සර්කස් යනු රෝහිත් ෂෙට්ටි විසින් අධ්‍යක්ෂණය කර නිෂ්පාදනය කරන ලද නවතම හින්දි චිත්‍රපටයයි. හාස්‍යමය චිත්‍රපටයක් වන එයට පාදක වී ඇත්තේ විලියම් ෂේක්ස්පියර්ගේ 'ද කොමඩි ඔෆ් එරර්ස්' (The Comedy of Errors) වේදිකා නාට්‍යයයි. 'ද කොමඩි ඔෆ් එරර්ස්' යනු විලියම් ෂේක්ස්පියර්ගේ මුල්කාලීන නාට්‍යවලින් එකකි. එය ඔහුගේ කෙටිම සහ ඔහුගේ වඩාත්ම හාස්‍යජනක නිර්මාණයක් ලෙස ද හැඳීන්වේ. 'ද කොමඩි ඔෆ් එරර්ස්' ලොව පුරා බොහෝ වාර ගණනක් අනුවර්තනය කර ඇත.

ග්‍රීක නගරයක් වන එෆීසස්හි පසුබිම් වූ 'ද කොමඩි ඔෆ් එරර්ස්' උපතේදී අහම්බෙන් වෙන් වූ සමාන නිවුන් දරුවන් දෙදෙනෙකුගේ කතාව කියයි. එය ආරම්භ වන්නේ සිරකූස් වෙළෙන්දෙකු වන ඊජියන් සිරකූස් එපීසස් අතර ගමන් කිරීමට එරෙහි තහනම කඩ කිරීම හේතුවෙන් මරණ දණ්ඩනයට ගෙන ඒමෙනි. එල්ලුම් ගහට ගෙන යන විට ඔහු එපීසියානු පාලකයා වන සොලිනස් ආදිපාදවරයාට පවසන්නේ තමා වසර විසිපහකට පෙර නැව් අනතුරකින් අහිමි වූ තම බිරිය සහ ඔහුගේ නිවුන් පුතුන් සොයමින් පැමිණි බවයි. ඊජියන් ගැන කනගාටු වන ආදිපාදවරයා ඔහුගේ ජීවිතය බේරා ගැනීමට හැකි කප්පම් මුදල ලබා ගැනීමට ඔහුට එක් දිනයක් ලබා දෙයි. ඊජියන් නොදන්නා දෙය නම්, ඔහුගේ නිවුන් පුතුන් අතරින් එක් අයෙකු සිය දාසයා සමඟ එපීසස් වෙත පැමිණ ඇති බවත් අනෙක් පුත්‍රයා එපීසස් හි ජීවත් වන නගරයේ සිවිල් ජීවිතයට සම්බන්ධ වූ සමෘද්ධිමත් මිනිසෙකු බවට පත්ව ඇති බවත්ය.

සර්කස් චිත්‍රපටයේ ද්විත්ව චරිත නිරූපණය කරනු ලබන්නේ රන්වීර් සිං විසිනි. ඔහු සමඟ පූජා හෙජ්, ජැකලින් ෆර්නැන්ඩ්ස්, ජොනී ලිවර්, සංජේ මිශ්‍රා, වරුන් ශර්මා, සිද්ධාර්ථ ජාදව්, මුකේෂ් තිවාරි, අශ්විනි කල්සේකර්, මුරලි ශර්මා ඇතුළු පිරිසක් රංගනයෙන් දායක වෙති. මීට අමතරව අජේ දේව්ගන් ගෝපාල් ලෙසත් මීනම්මා ලෙස දීපිකා පදුකෝන් ද විශේෂ රංගනයෙන් දායක වෙති. සර්කස් ලබන දෙසැම්බර් 23 වැනිදා සිට ලොව පුරා තිරගත කිරීමට සැලසුම් කර ඇත.

[email protected]