එයට හේත්තුවී දුම්රියේ ගමනේ වේගය අඩු වී, මගීන්ට වන ආපදාව අවම කර ගැන්මටය. නමුත් මේ කිසි⁣වක් නිශ්චිතව මෙසේ සිදුවේවි යයි කිසිවකට නිසැකවම කීමට නොහැකිය. චැම්බලින් හා ජෙනිෆර් ඇතුළු පිරිස කර්නල් මැකෙන්සි ගේ අදහස වූ නාසි කඳවුර වෙත යෑම යළි වෙනස්කර ගැනීමට හැකි වේදැයි උත්සහ කළද, ඔහු කීවේ නියමිත ගමනාන්තයට යන විට මෙම රෝගය සියලු මගීන් ට බෝවී සියල්ලන්ම මිය යෑමේ අවකාශය වැඩි බවය. අවම වශයෙන් මෙම මගින්ගෙන් අඩක් හෝ බේරා ගැන්මට නම් ඔවුන්ව නාසි කඳවුරට ගෙන යාම වඩාත්ම නුවණැති දේ බව ඔහු හේතු දක්වමින් කීය. දුම්රිය වේගයෙන් කැසැන්ඩ්‍රා පාලම ළඟට යෑම චිත්‍රපටයේ උපරිමය මෙන්ම ත්‍රාසජනක හා කුතුහලමය අවස්ථාව විය.

1933 ඇමරිකාවේ, නිව්යෝක් නගරයේ ඉපදී අවුරුදු 77 ක් ආයුෂ ලබා 2010 වසරේ ඉතාලියේ ටස්කානි නගරයේදී මිය ගිය රොබර්ට් කාට්ස් 1976 දී ලියූ ‘ද කැසැන්ඩ්‍රා ක්‍රොසිං’ නව කථාව එම වසරේදීම චිත්‍රපටයකට නැඟුවෝ කාලෝ පොන්ටි, සහ ලිව් ග්‍රේඩ්ය. ඔවුන් දෙදෙනා එම චිත්‍රපටය අධ්‍යක්ෂණය කිරීමට භාර කළේ ‘ජෝර්ජ් පෑන් කොස්මටෝස්’ ටය. ඔහුව හඳුන්වන්නේ ග්‍රීක්- ඉතාලියානු සිනමා අධ්‍යක්ෂකවරයෙකු ලෙසටය. ඔහුගේ මුල්ම සිනමා අධ්‍යක්ෂණය වූයේ 1971 දී තිරගත කළ ‘සින්’ චිත්‍රපටය ය එය ‘ද ඩේ ඔෆ් ද මිඩ්වයිෆ්’ නම් ඔහුගේම නාට්‍යයක් පදනම් කර ගත් කථාවකි. එය ඔහුම ලියා, අධ්‍යක්ෂණය කළ චිත්‍රපටයක් වූ අතර, ඔහු සමඟ එය නිෂ්පාදනය කළේ පැට්‍රික් කර්ටිස්ය. රිචඩ් ජොන්සන් හා රැක්වල් වෙල්ච්, එහී ප්‍රධාන චරිතය රඟපෑහ. 1973 දී ප්‍රසිද්ධ ඉතාලි චිත්‍රපට නිෂ්පාදක ‘කාලෝ පොන්ටි’ ඔහුට, 1967 දී රොබට් කාර්ට්ස් ලියූ පොතක් වූ ‘ඩෙත් ඉන් රෝම්’ ඇසුරෙන් චිත්‍රපටයක් අධ්‍යක්ෂණය කිරීමට භාර කළේය. ඔහු එය ‘මැසක්‍රෙ ඉන් රෝම්’ නමින් වෙනස් කරමින් චිත්‍රපට ගත කළේ ප්‍රකට වේල්ස් නළු ‘රිචඩ් බර්ටන්’ සමඟ ඉතාලියානු ජනප්‍රිය නළුවෙකු වූ ‘මර්සෙල්ලො මැස්ට්‍රොයියානි’ ව ප්‍රධාන චරිතවලට සම්බන්ධ කරමිනි.

