Feedback

Week of ජූලි 18, 2019

කාලය කන ටෙලි නාට්‍ය
ජූලි 18, 2019 ~ හේමන්ති ගාර්දියවසම් ~ මහනුවර

 වර්තමානයේ රූපවාහිනී නාළිකාවල ප්‍රදර්ශනය වන ඇතැම් ටෙලි නාට්‍ය ගැන නම් කියලා වැඩක් නැත. කතාව පැය භාගයක් පෙන්වන්නේ නම් විනාඩි 20 ක් පමණ අපට වෙළෙඳ දැන්වීම පනහක් බලන්නට සිදු වේ. තවද එකම දර්ශනය විරාමයෙන් පසුව කියාත් දෙවරක් තිරයේ දිස්වේ. අනවශ්‍ය කුරුලු කතා කියමින් කතාව බොළඳ ලෙස දිග් ගසයි. මෙවැනි නාට්‍යවලට සම්මාන ද ලැබීම පුදුමයකි. කොටස් 250 කින් (අධ්‍යක්ෂකට) නිම කළ හැකි කතාව කොටස් 800 ක් දක්වා විකාශය කර අපේ වටිනා කාලය කා දමයි. ටෙලි නාට්‍ය බැලීම ද එපා කරවයි.

ඉන්දියානු ආභාසයේ ටෙලි නාට්‍ය ඊට අන්තය. තරුණ තරුණියන්ගේ හැඟීම් අවුස්සන සුලු දර්ශන නිතර නිතර නැවත නැවතත් තිරයේ දිස් වේ. රටේ සංස්කෘතියට, සදාචාරයට සභ්‍යත්වයට මෙවන් නාට්‍ය බලවත් හානියකි. මුදල් පසුපස දුවන අය නිසා රටේ දරු පරපුරට වන නිහඬ ඛේදවාචකය අති මහත්ය. වගකිව යුත්තන්ගේ අවධානය මේ කෙරෙහි යොමු කොට ටෙලි නාට්‍යවලට නිසි ප්‍රමිතියක් ලබා දෙන්නේ නම් එය පොදුවේ මුළු රටටම කරන යහපත් සේවාවකි.

පෝෂිනී දිසානායකට
ජූලි 18, 2019 ~ ඩබ්ලිව්. කේ. මොහාන් ~ මහවැලි සී කලාපය

 නව පරපුර අපගේ කලා ලොවට මහඟු සම්පතකි. සෑම ක්ෂේත්‍රයකම ඉදිරි ප්‍රගමනයක් දැකිය හැකි වන්නේ නව්‍යතාවයෙන් පමණි. දැනට ස්වාධීන රූපවාහිනියේ විකාශය වන හුස්ම වැටෙන මල් නාට්‍යය ජනතා සිත් සතන් ඇඳ බැඳ තබා ගැනීමට සමත් වී තිබේ. එම නාට්‍යයේ ප්‍රේමවන්තියකගේ චරිතය නිරුපණය කරන පෝෂිනී දිසානායක නැමති රංගන ශිල්පිනිය හරි අපූරුවට එම චරිතයට සාධාරණත්වය ඉෂ්ට කර තිබේ. කලා ලොවේ දිගු ගමනකට ඔබට ආසිරි.

  

රොෂාන්ට සුබපැතුම්
ජූලි 18, 2019 ~ යූ. ජී. පාලිත කුමාරසිංහ ~ ගඩලාදෙණිය

 මේ දිනවල ජාතික රූපවාහිනියෙන් විකාශය වන වීරයා ගෙදර ඇවිත් ටෙලි නාට්‍යයේ විශිෂ්ට රංගනයක යෙදෙන රොෂාන් රවීන්ද්‍රට මගේ සුබපැතුම්. 