‘මැස්ක්‍රේ ඉන් රෝම්’ තුළින් කාලෝ පොන්ටි ජෝර්ජ් කොස්මටොස් ගේ දක්ෂකම් දුටු පසු ඔහුගේ අනෙක් චිත්‍රපටයත් කොස්මටොස්ටම භාර දුනි. ඒ රොබට් කාට්ස්ගේම නවකථාව වූ ‘ද කැසැන්ඩ්‍රා ක්‍රොසින්ග්’ය. මෙහි තිරනාටකය රොබට් කාට්ස් සමඟ ජෝර්ජ් කොස්මටොස් එක්වී ලියු අතර, එහි එන ප්‍රධාන චරිතය වූ දොස්තර ජොනතන් චැම්බලින්ට පීටර් ඕ ටූල් නැමති විශිෂ්ට නළුවාව තෝරා ගතී. එහෙත් ඔහු එම චරිතය භාර ගත්තේ නැත. ඔවුන්ගේ ඊළග තේරීම වූයේ ‘රිචඩ් හැරිස්’ වය. ඔහු එය රඟපෑමට එකඟ විය. මෙහි එන ප්‍රධාන කාන්තා චරිතය වූ ජෙනිෆර් රිස්පොලි චැම්බලින්ට, මුල සිටම තෝරා ගෙන තිබුණේ සොෆියා ලොරේන් වය. ඒ නිෂ්පාදක කාලෝ පොන්ටිගේ නිර්දේශයකි. ඔහු මෙම චිත්‍රපටය නිපදවීමට සැලසුම් කළේ තම බිරිඳ වූ ලෝ ප්‍රකට නිළි සොෆියා ලොරෙන් වෙනුවෙනි. කථාව තුළ එතරම් ප්‍රබලව විකාශය නොවන මෙම චරිතය තිර නාටකය තුළින් ‘හයිලයිට්’ ක⁣ළේ කාලෝ පොන්ටිගේ ඉල්ලීමටය. එහෙත් මෙම චිත්‍රපටය විචාරයෙදී ‘ද නිව්යෝක් ටයිම්ස්’ පුවත් පතේ විචාරක රිචඩ් ඉඩර් ලියා තිබුණේ, සොෆියා ලොරෙන් මෙම චරිතයට කිසිසේත් නුසුදුසු බවත්, ඇය මෙහි රඟපාමින් තම සිනමා රංගන ජීවිතය ‘ඩැමේජ්’ කර ගත් බවකි. ‘අවා ගාර්ඩනර්’ වැනි ප්‍රබල නිළියක් නිකොල් ඩ්‍රෙස්ලර් වැනි වැඩි පරාසයක් නැති චරිතයක් රඟපෑමද තරමක් පුදුමයට කරුණක් වූවද, ඇය කියා සිටියේ ඇය මෙම චිත්‍රපටයේ රඟපෑමට එක් වූයේ තනිකරම මුදල්වලට කියාය. එහෙයින් චරිතය කුමක්ද, එය ලොකුද, කුඩාද, එය තමන්ට ගැළපෙනවාද කියා ඇය නොසිතු බව ද කියා සිටියාය. 