පෙම්බර දිල්හානිට
ජූලි 18, 2019 ~ මයිකල් බණ්ඩාරනායක ~ (ගාල්ල) වඳුරඹ

 සිනමා ලොවේ බැබළෙන රන් තාරකාවියයි – ඔබ රුචිරා නී

දනන් සිත් වසඟ කරවයි ! අපෙ ආදර සිනමාවේ ඔබ මිහිරා නී

සිනමා තිරේ දස්කම් පානා රන් සමනළියයි අපෙ සිත බැඳගත් රාණී

සැමදා නිදුකින් වෙසේවා ! ඔබ සිනමා ලොවේ මා හද බැඳි පෙම්බර දිල්හාණී

හද තුළ ලැගුම් ගත් සංගීතවේදියා
ජූලි 18, 2019 ~ එච්. ඉන්ද්‍රපාල ~ මුංහේන

 අශෝකා සිනමාපටයේ සංගීත අධ්‍යක්ෂක ලෙස සිය ප්‍රතිභාවයන් විකසිත කළ පී. එල්. ඒ. සෝමපාල එදා මෙදා තුර සංගීත ක්ෂේත්‍රයේ අසහාය සංගීතවේදියෙකි. භාරතයේ සුමියුරු හින්දුස්තානි ස්වර රටා ආභාසයට ගනිමින් මධුර මමෝහර ගීත ශෛලියක් සංගීත ක්ෂේත්‍රයට දායාද කළ පුරෝගාමී සංගීතවේදියෙකි. ජෝති, ලතා, ඇන්ජලින් ඇතුළු බොහෝ ගායන ශිල්පීන් හිනි පෙත්තේ ඔසවා තැබීමට සෝමපාලයන් බොහෝ සෙයින් දායක විය. සිනමාපට 51 පමණ අධික සංඛ්‍යාවක සංගීත නිර්මාපකයකු වූ සෝමපාල ගායන ශිල්පියෙකු ලෙසත් සිය ප්‍රතිභාවන් පළ කළ ගායන ශිල්පියෙකි. සංගීත ක්ෂේත්‍රයට අමිල මිනිසෙක් වූ සෝමපාලයන් අද අප අතර නැතත් එතුමා සැමදා රසික හදවත් තුළ ලැගුම් ගෙන ඇත.

කොණ්ඩදෙණියේ හාමුදුරුවෝ චිත්‍රපටය කෝ
ජූලි 18, 2019 ~ පාලක සමන් පෙරේරා ~ හැඳල

 60 – 70 දශකයේ විසූ බලගතු යන්ත්‍ර මන්ත්‍ර සහ වෙදකම් පිළිබඳව ප්‍රසිද්ධ හිමි නමක් වූ මාතර කොණ්ඩදෙණියේ හාමුදුරුවන්ගේ ජීවිත කතා පුවත තේමා කර නන්දසේන හෙට්ටිආරච්චි රචිත ‘කොණ්ඩදෙණියේ හාමුදුරුවෝ’ නම් කෘතිය ඇසුරෙන් සිරිතුංග පෙරේරා නිර්මාණය කළ ‘කොණ්ඩදෙණියේ හාමුදුරුවෝ’ සිනමා කෘතිය අදටත් දැක ගැනීමට නොහැකි වීම විශාල කණගාටුවකි.

රන්ජන් රාමනායක ‘කොණ්ඩදෙණියේ හාමුදුරුවෝ’ ලෙස ප්‍රබල චරිතය පණ පොවමින් දුලිකා මාරපන, බිමල් ජයකොඩි, නිපුන් ලංකා, සතිස්චන්ද්‍ර එදිරිසිංහ, කුමාර තිරිමාදුර, දමිතා අබේරත්න, වසන්ති චතුරානි, ජී. ආර්. පෙරේරා ඇතුළු නළු නිළි පිරිසක් රංගනයෙන් දායක වී ඇති ‘කොණ්ඩදෙණියේ හාමුදුරුවෝ’ සිනමා කෘතිය ඉදරියේදී දැක බලා ගැනීමට එහි අධ්‍යක්ෂක සිරිතුංග පෙරේරා මහතාගෙන් උදා කර දෙන මෙන් ඉල්ලා සිටිමි.

ගීත කලාව රකිමුද
ජූලි 18, 2019 ~ ජගත් චන්ද්‍රසිරි පූජා ජගත්සිරි ~ පස්යාල

ගීත ගායනය කරනවා කියන්නේ එකකි. ගීත කියනවා කියන්නේ තවත් එකකි. ගීත නිවැරදිව ගායනා කිරීමට හැමෝටම බැරිය. එහෙත් ගීත කීමට කා හට වුවත් පුළුවන. වත්මන් සමහර ගායකයන් යයි කියා ගන්නා සමහර සින්දු කියන ශිල්පීන්ට වෙලා ඇත්තේ ද මේ සන්තෑසියමයි.

ඔවුහු පුළුවන් තරම් හයියෙන් බෙරිහන් දීගෙන ගීත කියයි. ඔවුන් කියන්නේ මොනවද කියලා ඔවුන්වත් දන්නේ නැත. එසේ කියන්නේ ද ප්‍රේම විලාපයන්ය. උච්ච ස්වරයේ තිබෙන අලංකාරය ඔවුන් අමු අමුවේම විනාශ කරයි. ප්‍රේමයේ විරහව මෙතරම් කෑ ගසා කිව යුතුද.

අතීතයේදී ද විරහව ගැන කොතෙකුත් ගීත ලිය වී ගායනා කර ඇත. ඒවා මෙතරම් පහත් තත්ත්වයට ශ්‍රාවකයා පත් කර නොමැති බව ප්‍රකාශ කළ හැකිය. එදා මිල්ටන් මල්ලවාරච්චිලා, මිල්ටන් පෙරේරලා විරහ ගීත, ප්‍රේම ගීත ගායනා කළ ආකාරය සිහි ගන් වන විට වත්මන් සමහර ගායකයන් යයි කියා ගන්නා අය කියන ගීත අසන විට ‘අනේ අපොයි’ කියලා හිතෙයි.

සංගීතය පිළිබඳව විෂය දැනුමක් නොමැතිව කියන්නම් වාලේ ගීත කියලා වත්මන් තාරුණ්‍යයේ රසඥතාවය සාහසික ලෙස විනාශ කිරීමේ පාපය නම් සුළුපටු නොවේ. මේ තත්ත්වයට සමහර ගුවන් විදුලි සේවා සහ සමහර රූපවාහිනී නාළිකා ද රුකුල් දී සහය දෙමින් ඇත. සංගීතය කියන්නේ විශ්ව භාෂාවකි. එය විෂය දැනුමක් සහිතව භාවිත කරන මෙන් නව පරපුරෙන් ඉල්ලමු.

රිදී තිරයේ නිවී ගිය රිදී රේඛාව
ජූලි 18, 2019 ~ පේමරත්න මනතුංග ~ හෝමාගම
වෙසක් කැකුළු පිපුණත් නැත අද සුවඳ හමන්නේ
දවට ගහක මුදුනින් දුක්බර ගීතයක් ඇසෙන්නේ
කෑරලා ද නාද නොදී ගහට කොටන්නේ
ඔබේ මිහිරි හඬ කෙදිනද යළි ගුවනට මුසුවන්නේ
 
රතු පාට මල් නැත අද දකින්නට සැරසුණු ගුරුපාර
රිදී හඬ රැව් දුන් හැටි මතකයි එදා සිනමා අඹර
හද තුළ ඇඳී ඇත ගැයු ගීතයන් ඔබ සමඟින් සිසිර
පතනෙමි නිවන් සුව ඔබට ඉන්ද්‍රාණිි විජය බණ්ඩාර
රංගධර ටෝනි රණසිංහයන්ට
ජූලි 18, 2019 ~ ක්ලෝඩ් ද ලිවේරා සහ නාලිනී ද ලිවේරා ~ මිගමුවේ

 මෝදර හෙට්ටිආරච්චිගේ ඉන්ගේෂස් ඇන්තනි සිල්වා ලෙස උපන් ඔහු පසුව ටෝනි රණසිංහ විය.

අපගේ ඉතාම ප්‍රවීණ රංගධරයාණන් වන මොහු වේදිකාව මෙන්ම චිත්‍රපට සහ ටෙලි නාට්‍ය තුළ ද ඉතාම දක්ෂ තිර නාටකයකු ද වීම සුවිශේෂියි. අප සිනමාවේ ඔහු දක්ෂ කඩවසම් නළුවකු සේම කොටි වලිගය, පවුරු වළලු, දුවකට මවක මිස වැනි සම්මානනීය තිර පිටපත් ද ඔහුගේ විය. ඉතාම චතුර ලෙස ඉංග්‍රිසි භාෂාව හසුරුවීම ද තවත් දක්ෂකමක් විය. මේ මස ජුලි 31 වනදා ඔහුගේ උපන් දිනයයි. අපට ඔහු අමතක කළ නොහැකිය. මෝක්ෂ සුවය පතමු.

මාලිනීට දීර්ඝායුෂ
ජූලි 18, 2019 ~ අතුල රම්‍යසිරි ~ පානදුර

ශ්‍රී ලාංකේය සිනමාවට දශක පහක් අනුපමේය මෙහෙවරක් කළ අග්‍රගණ්‍ය රංගනවේදිනී ආචාර්ය මාලිනී ෆොන්සේකා මහත්මියට නිදුක් නිරෝගී සුවය දීර්ඝායුෂ ප්‍රාර්ථනා කරමි.

Week of ජූලි 18, 2019