ඇමරිකානු ප්‍රබල නළු ‘බර්ට් ලැන්කැස්ටර්’ මෙහී ප්‍රධාන චරිතය වූ කර්නල් මැකෙන්සි ට පණ පෙවීය. ලැන්කැස්ටර් මුලින්ම සිනමාවට පැමිණියේ 1945 දී තිරගත කළ ‘අ සවුන්ඩ් ඔෆ් හන්ටින්ග්’ චිත්‍රපටයෙනි. ඉන්පසු ඔහු චිත්‍රපට ගණනාවකම රඟපෑ අතර ⁣එයින් බොහොමයක් බොක්ස් ඔෆිස් ආදායම් වාර්තා තැබීය. 1953 දී ඔහු රඟපෑ මිලිටේරි චිත්‍රපටයක් වූ ‘ෆ්‍රොම් හියර් ටු ඉටනිටි’ ඔහුව හොලිවුඩ් නළු ලැයිස්තුවේ ඉහළටම ගෙන ආවේය. ‘ගන්ෆයිට් ඇට් ද ඕකේ කොරල්’, ‘ස්වීට් ස්මෙල් ඔෆ් සස්කස්’, ‘ද ප්‍රොෆෙෂනල්ස්’, ‘ද ස්විමර්’, ‘එයාපෝර්ට්’, වැනි චිත්‍රපට තුළින් ඔහු තව තවත් 'හයිලයිට්' විය. 

ඕ.ජේ. සිම්ප්සන්, ජෝන් පිලිප් ලෝ, මාර්ටින් ශීන්, වැනි ප්‍රබල නළුවන්ද ‘ද කැසැන්ඩ්‍රා ක්‍රොසින්ග්’ චිත්‍රපටයේ රඟපෑහ. 

ඇමරිකානු ඩොලර් මිලියන 6 ක ඇස්තමේන්තුවකට නිපදවුණු ‘කැසැන්ඩ්‍රා ක්‍රොසින්ග්’ ප්‍රථම තිරගත කිරීමේදී ඇමරිකානු ඩොලර් මිලියන 15.3 ක් උපයා තිබුණි.

දුම්රිය කැසැන්ඩ්‍රා පාලම ළඟට පැමිණිය. ඇතැමුන් නොසිතු, තවත් අය සිතූ අයුරින් දුම්රිය, කැසැන්ඩ්‍රා පාලමට පැමිණි වහාම එය ඔරොත්තු නොදෙන තත්වයකට උදා විය. පාලම කඩා වැටුණි. එය කඩා වැටුණේ නිකංම නොව. දුම්රියේ එක් කොටසක් සමඟය. චැම්බලින් සැලසුම් කළ ආකාරයටම, දුම්රියේ වඩාත් විනාශවී ගියේ ඉදිරිපසය. එහෙයින් ඉදිරිපස පෙට්ටි වල සිටි අය මරණයට පත්වන එන වළක්වා ගත හැක්කක් නොවීය. පිටු පස පෙට්ටි, පාලම කිට්ටුවට පැමිණ නතර වී තිබුණි. මේ හෙයින් පිටුපස සිටි අයගෙන් බොහෝ දෙනෙක් බේරුණි. ඒ අතරට කර්නල් මැකෙන්සි, ජොනතන් චැම්බලින්, ජෙනිෆර් රිස්පොලි, නිකොල් ඩ්‍රෙස්ලර් විය. 

ඇමරිකාවේ හා බ්‍රිතාන්‍ය තුළ ජනප්‍රියත්වයක් හිමි නොකර ගත් ‘ද කැසැන්ඩ්‍රා ක්‍රොසින්ග්’ චිත්‍රපටය ආසියාවේ රටවල දැඩි ලෙස ජනප්‍රිය විය. මෙයිනුත්, මෙය ලංකාවේ හා ජපානයේ අතිශයින්ම ජනප්‍රිය වූයේ ආදායමි වාර්තා තබමිනි. මෙය පසු කලෙක නිතරම පාහේ රූපවාහිනියේ විකාශය විය. ලංකාවේ කැසැන්ඩ්‍රා ක්‍රොසින්ග්' උන්මාදයක් ඇති විය. ලොව සිනමා විචාරකයන් චිත්‍රපටයට එල්ල කළේ ප්‍රහාරමය. එහෙත් ලංකාවේ ප්‍රේක්ෂකයන් නම් ‘ද කැසැන්ඩ්‍රා ක්‍රොසින්ග්’ චිත්‍රපටය දැඩි ලෙස වැලඳ ගත් බව පෙනේ.

[email protected]